Tɛ̀ɛnnɛ 1
1
Sélimi syɛ́ɛnrɛ
1Cɛɛri ga pye kérigèle ke a ba kpéʔele lè, Kolocɔlɔɔ maa ge tɛ̀ɛn Zyezu Kirisi na, níì jo wi ba ge tɛ̀ɛn wi púlobèle na, wi maa wi nyɛ̀ʔɛni tunduɔn tun wi púlow Zyan ma jàngó wi sa ge fílige tɛ̀ɛn wi na, 2a Zyan Kolocɔlɔɔ syɛ́ɛnri séera kpéʔele wi kanyaagèle myɛ ni ge nyɛ lè Zyezu Kirisi séeraw. 3Wee wi kanyaajoori naa syɛ́ɛnrɛ wéle ni nyuu lè, ní bele be di lúro lè ní i di kpéʔele, bele bee i nyɛ dùba pìibēle! Níì cán ti làrivoroli n nùuni.
Fòo kpéʔelele Egilizibèle kɔrɔsiin ma
4 #
Yir 3:14; Tɛ̀ɛn 4:5 Mii Zyan a sɛ́bɛw naa tórigo yele Egilizibèle kɔrɔsiin ma ye nyɛ lè Azii tári ni, ki n yɛlɛ Kolocɔlɔɔ í kpɔ́ʔɔri ní fûnnyingi kaan yele ma, woro wee wi yaà lè, ní woro wee wi da pye yaà lè, ní woro wee wi maa lè, pìígèle kɔrɔsiin í di kaan yele ma, gele ge nyɛ lè wi fàngoli yɛ́ʔɛ ma. 5#Eza 55:4; Ŋún 89:27 Zyezu Kirisi í wɔ́ɔ di kaan yele ma, wi nyɛ lè séerafɔjǎnw, woro wee wi nyán n yiri kúbèle nínge ni lè wozeliw, ní wɔ́ɔ i nyɛ dulunyanw fànʔafɔɔlɔ Fanʔafɔlɔ!
Woro wee wi tàmaga le ní wolo ní lè níì wolo kapeegèle yapwɔɔrɔ sánʔana wolo na wi sìsyaanw wolo báriga ni, 6#Yir 19:6; Tɛ̀ɛn 5:10 níì wolo kpéʔele fànnyɔɔgaa, gee ni wolo nyɛ lè wi Tóow Kolocɔlɔɔ sáriga-wòlobēle, woro wee na nìjangbɔɔri ní séekpɔɔw yɛlɛ lè làla o làla kwɔ́ɔmɔ fun! Amiina!
7 #
Dan 7:13; Mat 24:30; Mar 13:26; Luk 21:27; 1Tes 4:7; Zak 12:10; Zyan 19:34,37 Ye wéle, wi i maa ní fàfaanyi ní.
Nyapiigèle myɛ si a ba wi nyaa,
àlí bele pe da wi súu lè.
Tári syɛ̀ɛnnɛ myɛ a ba ra sùpiigèle wáa wi kéeli na.
Anbée ki a ba pye. Amiina.
8 #
Dan 7:13; 10:5 Kàfɔw Kolocɔlɔɔ wi gi joo níì jo: «Mii wee wi nyɛ lè, ní mii wee wi da pye yaà lè, ní mii wee wi maa lè, mii wi nyɛ Alifa ní Omega,#1:8 Alifa ní Omega: Alifa ní Omega i nyɛ Girɛkiire, ti kɔ́rɔw wi nyɛ Wozeliw ní Wozanw. mii wi lè Séew Myɛ Kàfɔlɔ.»
Kirisi n wiyɛɛ dɛ̀ɛn Zyan na
9Mii Zyan, wi nyɛ lè yele senyɛnw, níì pínɛ ní yele ní wɔʔɔli, ní fǎngi, ní kpàracogi na Zyezu kólogi ni, mii maa pye lǒgi nínge tára ni pe yiri lè Patimɔsi. Níì cán àmɛɛ mii da ni Kolocɔlɔɔ syɛ́ɛnri nyuu lè, ní i Zyezu séeraw kpéʔele lè, koro na pe da mii cò n tórigo nɛɛ bee. 10Pìicǎnni li da mii kàriga Kàfɔw canʔa na, a mii yákpogbɔɔlɔ lóʔo mii kàdoʔo ma àmɛɛ búru wìimɛ nyɛ lè, 11a li jo: «Gee mɔ nyaagi lè, ki sɛ́bɛ sɛ́bɛ ni mi tórigo Egilizibèle kɔrɔsiin ma be nyɛ lè Efɛzi, ní Simiirini, ní Pɛrigami, ní Tyatiiri, ní Saridi, ní Filadelifii ni n fàra Lawodise na.»
12A mii kàri n wéle jàngó mii í yákpoli wáafɔlɔ cán, woro wee wi da ni nyuu ní mii ní lè. Amɛɛ mii kàri n wéle lè, a mii fètindaʔagéle kɔrɔsiin nyaa, tɛɛ̀ wòʔolo, 13#Dan 7:13; 10:5 wàa si maa pye ge níngi ni, wi maa syɔɔn-pya wíri. Burodɔnɔgɔ maa pye wi na, fwɔɔ n baa nan yédefabiyi na, tɛɛ̀ sɛntiiri maa pye wi na wobwɔɔɔ ní fìcibigi ni. 14#Dan 7:9; 10:6 Wi nyúngi ní wi ǹjoori maa fílige àmɛɛ bàsiifiire nyɛ lè, wàlá àmɛɛ lànɛɛzyiw fílige lè. Wi nyapiigèle si i nyɛ àmɛɛ naanyìnge nyɛ lè. 15#Ezek 1:24; 43:2 Wi tɔ́lɔyi maa kanyɛɛnrɛ wíri dee be gbàla lè naakpɔʔɔ ni, a di nyɔɔ ni nyɛ́ʔɛnɛ, wi joomi si i nyɛ àmɛɛ lònɛʔɛgɛ tinmɛ nyɛ lè. 16Wi maa ŋɔripiigèlē kɔrɔsiin cò wi kàliige kɔ́gi ni, yɛɛyɛ siin ŋɔséetànʔa maa ni yirigi wi nyɔ́ɔgi ni, wi yɛ́ɛgi maa ni daragi àmɛɛ cânvulɛɛlɛ canʔa daragi lè. 17#Eza 44:6; 48:12; Tɛ̀ɛn 2:8; 22:13 Lǎli ni mii wi nyaa lè, a mii fala n too wi láari ni n pye àmɛɛ kpóo nyɛ lè. A wi wi kàliige kɔ́gi taʔa mii na níì jo: «Mɔ a kɔ́ ra fɛ̀ɛgí í! Mii wi nyɛ Yɛɛ̀kiniw ní Kàdotɔnw, 18mii wi nyɛ Woweew. Mii maa kùu, kàjáa wéle, mii ní i nyɛ sìi na làla o làla kwɔ́ɔmɔ fun. Mii má kùúw ní kúbèle tɛɛkòrogo làkilebéle nyɛ. 19Koro na kérigèle gele mɔ nyaa n kwɔ́ɔ lè, ní gele ge nyɛ lè tɔ́ɔliw ni, n fàra gele na ke a ba pye lè gele naa kàdoʔo ma, ke sɛ́bɛ. 20Ŋɔripiigèle kɔrɔsiin mɔ nyaa lè mii kàliige kɔ́gi ni, ní tɛ́ɛw fètindaʔagéle kɔrɔsiin ní, ke kalarali wéle lee, ŋɔripiigèle kɔrɔsiin i nyɛ Egilizibèle kɔrɔsiin tundunbéle, fètindaʔagèle kɔrɔsiin si i nyɛ Egilizibèle kɔrɔsiin.
Currently Selected:
Tɛ̀ɛnnɛ 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
