Tɛ̀ɛnnɛ 17
17
Nànjaa-cepeew kéele
1 #
Zyer 51:13
Nyɛ̀ʔɛni tundunbéle kɔrɔsiin pe da yalegèle kɔrɔsiin cò lè, a bele bee wàa pan mii ma n baa joo ní mii ní níì jo: «Nànjaa-cepeew wi tɛ́ɛn lònɛʔɛyi ǹjoʔo ni lè, kánmee na wi kútiiw a ba pye lè, da maa, mii a ba gee bee tɛ̀ɛn mɔ na. 2#Eza 23:17; Zyer 51:7 Tári fànʔafɔɔlɔ maa ni kanɔnʔɔri kpéʔele ní wi ní, a tári syɛ̀ɛnnɛ yɛ́ɛyɛ baa wɔ́ɔ be na wi kanɔnʔɔri dùvɛɛn gbaala kéele na.»
3 #
Tɛ̀ɛn 13:1
A wi mii láa pǐli kàbaan na n tórigo fìimɛ tára ma. A mii sáà cɔlɔɔ nyaa wodɛ́ɛɔn ní yaweenyɛnʔɛ na, Kolocɔlɔɔ mɛ́ɛkalagiri mɛ́ɛyɛ si maa pye gi na wozɛbɛyɛ ní n gi céri myɛ foro, nyùnyo kɔrɔsiin ní nyɛngéle kɛɛ si i nyɛ gi na. 4#Zyer 51:7 Céw bee maa fànʔafɔ-búrogo le n fàra fàninyɛɛɔn na, tɛɛ̀ vèʔebēle maa pye wi na, bele be nyɛ́ʔɛnɛ lè, n fàra lɔgbanra kadɛɛngèlē ní lɔgbanra kɔ́nɔtiriye na. A wi tɛɛ̀ yagbaala cò wi kɔ́gi ni, lee li nyìn lè Kolocɔlɔɔ kanibɛɛngèle, ní céw kanɔnʔɔrɔ yanɔnʔɔrɔ na. 5Mɛ́ʔɛ maa pye wi gbáali na wozɛbɛgɛ ní, gee gi nyɛ lè kalarala wóʔo, a gi jo: «Kèkpɔɔgi Babilɔni, nànjaacebèle ní dulunyanw kapeebyere nɔ́ɔ.» 6A mii céw bee nyaa a wi Kolocɔlɔɔ syɛɛncanbèle sìsyaan gbaa n fàra Zyezu séerafɔbèle wóo na, fwɔɔ a yɛ́ɛgi i wóo wi na àmɛɛ singbaadiɔn wóʔo nyɛ lè.
A mii ga wi nyaa, a mii i káama gi na gbanʔama. 7A nyɛ̀ʔɛni tunduɔn mii pye: «Nyàʔá na mɔ káama gi na? Wéle, mii a céw kalarala tɛ̀ɛn mɔ na, n fàra yaweegi wólo na, gee na wi tɛ́ɛn lè, koro gee gi nyɛ lè ní nyǔnyi kɔrɔsiin, ní nyɛ́ngèle kɛɛ ní. 8#Dan 7:7; Tɛ̀ɛn 11:7; Ŋún 69:29 Yaweegi bee mɔ nyaa lè, ki maa pye beè, ki si ní o nyɛ í. Ki a ba yìri bi yiri weecurugi ni bi kári kálagili ma. Tári syɛ̀ɛnnɛ be nyɛ lè pe mɛ́ɛyi ga sɛ́bɛ sìíw sɛ́bɛ ni í nlaa yaà dulunyanw sélimɛ na, bele bee ga baa yaweegi bee nyaa lǎlee ni lè, pe a ra káama gi na, níì cán ki maa pye beè, ki si ní o nyɛ í, ki si a ní ba nyaa.
9Wee wi cìlige lè, ki n yɛlɛ wi syɛ́ɛnri naa cán, nyǔnyi kɔrɔsiin i nyɛ nyanbeleye kɔrɔsiin yee na céw tɛ́ɛn lè. Yi wɔ́ɔ i nyɛ fànʔafɔɔlɔ kɔrɔsiin, 10pèle kagunɔ n too n kwɔ́ɔ, kɔrɔni wów si i nyɛ fǎngi na tɔ́ɔliw ni, wee si ga kɔ́ɔ̀ pan n kwɔ́ɔ í, wi ga pan, làla cɛɛri wi a ba kwɔ́ɔ yagana. 11Yaweegee ki da pye lè beè, ki si ní o nyɛ beè í, koro gi nyɛ fànʔafɔ-kɔrɔtaanri wów. Wi maa pye bele kɔrɔsiin ni, wi si i syée kálagili ma.
12 #
Dan 7:24
Nyɛ́ngèle kɛɛ mɔ nyaa lè, ke i nyɛ fànʔafɔɔlɔ kɛɛ, bele be lè pe ga kɔ́ɔ̀ tɛ́ɛn fǎngi na í, kàjáa pe si a ba tɛ́ɛn fǎngi na bi lɛ́ɛri nibin kwɔ́ɔ ní yaweegi ní. 13Pe i nyɛ fungo nibin na ní i be fǎngi, ní be séew kaangi yaweegi ma. 14Pe a sa kapɛɛnni kpúmɔn ní Bàpili ní, kàjáa Bàpili a be jáa, níì cán loro li nyɛ kàfɔbèle Kàfɔlɔ, ní wɔ́ɔ i nyɛ fànʔafɔbèle Fànʔafɔlɔ. Loro ní li pínɛnyɛnbèle be nyɛ lè Kolocɔlɔɔ syɛɛn-yeribèle, ní wi wonyɛnɛ-wòlobèle, ní tágala syɛ́ɛnbèle, poro a wɔ́ɔ fànʔa taa be na.»
15A wi níì mii pye: «Lǒyi mɔ nyaa lè, yee na nànjaacew tɛ́ɛn lè, yi i nyɛ dulunyanw syɛ̀ɛnnɛ, ní syɛɛnnɛʔɛmɛ, ní syɛɛnfeleyi, ní syɛɛnfeleri joofɔɔlɔ. 16Nyɛ́ngèle kɛɛ si mɔ nyaa lè, nànjaacew kéele a ba koro ní yaweegi pínɛ bi bɛɛn, pe a wi yáriri myɛ nɛnɛ syɔɔ wi ma, si wi yaʔa níbori, sáā wi céri káa, si wi sórigo náagi ni. 17Níì cán Kolocɔlɔɔ wi wi nyɛnɛ kéeli lége pe fúnyi ni jàngó pe bɛ̀ɛ nibin na, si be fǎngi kaan yaweegi ma fwɔɔ bi taa Kolocɔlɔɔ syɛ́ɛnri í ba foro.
18Céw si mɔ nyaa lè, woro wi nyɛ kèkpɔɔgi, gee gi tári fànʔafɔɔlɔ kàragí lè.»
Currently Selected:
Tɛ̀ɛnnɛ 17: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
