Tɛ̀ɛnnɛ 4
4
Kpɔ̀ʔɔrɔli kéele nyɛ̀ʔɛni ni
1Kérigèle bee nyaana kadoʔo ma, a mii níì wéle n kɔ̀rigɔ nyaa womúgugo ní nyɛ̀ʔɛni na. Yákpozelili mii da lóʔo lè, a li i nyuu ní mii ní àmɛɛ búru wìimɛ nyɛ lè, a loro mii pye: «Lúgu naa ǹjogi ni mii a ba kérigèle kèle tɛ̀ɛn mɔ na gele ge yɛlɛ ke ba kpéʔele lè gele bee kàdoʔo ma.»
2 #
Ezek 1:26-28; 10:1 A Pìicǎnni fala n mii kàriga terire. A mii fàngolo nyaa wodɛʔɛlɛ ní nyɛ̀ʔɛni ni, wàa si i nyɛ wodɛ́ɛɔn ní fàngoli bee ni. 3Wi maa ni daragi àmɛɛ Zyasipi ní Sariduwani kadɛɛngèlē nyɛ lè, zěŋɔnɔ si maa fàngoli màʔa n kpàra ní i nyɛ àmɛɛ emerodi kàdɛɛnnɛ nyɛ lè. 4A mii fàngorigèle kèle toko ní sicɛrɛ nyaa a ge fàngoli màʔa n kpàra, wolɛɛbèlē toko ní sicɛrɛ si i nyɛ wodɛ́ɛnbéle ní fàngorigèle bee ni ní buroviiye ní, fànʔafɔ-nyùndɔngéle si i nyɛ be ma nyúnyi ni, tɛɛ̀ wòʔolo. 5#Yir 19:16; Tɛ̀ɛn 8:5; 11:19; 16:18; Ezek 1:13; Tɛ̀ɛn 1:4; Zak 4:2 Nyɛ̀ʔɛni nyɛ́ʔɛnɛmɛ, ní kàfulogo, ní nyɛ̀ʔɛni folomɔ si i yirigi fàngoli ni. Fètingéle kɔrɔsiin si i nyɛ wolegéle ní ni nyín fàngoli yɛ́ʔɛ ma, koro ge nyɛ Kolocɔlɔɔ pìígèle kɔrɔsiin. 6#Ezek 1:22; Yir 24:10; 10:14 Yarigaa maa pye fàngoli yɛ́ʔɛ ma mɔ a jo lòkpɔʔɔ gii, ki maa pye woyeliyelige ní àmɛɛ kirisitali#4:6 Kirisitali: Kàdɛɛngèle féleye kàlawaga wéle. nyɛ lè.
Sìi yáriya sicɛrɛ maa pye fàngoli nínge ni, níì li màʔa n kpàra, á nyapiinɛʔɛrɛ si i nyɛ yi na yɛʔɛ̀ ma ní kàdoʔo ma. 7Sìi yáriyi wozelige maa càaraɔ wíri, á siin wógi si náapɛɛlɛ wíri, taanri wógi yɛ́ʔɛ si i nyɛ mɔ a jo syɔɔn wóʔo gii, á sicɛrɛ wógi si nyɔɔ̀ wíri, wi sɔ̀lɔ́ lè ǹjogi ni. 8#Ezek 1:18; 10:12; Eza 6:2-3 Fókaanya kɔrɔni kɔrɔni maa pye sìi yáriyi bee sicɛrɛ na, á yi nyìn nyapiigèle na fúnyi ní kàdoyi na. Yi si i gi nyuu làla o làla canʔa ní yébilige níì jo:
«Kàfɔw Kolocɔlɔɔ wi lè Séew Myɛ Kàfɔlɔ,
wi n sín, wi n sín, wi n sín,
woro wee wi da pye yaà lè,
ní woro wee wi yaà lè,
ní woro wee wi maa lè.»
9Wee wi nyɛ lè wodɛ́ɛɔn ní fàngoli ni, ní si i nyɛ sìi na lè làla o làla kwɔ́ɔmɔ fun, sìi yáriyi bee ga ni wi kpɔ̀ʔɔrɔ́ ní i wi kpɔ́ʔɔgi, ní i bariga kaangi wi ma lǎlee faala ni lè, 10wolɛɛbèle toko ní sicɛrɛ n too n pe yɛ́ɛyi cíbele wi yɛʔɛ ma, wee wi tɛ́ɛn lè fàngoli ni, ní i wi kpɔ̀ʔɔrɔ́ àmɛɛ wi nyɛ lè sìi na làla o làla kwɔ́ɔmɔ fun, ní i pe fànʔafɔ-nyùndɔngèle cáan fàngoli yɛ́ʔɛ̀ ma, ní i gi nyuu níì jo:
11«Nìjangbɔɔri, ní kpɔ̀ʔɔrɔli,
ní séew n yɛlɛ mɔ na,
mɔ wi nyɛ lè wolo Kàfɔw ní wolo Kolocɔlɔw,
níì cán mɔ wi yáriri myɛ faan,
ki i nyɛ mɔ nyɛ́nɛ kéele di pye beè,
mɔ n di faan n yɛlɛ ní mɔ nyɛ́nɛ kéeli ní.»
Currently Selected:
Tɛ̀ɛnnɛ 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
