Tɛ̀ɛnnɛ 15
15
Nyɛ̀ʔɛni tundunbéle ní wɔʔɔzanyi kéele
1A mii níì fɛ̀ɛwaa nikwɔɔ nyaa nyɛ̀ʔɛni ni, wi maa kpɔ́ʔɔ ní i nyɛ bìngaara wóo ní. Fɛ̀ɛ́w bee wi nyɛ nyɛ̀ʔɛni tundunbéle kɔrɔsiin, poro bele má wɔʔɔzanyi kɔrɔsiin nyɛ lè, yoro yi nyɛ wozanyi, níì cán yoro ní Kolocɔlɔɔ a ba wi fundanʔari kwɔ́ɔ.
2A mii lòkpɔʔɔ nyaa, ki maa pye àmɛɛ dùbale nyɛ lè, á be naà nyáʔami gi ni, bele be fànʔa taa lè yaweegi na, ní gi niwirigi, ní gi mɛ́ɛgi córomɔ na, a mii wɔ́ɔ̀ bele bee nyaa woyérebéle ní lòkpɔɔgi ǹjoʔo ni, gee gi nyɛ àmɛɛ dùbale nyɛ lè. Kolocɔlɔɔ kɔ̀ríbèle si i nyɛ be ma. 3#Yir 15:1 Mowizi wi lè Kolocɔlɔɔ falipyew, a be i wi ŋúnugi ŋúu n fàra Bàpili wóʔo na, níì jo:
«Kàfɔw Kolocɔlɔɔ,
mɔ wi lè Séew Myɛ Kàfɔlɔ,
mɔ kapyegèle n kpólo ní i nyɛ bìngaara woʔolo ní!
Mɔ kóloyi n sín ní i nyɛ kányɛʔɛ,
mɔ wi lè syɛɛnfeleyi myɛ Fànʔafɔlɔ!
4 #
Zyer 10:7; Ŋún 86:9 Kàfɔw, wìí wi nyɛ wee wi lè wi a ra fɛ̀ɛgí mɔ na í?
Ba wìí wi nyɛ wi a ra mɔ mɛ́ɛgi kpɔ́ʔɔgi í?
Níì cán mɔ nibin wi sín.
Syɛɛnfeleyi myɛ a ba ra mɔ kpɔ̀ʔɔrɔ́,
àmɛɛ mɔ mɔ kapyezingèle tɛ̀ɛn lè.»
5 #
Yir 38:21
Kérigèle bee nyaana kadoʔo ma, a mii kpɔ̀ʔɔrɔli tɛɛcànga fànikpaʔa nyaa ki lè séeraw kpéʔelele wóʔo, a be gi múgu nyɛ̀ʔɛni ni. 6A nyɛ̀ʔɛni tundunbéle kɔrɔsiin yiri kpɔ̀ʔɔrɔli kpaʔa ni, wɔʔɔyi kɔrɔsiin si i nyɛ be ma. Lɛn fànicàɔn búroyo maa pye be na, yee yi da ni nyɛ́ʔɛnɛ lè, tɛɛ̀ sɛntiiribéle si i nyɛ be na wobwɔɔbéle ní pe fìcibiyi ni. 7Sìi yáriyi sicɛrɛ ni, a kàa nibin fala n yalegéle kɔrɔsiin kaan nyɛ̀ʔɛni tundunbéle kɔrɔsiin ma, tɛɛ̀ wòʔolo, gele ge nyìn lè Kolocɔlɔɔ fundanʔari na, woro wee wi nyɛ lè sìi na làla o làla kwɔ́ɔmɔ fun. 8#Yir 40:34; 1Fàn 8:10-11; 2Cán 5:13-14; Eza 6:4 A kpɔ̀ʔɔrɔli kpaʔa fala n nyìn wírige na, Kolocɔlɔɔ nìjangbɔɔri ní wi séew kéele na, wàa faala da pye bi ní gbǎn jée kpɔ̀ʔɔrɔli kpaʔa ni í, fwɔɔ bi taa wɔʔɔgèle kɔrɔsiin ge nyɛ nyɛ̀ʔɛni tundunbéle kɔrɔsiin kɔ́yɔ ni lè, pe gele bee kpéʔele foro.
Currently Selected:
Tɛ̀ɛnnɛ 15: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
