Tɛ̀ɛnnɛ 16
16
Kolocɔlɔɔ fundanʔari yalegéle kéele
1A mii yákpogbɔɔlɔ lóʔo kpɔ̀ʔɔrɔli kpaʔa ni, a li nyɛ̀ʔɛni tundunbéle kɔrɔsiin pye: «Yaa syée ye sa Kolocɔlɔɔ fundanʔari yalegéle kɔrɔsiin sòʔo ye wo tári na!»
2 #
Yir 9:10
A tundunzeliw kári n sáà wi yaleli sòʔo n wo tári na. Lǎli bee ni syɛ́ɛnbèle bele na yaweegi fɛ̀ɛ nyɛ lè, á be si i ki niwirigi kpɔ̀ʔɔrɔ́ lè, a namipeere fala n kúun bele bee na ni be yáa gbanʔama.
3A siin wów sáà wi yaleli sòʔo n le sólomi lɔ̀ʔɔ ni, a gi kàri mɔ a jo kpóō sìsyaan wii, yaweeri myɛ di pye lè sólomi lɔ̀ʔɔ ni, a di kùu.
4 #
Yir 7:17-21; Ŋún 78:44 A taanri wów wi yaleli sòʔo n le lókoloyi ní pùnweegèle ni, a lǒyi kàri sìsyaan. 5A mii gi lóʔo nyɛ̀ʔɛni tunduɔn ma, woro wee wi nyɛ lè lǒyi nyúngo na, a wi jo: «Mɔ n sín, mɔ wee wi nyɛ lè ní mɔ wee wi téè pye yaà lè, mɔ wi nyɛ Wojanw àmɛɛ mɔ kérigèle naa tímana lè. 6Níì cán pe n mɔ syɛɛncanbèle ní mɔ kanyaajoobèle sìsyaan wo, gee bee na mɔ sìsyaanw kaan be ma pe gbaa, ncan gee bee gi yɛlɛ be na.» 7A mii gi lóʔo sáriga-wòlo-yafaangi ma, a gi jo: «Ɛɛn, Kàfɔw Kolocɔlɔɔ, mɔ wi lè Séew Myɛ Kàfɔlɔ, mɔ kútiijoori di nyɛ kányɛɛgi wóro níì sín.»
8A nyɛ̀ʔɛni tundun-sicɛrɛ wóo wi yaleli sòʔo n wo cángi na, a gi fànʔa taa bàā syɛ́ɛnbèle sórogi ní gi náagi ní. 9A káfukpɔʔɔ fala ni syɛ́ɛnbèle sórogi, a be i Kolocɔlɔɔ mɛ́ɛgi kálagi, woro wee má wɔʔɔyi bee sée nyɛ lè, pe ga fɔ̀lɔ n kàdoʔo wáa pe kapeegèle ma sáā kpɔʔɔrɔ taari Kolocɔlɔɔ na í.
10 #
Yir 10:21
A kagunɔ wów wi yaleli sòʔo n wo yaweegi fàngolo na, a gi fǎngi tɛ́ɛyɛ myɛ kàri yébilimɛ. A syɛ́ɛnbèle i pe nyíngèle sànʔá àmɛɛ yáami be wɔʔɔ lè. 11A be i syɛɛnpeeri nyuu ni wáa nyɛ̀ʔɛni Kolocɔlɔɔ na pe yáami ní pe námiyi kéele na, pe si ga sèʔê kàdoʔo wáa pe nàʔabeemi ma í.
12 #
Eza 11:15
A kɔrɔni wów wi yaleli sòʔo n le cábikpɔɔgi ni, ki lè Ufurati. A gi lǒgi fala n waʔa koro ga pye bi tɛɛsɔ̀lɔgɔ kaan fànʔafɔbèle ma, pe yìri lè canʔafolomɔ ma. 13A mii màdebēle taanri nyaa, pe maa wósɔɔnbéle wíri, a wee yiri yacobeegi nyɔ́ɔ ni, á wee yiri yaweegi nyɔ́ɔ ni, á wee si yiri kanyaajoo-fáanaw nyɔ́ɔ ni. 14Màdebèle bee i nyɛ pìigēle, gele ge bìngaari kèlē kpéʔele lè, ke i syée sa dulunyanw fànʔafɔɔlɔ myɛ kpóʔoro pe sa kapɛɛnni kpúmɔn Séew Myɛ Kolocɔlɔɔ cângbɔɔgi canʔa na.
15 #
Mat 24:43-44; Luk 12:39-40; Tɛ̀ɛn 3:3 Ye wéle, mii i maa àmɛɛ kàyuuo nyɛ lè. Wee wi ga kòro lè nyɛ̀nɛ na ní i wi fànilew kɔ̀rɔsíi jàngó woro a kɔ́ ra nyaari níbori í, si pye fɛ̀ɛrɛ wóo ní syɛ́ɛnbèle nyɛ́nɛ na í, wee bee i nyɛ dùba pyà!
16 #
2Fàn 23:29; Zak 12:11 A ge sáà be kpóʔoro tɛɛgaa ni, gee be yiri lè Heburu-syɛ́ɛnri ni Harimagedɔn.
17A nyɛ̀ʔɛni tundun-kɔrɔsiin wóo wi yaleli sòʔo n nyáʔami káfalagi ni. A mii yákpogbɔɔlɔ lóʔo, lee li yìri lè fàngoli ma kpɔ̀ʔɔrɔli kpaʔa ni, a li jo: «Ki n kpéʔele n kwɔ́ɔ.» 18#Tɛ̀ɛn 8:5; 11:13,19 A nyɛ̀ʔɛni fala ni nyɛ́ʔɛnɛ, ní i tìngí, ní i folo ni kabagi, a tári cúngo gbanʔama, nlaa Kolocɔlɔɔ syɔɔn faan lè, tári ga kɔ́ɔ̀ cúngo kánmi bee pàa na í. 19#Eza 51:17 A kèkpɔɔgi fala n jaa tɛɛyɛ taanri, á syɛɛnfeleyi wozanya kèkpoloyo too. A Kolocɔlɔɔ sɔ̀ngi n taa kèkpɔɔgi kéele na, gi lè Babilɔni, níì wi fundanʔagbɔɔri dùvɛɛn kaan gi ma yagbaali ni ki gbaa. 20#Tɛ̀ɛn 6:14 A lǒgi nínge tátɛɛgéle myɛ kwɔ́ɔ, àlí wàa ga níì nyanbelegaa faala nyaa í. 21#Yir 9:23; Tɛ̀ɛn 11:19 A zěsolo-kùnguru-kpóloyo i yìrigí nyɛ̀ʔɛni na n ba ni tuun syɛ́ɛnbèle na, yi líbeganmi maa cúlobéle togoye siin-ziin kwɔ́ɔ. A syɛ́ɛnbèle i syɛɛnpeeri nyuu ni wáa Kolocɔlɔɔ na zěsolomi wɔʔɔgɔ kéele na, níì cán wɔʔɔgi bee n kpɔ́ʔɔ n caanri.
Currently Selected:
Tɛ̀ɛnnɛ 16: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
