Tɛ̀ɛnnɛ 2
2
Syɛ́ɛnri be sɛ́bɛ n tórigo lè Efɛzi Egiliziw ma
1«Dee naa sɛ́bɛ mi tórigo Efɛzi Egiliziw tunduɔn ma, mí wi pye:
‹Wee wi ŋɔripiigèle kɔrɔsiin cò lè wi kàliige kɔ́gi ni, ní i táanri tɛ́ɛw fètindaʔagéle kɔrɔsiin nínge ni lè, woro wi kérigèle naa joo níì jo: 2Mii n mɔ kapyegèle, ní mɔ fáliw, ní mɔ kparacogi kéele cán. Mii n gi cán ncan mɔ a gbǎn syɛɛnpeebèle kpàraco í. Bele be peyɛɛ yiri lè pìitunbéle, pe si o nyɛ nya í, mɔ n bele bee sɛʔɛ n wéle, a mɔ be nyaa jànvaafɔɔlɔ. 3Mɔ i nyɛ kpàracogofɔlɔ, ní i wɔʔɔ mii mɛ́ɛgi kéele na, mɔ bárigaw si ga sèʔê kwɔ́ɔ í. 4Koro ní ki myɛ ní mii n sèʔê tìgi mɔ na keelaa nibin na, loro li nyɛ mɔ n mɔ tamazeligi yaʔa. 5Gee bee na gi yɛlɛ mɔ í sɔ̀ngí taa mɔ tɛɛtooli na, mí kàdoʔo wáa mɔ kapeegèle ma máā mɔ kapyezeligèle kpéʔele, kapye koro ban í mii i syée yaà mɔ ma, kapye mɔ ga kàdoʔo wáa mɔ kapeegèle ma í, mii a sa mɔ fetindaʔali láa núngo li tɛɛ̀tɛʔɛgi ni. 6Gee si gi yaà lè mɔ ma, koro gi nyɛ Nikolayiti ye#2:6,15 Nikolayiti ye: Syɛ́ɛnbèle pèle bɛɛ, bele pe da pínɛ n bɛ̀ɛ lè níì jànváa kólogaa sámaga. Ki i wéle mɔ a jo pe maa peyɛɛ gaan yasunzunri, ní kanɔnʔɔri ma. Kàjáa lǎli ni kólogi bee séli lè wàlá tɛ́ɛgee ni gi séli lè, koro ga jáa wee wi gi séli lè syɔɔn ga gi fílige n cán í. kapyegèle i mɔ bɛɛngi, àmɛɛ ge wɔ́ɔ i mii bɛɛngi lè.
7 #
Sél 2:9; Tɛ̀ɛn 22:2; Ezek 28:13; 31:8 Dee Pìicǎnni nyuu Egilizibèle ma lè, líiweele ga pye wee na lè, wi líiyi cáan waa di lúro,
Wee wi ga fànʔa taa lè, mii a wee bee kaan wi lìi sìíw tíige yasanra na ki lè Kolocɔlɔɔ tɛɛcǎngi ni.›
Syɛ́ɛnri be sɛ́bɛ n tórigo lè Simiirini Egiliziw ma
8 #
Eza 44:6; 48:12; Tɛ̀ɛn 1:17; 22:13 «Dee naa sɛ́bɛ mi tórigo Simiirini Egiliziw tunduɔn ma, mí wi pye:
‹Wee wi lè yɛɛ̀kiniw ní kàdotɔnw, woro wee wi baa kùu ní níì nyán n pye sìi na lè, woro wi kérigèle naa joo níì jo: 9Mii n mɔ wɔʔɔli ní mɔ fóomi cán, bi gi taa mɔ i nyɛ lɔrɔfɔlɔ, ní wɔ́ɔ̀ be cán bele be mɔ mɛ́ɛgi kálagi lè, ní i peyɛɛ yiri Zyefubéle, bi gi taa pe o nyɛ Zyefubéle í, kàjáa Sutanaw sérikpaʔa woolo be nyɛ. 10Wɔʔɔgèle ke a ba too mɔ na lè, ki ga yɛlɛ mɔ í fyáa ge na nyáana í. Wéle, cɛɛri ga pye Dàzɔɔnw a yele pèle cò bi le kàsow ni jàngó bi yele pye wéle, yele a ba wɔʔɔ fwɔɔ bi taa canya kɛɛ. Ki n yɛlɛ mɔ í kòro tágali ni fwɔɔ bi ba nan kùúw na, mii si sìi kaan mɔ ma, wi pye mɔ kpɔ́ʔɔri nyùndɔnnɔ.
11 #
Tɛ̀ɛn 20:14; 21:8 Dee Pìicǎnni nyuu Egilizibèle ma lè, líiweele ga pye wee na lè, wi líiyi cáan waa di lúro!
Wee wi ga fànʔa taa lè, kùu siin wów a ní gbǎn yafyɛn kpéʔele wee bee na í.›
Syɛ́ɛnri be sɛ́bɛ n tórigo lè Pɛrigami Egiliziw ma
12«Dee naa sɛ́bɛ mi tórigo Pɛrigami Egiliziw tunduɔn ma, mí wi pye:
‹Wee má yɛ́ɛyi siin ŋɔséetànʔa nyɛ lè, woro wi kérigèle naa joo níì jo: 13Mii n mɔ tɛɛkòrogi cán, nɛɛ bee Sutanaw fàngolo nyɛ. Mii n gi cán mɔ i mii mɛ́ɛgi córo, àlí lǎli ni mii séerafɔjǎnw Antipasi kùu lè, mɔ ga mii tágali cée í, woro wee pe da kpóo lè yele níngi ni, beè Sutanaw tɛɛkòrogo nyɛ lè. 14#Cór 22:5,7; 31:16; Làlw 23:4; Cór 25:1-3 Kàjáa mii n tìgi mɔ na kérigèle kèle cɛɛri na, koro gi nyɛ pèle i yaà mɔ ma bele be yére lè Balaami tamani ni, woro wee wi da Balaki tama lè jàngó wi karinyanga le Isirayɛli yòdaʔayi tɛɛsɔ̀lɔgɔ ni, koro ga pye paa yasunyi káara káa, si wɔ́ɔ ra kanɔnʔɔri kpéʔele. 15Pèle ní wɔ́ɔ i yaà mɔ ma, bele be yére lè Nikolayiti ye tamani ni. 16Gee bee na gi yɛlɛ mɔ í kàdoʔo wáa mɔ kapeegèle ma, kapye koro ban í, mii i syée yaà mɔ ma tɔ́ɔliw ni sa mii nyɔ́ɔgi ŋɔsée tɛ́ʔɛ bi kapɛɛnni kpúmɔn ní be ní.
17 #
Yir 16:14-15; 16:33-34; Zyan 6:48-50; Eza 62:2; 65:15 Dee Pìicǎnni nyuu Egilizibèle ma lè, líiweele ga pye wee na lè, wi líiyi cáan waa di lúro!
Wee wi ga fànʔa taa lè, mii a mánɛ-làraɔ, ní kàdɛnɛviige kaan wee bee ma. Mɛ́ɛfɔngɔ i nyɛ kàdɛnɛgi bee na wozɛbɛgɛ ní, wàa faala ga mɛ́ɛgi bee cán í, kapye gi taafɔw ban í.›
Syɛ́ɛnri be sɛ́bɛ n tórigo lè Tyatiiri Egiliziw ma
18«Dee naa sɛ́bɛ mi tórigo Tyatiiri Egiliziw tunduɔn ma, mí wi pye:
‹Kolocɔlɔɔ Jáaw wi kérigèle naa joo, woro wee nyapiigéle ge nyɛ àmɛɛ naanyìnge nyɛ lè, wi tɔ́lɔyi si i nyɛ àmɛɛ kanyɛɛnrɛ nyɛ lè, dee be gbàla lè naakpɔʔɔ ni a di nyɔɔ ni nyɛ́ʔɛnɛ, woro wi jo: 19Mii n mɔ kapyegèle, ní mɔ tamagi, ní mɔ tágali cán, n fàra mɔ fáliw, ní mɔ kparacogi na, mii n gi cán ncan kérigèle mɔ kpéʔele lǎli naa ni lè, ke n nɛʔɛ n sɔ̀lɔ wozeligèle na. 20#1Fàn 16:31; 2Fàn 9:22,30 Kàjáa mii n sèʔê tìgi mɔ na kéeli naa na, loro li nyɛ àmɛɛ mɔ fɔ̀lɔ gi na n céw bee yaʔa yaà lè, wee be yiri lè Zyezabɛli, woro wee wi wiyɛɛ yiri lè kanyaajooo, ní si i mii púlobèle tama, ní i be fáana jàngó paa kanɔnʔɔri kpéʔele, sáā yasunyi káara káa. 21A mii làla yaʔa wi ma jàngó wi láʔa wi kanɔnʔɔri na, wi si ga fɔ̀lɔ bi láʔa di na í. 22Wéle, mii a wi cáan yaama yasinɛgɛ na, bele be kanɔnʔɔri kpéʔele ní wi ní lè, kapye pe ga láʔa kérigèle bee na be kpéʔele ní wi ní lè í, mii a wɔ́ɔ wɔʔɔgbɔɔlɔ cáan bele bee na. 23#Ŋún 7:10; 62:13; Zyer 17:10 Mii a tɔ̀nɔ́ wi pìíbèle kpóo. Egilizibèle myɛ a gi cán bi cán mii wi syɛ́ɛnbèle zɔ̀nbēle ní be fúnyi sɔ̀ngurɔ sɛʔɛ ni wéle, mii a yele myɛ nibin nibin sàra bi yɛlɛ ní yele kapyegèle ní.
24Kàjáa mii a dee naa joo yele Tyatiiri ye wozanbèle ma yele bele myɛ ye nyɛ lè ye ga yére tamani bee ni í, yele si ga wɔ́ɔ̀ kérigèle bee cán gele be yiri lè Sutanaw fúngo kalaragēle í, mii a ní tugoraa nikwɔɔ tugo yele na í. 25Koro ní ki myɛ ní gee yele taa n kwɔ́ɔ lè, ki n yɛlɛ ye gi sámaga ye cò bi taa mii í pan.
26 #
Ŋún 2:8-9
Wee wi ga fànʔa taa lè n kòro ni mii nyɛ́nɛ kérigèle kpéʔele n taa n sáà nan gi kwɔ́ɔmi na, mii a séew kaan wee bee ma waa syɛɛnfeleyi kàragí.
27Wi a ba ra be nàʔá ní tunmɔrɔ kàgbeele ní,
sáā be jabagi àmɛɛ cóori kòdɔʔɔlɔ nyɛ lè,
28kánmee na mii Tóow séew kaan mii ma lè, kánmi bee na mii a wɔ́ɔ wi kaan syɔ́ɔnw bee ma, si wɔ́ɔ nyìndaliŋɔni kaan wi ma.
29Dee Pìicǎnni nyuu Egilizibèle ma lè, líiweele ga pye wee na lè, wi líiyi cáan waa di lúro.›
Currently Selected:
Tɛ̀ɛnnɛ 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
