Tɛ̀ɛnnɛ 3
3
Syɛ́ɛnri be sɛ́bɛ n tórigo lè Saridi Egiliziw ma
1«Dee naa sɛ́bɛ mi tórigo Saridi Egiliziw tunduɔn ma, mí wi pye:
‹Wee wi Kolocɔlɔɔ pìígèle kɔrɔsiin cò lè n fàra ŋɔripiigèle kɔrɔsiin na, woro wi kérigèle naa joo níì jo: Mii n mɔ kapyegèle cán, mii n gi cán ncan mɛ́ʔɛ i nyɛ mɔ na gee gi gi tɛ̀ɛn lè n jo mɔ i nyɛ sìi na, bi gi taa mɔ i nyɛ woguuo ní. 2Kolocɔlɔɔ kôdanʔari kèlē cɛɛri ge kòro yaà mɔ ma lè ní ní i caa bi kwɔ́ɔ, ki n yɛlɛ maa ge kɔ̀rɔsíi jàngó kàa í da fàrá ge na, níì cán mii ga mɔ kapyegèle nyaa a ge foro mii Kolocɔlɔw nyɛ́nɛ na í. 3#Mat 24:43-44; Luk 12:39-40; Tɛ̀ɛn 16:15 Kánmee na mɔ da Syɛɛnjóocǎnri taa lè, ní àmɛɛ mɔ da di lóʔo lè, ki n yɛlɛ maa sɔ̀ngí maa taagi gee bee na, mí di cò cama, mí kàdoʔo wáa mɔ kapeegèle ma. Kapye mɔ ga kòro nyɛ̀nɛ na í, mii panni a ba mɔ pàla àmɛɛ kàyuuo nyɛ lè, mɔ a tée mii làribanni cán nyáana í. 4Kàjáa pèle cɛɛri i yaà mɔ ma Saridi ni, bele be lè pe ga pe búroyi nɔ́nʔɔ í. Poro a ba buroviiye le bi pínɛ da táanri ní mii ní, níì cán pe n nyɔɔ n yɛlɛ ní gee bee ní.
5 #
Yir 32:32-33; Ŋún 69:29; Tɛ̀ɛn 20:12; Mat 10:32; Luk 12:8 Wee wi ga fànʔa taa lè, mii a buroviiye le wee bee na, mii a tée wi mɛ́ɛgi kurugo láʔa sìíw sɛ́bɛ ni nyáana í, mii si a gi joo mii Tóow ní wi nyɛ̀ʔɛni tundunbéle nyɛ́nɛ na si jo: Wi i nyɛ mii wóo.
6Dee Pìicǎnni nyuu Egilizibèle ma lè, líiweele ga pye wee na lè, wi líiyi cáan waa di lúro.›
Syɛ́ɛnri be sɛ́bɛ n tórigo lè Filadelifii Egiliziw ma
7 #
Eza 22:22; Zyɔb 12:14 «Dee naa sɛ́bɛ mi tórigo Filadelifii Egiliziw tunduɔn ma, mí wi pye:
‹Wee wi sín lè ní i nyɛ kányɛɛgi fɔ́lɔ, ní woro wee má Davidi làkilew nyɛ lè, wi ga kɔ̀rigi múgu wàa faala a gbǎn gi tɔ́n í, wi si ga wɔ́ɔ̀ gi tɔ́n wàa faala a gbǎn gi múgu í, woro wi kérigèle naa joo níì jo: 8Mii n mɔ kapyegèle cán. Wéle, mii n kɔ̀rigi múgu mɔ ma, wàa faala si a gbǎn gi tɔ́n í, níì cán mɔ séew n cɛ́rɛ, koro ní ki myɛ ní a mɔ mii syɛ́ɛnri cò, mɔ ga mii mɛ́ɛgi cée í. 9#Eza 49:23; 60:14; 43:4 Wéle, bele be nyɛ lè Sutanaw sérikpaʔa woolo ní si i finɛ, ní i peyɛɛ yiri Zyefubéle, bi gi taa pe o nyɛ Zyefubéle í, mii a be kɔ́ri koro ga pye pe ba kpùmɔnɔ mɔ taana bàā mɔ kpɔ̀ʔɔrɔ́, jàngó pe gi cán bi cán mii n tàmaga le ní mɔ ní. 10Amɛɛ mɔ kpàracogo kpéʔele lè n yɛlɛ ní mii syɛ́ɛnri ní dee mii joo lè, gee bee na mii a wɔ́ɔ mɔ syɔɔ wɔʔɔli làla ma, lee li a ba dulunyanw myɛ tɔ́n lè, koro ga pye bi tári syɛ̀ɛnnɛ sɛʔɛ wéle. 11Cɛɛri ga pye mii a pan. Gee mɔ taa n kwɔ́ɔ lè, mi gi cò cama jàngó syɔɔnwaa faala a kɔ́ mɔ kpɔ́ʔɔri nyùndɔnnɔ syɔɔ mɔ ma í.
12 #
Tɛ̀ɛn 21:2; Eza 62:2; 65:15 Wee wi ga fànʔa taa lè, mii a wi kpéʔele tiipɔlɔ mii Kolocɔlɔw kpɔ̀ʔɔrɔlɔ kpaʔa ni, wi si a ní yiri yaà nyáana í. Mii a wɔ́ɔ mii Kolocɔlɔw mɛ́ʔɛ sɛ́bɛ wi na n fàra mii Kolocɔlɔw kèkpɔʔɔ mɛ́ʔɛ na, ki lè Zyerusalɛmifɔnw gee ki a yìri lè nyɛ̀ʔɛni na mii Kolocɔlɔw ma bi tìgi naa, si wɔ́ɔ mii mɛ́ɛfɔngi sɛ́bɛ wi na.
13Dee Pìicǎnni nyuu Egilizibèle ma lè, líiweele ga pye wee na lè, wi líiyi cáan waa di lúro.›
Syɛ́ɛnri be sɛ́bɛ n tórigo lè Lawodise Egiliziw ma
14 #
Kàs 8:22
«Dee naa sɛ́bɛ mi tórigo Lawodise Egiliziw tunduɔn ma, mí wi pye:
‹Wee be yiri lè Amiina, wi lè séerafɔjǎnw, woro wee wi nyɛ lè wodelew, ní i nyɛ Kolocɔlɔɔ yakpéʔeleri myɛ sélifɔlɔ, woro wi kérigèle naa joo níì jo: 15Mii n mɔ kapyegèle cán, mɔ ga nyíngi í, mɔ si ga wɔ́ɔ̀ wári í. Ki maa yɛlɛ mɔ í nyíngi, wàlá bi wári! 16Amɛɛ si mɔ nyɛ lè mɔ a jo lòsalasalaga gii, gee bee n jo mɔ ga wári í, mɔ si ga wɔ́ɔ̀ nyíngi í, mii a mɔ tùgu yirige mii nyɔ́ɔgi ni. 17Níì cán mɔ i gi nyuu miyɛɛ kéeli na níì jo: Mii i nyɛ lɔrɔfɔlɔ, mii lɔ́ri n nɛʔɛ, mii màko ní o nyɛ yafyɛn na í, bi gi taa mɔ ga gi cán ncan mɔ i nyɛ fɔ̀rɔgi kɔ́yɔ ni í, ní i nyɛ nyinimɛ wóo ní í, ní wɔ́ɔ i nyɛ foomɔfɔlɔ, ní fúuɔn, ní níbori í. 18Mii i mɔ lálii jàngó mɔ í tɛ́ɛw syɔɔ mii ma, wee be sámaga lè ní náagi ní a wi nyɔɔ, koro ga pye mɔ í lɔnɛʔɛrɛ taa, mí buroviiye syɔɔ koro ga pye mɔ í yalere taa, jàngó pe a kɔ́ ra mɔ nyaagi níbori í, mí wɔ́ɔ nyapiiyáa-tíinmɛ syɔɔ mi pɔ̀li mɔ nyapiigèle na, koro ga pye mɔ í da nyaagi. 19#Kàs 3:12; Heb 12:6 Bele myɛ be nyɛ lè mii syɛɛn-nidaanmabèle, mii i fúlo be na ní i be kpúmɔn ni kàragí. Gee bee na mi wári mi kàri mi kàdoʔo wáa mɔ kapeegèle ma! 20Wéle, mii n yére kpaaweeli taana ní i li kólo. Wee wi ga mii yákpoli lóʔo lè níì kpaaweeli múgu, mii a jée woro ma sa lìi ní wi ní, woro si wɔ́ɔ lìi ní mii ní.
21Wee wi ga fànʔa taa lè, mii a wee bee yaʔa wi tɛ́ɛn mii taana mii fàngoli ni, àmɛɛ mii wɔ́ɔ̀ fànʔa taa lè ní sáà tɛ́ɛn mii Tóow taana wi fàngoli ni lè.
22Dee Pìicǎnni nyuu Egilizibèle ma lè, líiweele ga pye wee na lè, wi wi líiyi cáan waa di lúro.› »
Currently Selected:
Tɛ̀ɛnnɛ 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
