Tɛ̀ɛnnɛ 18
18
Babilɔni tooli kéele
1Gee bee kàdoʔo ma, a mii nyɛ̀ʔɛni tundunwaa nikwɔɔ nyaa a wi yiri nyɛ̀ʔɛni ni ni tíri, wi séew maa kpɔ́ʔɔ. A tári myɛ kàri gbɛ̀ɛnmɛ wi nìjanri darigala báriga ni. 2#Eza 13:21; 21:9; Zyer 50:39; 51:8; Tɛ̀ɛn 14:8 A wi i gi nyuu ní yákpogbɔɔlɔ ní níì jo:
«Ki n too, kèkpɔɔgi Babilɔni n too!
Ki n kàri màdebèle tɛɛkòrogo,
ki i nyɛ màdebeebèle féleye myɛ tɛɛlaraga,
ní wɔ́ɔ i nyɛ féjɛɛn-nɔ́nʔɔgèle féleye myɛ tɛɛlaraga,
gele ge syɛ́ɛnbèle bɛɛn lè.
3 #
Eza 23:17; Zyer 51:7 Níì cán syɛɛnfeleyi myɛ n gi kanɔnʔɔri fundanʔara
duvɛɛn gbaa.
Tári fànʔafɔɔlɔ n kanɔnʔɔri kpéʔele ní gi ní,
a tári jàgiwáabéle wɔ́ɔ̀ lɔnɛʔɛrɛ taa
gi kanɔnʔɔri láanitaʔa báriga ni.»
4 #
Eza 48:20; Zyer 50:8; 51:6,45 A mii níì yákpolaa nikwɔɔ lóʔo nyɛ̀ʔɛni ni, a li jo:
«Mii wóbèle, ye yiri gi ni,
koro ga pye yele a kɔ́ pínɛ ní gi ní ki kapeegèle na í,
wɔʔɔli si kɔ́ ba too yele na ní gi ní í.
5 #
Sél 18:20-21; Zyer 51:9 Níì cán ki kapeegèle n taani keyɛɛ na
fwɔɔ n sáà nan nyɛ̀ʔɛni na,
a Kolocɔlɔɔ sɔ̀ngi n taa ki kakolobyeri na.
6 #
Ŋún 137:8; Zyer 50:29 Kánmee na gi yele sàra lè,
ye gi sàra kánmi bee na,
yé gi kapyegèle tɛ́ɛyɛ siin lúrugo gi ma!
Yagbaalee ki da nyìn n kaan yele ma lè,
ye lee bee nyɛ́ngéle siin kaan gi ma.
7 #
Eza 47:7-9
Amɛɛ ki da ni kiyɛɛ gbɔ́ʔɔgi lè ní kérigèle kèle ní,
ní i gi nyɛnɛ yáriri myɛ taagi kánmee na lè,
kánmi bee na yele yɛlɛ yele í wɔʔɔli
ní kùúw káyaʔa cáan gi na!
Níì cán ki maa ni gi nyuu kiyɛɛ fúngi ni níì jo:
‹Wéle, mii i nyɛ fànʔafɔjaa,
mii o nyɛ lɔgucaa í,
mii a tée kùu káyaʔa cán í.›
8Gee bee na ki wɔʔɔyi a ba too gi na canʔa nibin fúngo ni,
yoro yi nyɛ kùúw, ní kùu káyaagi, ní kateekpɔɔgi,
náagi a ba gi sórigo kálagi.
Níì cán Kàfɔw Kolocɔlɔɔ fǎngi n nɛʔɛ,
woro wee wi a gi kútiiw joo ceri lè.»
9 #
Ezek 26:16-17
Tári fànʔafɔɔlɔ pe da ni kanɔnʔɔri kpéʔele ní gi ní lè, ní i pe nyɛnɛ yáriri myɛ taagi gi ni lè, pe ga baa gi sógili wírige nyaa lǎlee ni lè, pe a ra nyaan sáā sùpiigèle wáa gi kéeli na lǎli bee ni. 10Pe a canʔana yére léelige ki wɔʔɔli fyáara kéele na sáā gi nyuu si jo: «Wɔʔɔli, wɔʔɔli i nyɛ mɔ na, kèkpɔɔgi Babilɔni, mɔ wee wi da nìri lè nya! Ncan mɔ kútiiw n ceri lɛ́ɛri nibin nínge ni!»
11 #
Ezek 27:31,36 Tári jàgiwáabéle a ra nyaan, àmɛɛ gi kéeli be yáa be fúnyi ni lè, níì cán wàa faala ní o be jàgiw yárira syoo í. 12#Ezek 27:12-13,22 Pe jàgiw yárira di nyɛ tɛ́ɛw, ní wálifiiw, ní lɔgbanra kadɛɛngèle, ní lɔgbanri kɔ́nɔtiriye, ní lɛn fànifɛɛlɛfɛɛlɛw, ní fànʔafɔbèle fàninyɛɛɔn, ní lɔgbanri fànifiio, ní lɔgbanri fàninyɛɛnwaa, ní nùndaanni tíire féleye myɛ, ní yáriri myɛ féleye pe sámagi lè ní sogǎngèle ní, ní lɔgbanri tíire yárira féleye myɛ, ní kanyɛɛnri wóro, ní túnmɔri wóro, ní maribiri kàdɛnɛgi wóro, 13ní nùndaanni yasuuro be yiri lè kanɛli, ní episi, n fàra nùndaanni míige, ní miiri, ní làtikɔliw na, ní dùvɛɛnw, ní sǐnmi, ní búrumiigi, ní yaliiri, ní nǐyi, ní bǎbèle, ní syɔ́ɔnyi, ní wòtorobèle, ní púlobèle ní, àlí n fàra syɛ́ɛnbèle sìi na. 14A be gi yari: «Yáriree myɛ kéele li da tɔ̀nɔ n pye mɔ fúngi ni lè jàngó bi di taa, mɔ n bɔ̀nɔ ti myɛ ni, mɔ yanidaanmari ní mɔ lɔgbanri yárira myɛ n pùuni mɔ ma, syɔɔn a ní di nyaa nyáana í.» 15#Ezek 27:31,36 Yáriri bee párafɔɔlɔ pe da lɔ́ri taa lè gi ni, bele bee a canʔana yére léelige ki wɔʔɔli fyáara kéele na sáā nyaan àmɛɛ gi kéeli be yáa be fúnyi ni lè, 16si jo: «Wɔʔɔlɔ! Wɔʔɔlɔ i nyɛ kèkpɔɔgi na! Ki syɛ́ɛnbèle maa ni lɛn fànifɛɛlɛfɛɛlɛw nii n fàra fànʔafɔbèle fàninyɛɛɔn na, ní lɔgbanri fàninyɛɛɔn félegaa ní, ní i peyɛɛ vèré ní tɛ́ɛw ní n fàra lɔgbanri kàdɛɛngèlē ní lɔgbanri kɔ́nɔtiriye na. 17#Eza 23:14; Ezek 27:26-30 A lɔnɛʔɛri bee baa kálagi nya lɛ́ɛri nibin ni.»
Bàtofanbèle myɛ, ní bele myɛ be jǐn be ni lè, ní bele myɛ pe báara lè be ni n fàra bele myɛ na be báara lè sólomi lòkpɔʔɔ ni, a bele bee canʔana n yére léelige, 18#Ezek 27:32 ní i yákpogèle wáa àmɛɛ pe gi sógili wírige nyaa lè níì jo: «Kègìí gi nyɛ sèjira ní kèkpɔɔgi naa ní?» 19#Ezek 27:30-34 A be fala ni támiigi koli ni ŋuu peyɛɛ na nyǔnyi ni, àmɛɛ kayaagi nyɛ be ni lè ní i nyaan ni yákpogèle wáa níì jo: «Wɔʔɔlɔ! Wɔʔɔlɔ i nyɛ kèkpɔɔgi na, gee lɔnɛʔɛrɛ báriga ni bàtofanbèle myɛ da be lɔ́ri taa lè, á ki baa kálagi nya lɛ́ɛri nibin nínge ni.»
20 #
Làlw 32:43; Zyer 51:48 Nyɛ̀ʔɛni, ki n yɛlɛ maa fundaanra kpéʔele gi kálagili kéele na! Yele Kolocɔlɔɔ syɛɛncanbèle, ní pìitunbèle, ní kanyaajoobèle, ki n yɛlɛ yaa fundaanra kpéʔele! Níì cán Kolocɔlɔɔ n gi kútiiw joo n ceri n yɛlɛ ní kapeegèle ní gi kpéʔele yele na lè.»
21 #
Zyer 51:63-64; Ezek 26:21 Lǎli bee ni a mii nyɛ̀ʔɛni tundunwaa nyaa, wee fànʔa gi nɛʔɛ lè gbanʔama, a wi fala n kàdɛnɛgbɔʔɔ láa n yìrige ǹjogi ni, gee gi kpɔ́ʔɔ n yɛlɛ ní tírekpɔʔɔ ní lè, n sáà wáa sólomi lɔ̀ʔɔ ni níì jo: «Kánmi naa na pe a kèkpɔɔgi Babilɔni wáa fundanʔara na, syɔɔn a ní gi nyaa nyáana í. 22#Ezek 26:13; Eza 24:8 Pe a ní kɔ̀ríkpumɔnbéle, ní ŋùuvɔbéle, ní maawiibéle, wàlá búruwiibēle ŋuumɔ lóʔo mɔ ni nyáana í. Pe a ní faliwaa faala cánvɔlɔ nyaa mɔ ni í, pe a ní wɔ́ɔ tírekpɔʔɔ tíremɛ lóʔo mɔ ni í, #Zyer 7:34; 25:10 23fètinnɛ gbɛ̀ɛnmɛ a ní pye mɔ ni nyáana í, pe a ní cefɔɔn fɔ́lɔ, wàlá cefɔɔn yákpolo lóʔo mɔ ni nyáana í. Níì cán mɔ jagiwáabèle maa pye dulunyanw syɛɛnkpolobéle, mɔ maa ni syɛɛnfeleyi myɛ fáana ni pùuní ní mɔ dɛɛgi ní.»
24 #
Zyer 51:49
Níì cán pe n kanyaajoobèle ní syɛɛncanbèle sìsyaan nyaa Babilɔni ni n fàra bele myɛ wóo na, poro bele be kpóo lè dulunyanw ni.
Currently Selected:
Tɛ̀ɛnnɛ 18: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
