Tɛ̀ɛnnɛ 14
14
Bele be syɔɔ lè poro ŋúnugi
1 #
Ezek 9:4; Tɛ̀ɛn 7:3 A mii wéle n Bàpili nyaa woyérele ní Siyɔn* nyanbelegi ǹjoʔo ni n fàra syɛ̀ɛnnɛ sirakamayɛ kɔrɔsiin ní selebingéle siin na, li mɛ́ɛgi ní li Tóow mɛ́ʔɛ maa pye wozɛbɛyɛ ní pe gbáagèle na. 2A mii kàfulogo lóʔo nyɛ̀ʔɛni na àmɛɛ lònɛʔɛgɛ tinmɛ nyɛ lè, ní àmɛɛ nyɛ̀ʔɛvōlolo tingbɔɔmɔ nyɛ lè. Kàfulogi mii da lóʔo lè, ki maa pye mɔ a jo kɔ̀ríkpumɔnbéle pe be kɔ̀ríbèle kpúmɔn. 3A be i ŋúnuvɔngɔ ŋúu fàngoli, ní sìi yáriyi sicɛrɛ, ní wolɛɛbèle yɛ́ʔɛ ma. Syɔɔn faala da pye bi gbǎn ŋúnugi bee tama bi cán í, kapye poro sirakamayi kɔrɔsiin ní selebingèle siin ban í, poro bele pe da syɔɔ lè tári na.
4Bele bee be nyɛ pe da peyɛɛ nɔ́nʔɔ ní càbala ní í, níì cán pe i nyɛ cekeele sìnján nànbēle, pe n taʔa Bàpili na ni syée ní li ní li tɛɛ̀káriyi myɛ ni. Pe n be syɔɔ n yirige syɛ́ɛnbèle nínge ni n kaan Kolocɔlɔɔ ní Bàpili ma àmɛɛ yasanzelide nyɛ lè, 5#Sof 3:13 jànvaa syɛ́ɛnrɛ si da yiri pe nyɔ́ɔyi ni nyáana í. Pe i nyɛ tɛɛlɛ fun.
Nyɛ̀ʔɛni tundunbéle taanri kéele
6A mii níì nyɛ̀ʔɛni tundunwaa nikwɔɔ nyaa wi i sɔ̀lɔ́ ǹjogi ni fókaanya na. Bàngwɔɔ Syɛɛnjóocànra maa pye wi ma bi joo tári syɛ̀ɛnnɛ ma, gee bee n jo, syɛɛnfeleyi myɛ, ní syɛɛnfeleyi yòdaʔaya myɛ, ní syɛɛnfeleri joofɔɔlɔ myɛ, ní dulunyanw syɛ̀ɛnnɛ myɛ ma. 7A wi i gi nyuu ni yákpoli wáa níì jo: «Yaa fɛ̀ɛgí Kolocɔlɔɔ na, yáā wi mɛ́ɛgi kpɔ́ʔɔgi, ncan wi kútiiw làrijerile n nan. Yaa wi kpɔ̀ʔɔrɔ́ woro wee wi nyɛ̀ʔɛni, ní tári, ní sólomi lɔ̀ʔɔ, ní lǒgi púloweegéle kpéʔele lè.»
8 #
Eza 21:9; Zyer 51:8; Tɛ̀ɛn 18:2 A nyɛ̀ʔɛni tundun-ziin wóo taʔa wozeliw na ní i gi nyuu níì jo: «Ki n too, Babilɔni n too, ki lè kèkpɔɔgi, koro gee gi syɛɛnfeleyi myɛ kaan lè a yi gi kanɔnʔɔbeeri fundanʔara duvɛɛn gbaa.»
9A nyɛ̀ʔɛni tundun-daanri wóo taʔa bele siin na ní i gi nyuu ní yákpogbɔɔlɔ ní níì jo: «Syɔ́ɔnwee faala ga ni yaweegi ní gi niwirigi kpɔ̀ʔɔrɔ́ lè, níì fɔ̀lɔ a be gi fɛ̀ɛ́w kpúmɔn wi gbáali na, wàlá wi kɔ́gi na, 10#Eza 51:17; Sél 19:24; Ezek 38:22 wee bee a wɔ́ɔ Kolocɔlɔɔ fundanʔari dùvɛɛn gbaa, wee wi sòʔo lè sìnnyaʔami ni wi fundanʔari yagbaala ni, wi a ra wɔʔɔ náagi ní dìrigíw ni, nyɛ̀ʔɛni tundunjanbéle ní Bàpili yɛ́ʔɛ ma. 11#Eza 34:10 Pe wɔʔɔli naà wírige i lúru ǹjogi ni làla o làla kwɔ́ɔmɔ fun, bele be yaweegi ní gi niwirigi kpɔ̀ʔɔrɔ́ lè, wàlá wee faala na gi mɛ́ɛgi fɛ̀ɛ nyɛ lè, ŋɔ́ndaala o nyɛ pe wàa ma í, canʔa ní yébilige.»
12Gee bee gi nyɛ Kolocɔlɔɔ syɛɛncanbèle kpàracogo kpéʔelele nyúngo, poro bele be Kolocɔlɔɔ tundunri kɔn ní i di kpéʔele lè, ní wɔ́ɔ i nyɛ tágala syɛɛnnɛ Zyezu ma.
13A mii yákpolo lóʔo nyɛ̀ʔɛni ni, a li mii pye: «Dee naa sɛ́bɛ: Bele be kúu lè Kàfɔw ni, nlaʔa lǎli naa na, bele bee i nyɛ dùba pìibēle!» A Pìicǎnni jo: «Ɛɛn, jàngó pe ŋɔ́n daa pe faligbanyi na, níì cán pe kapyegèle i taari be na.»
Tári yaliilaara
14 #
Dan 7:13
A mii wéle n fàfaanfiige nyaa, wàa si i nyɛ gi na wodɛ́ɛɔn ní wee wi syɔɔn-pya wíri lè. Fànʔafɔ-nyùndɔnnɔ maa pye wi nyúngi ni, tɛɛ̀ wólo, kɔnidanʔa si i nyɛ wi kɔ́gi ni. 15#Zyow 4:13 A nyɛ̀ʔɛni tundunwaa nikwɔɔ yiri kpɔ̀ʔɔrɔli kpaʔa ni n yákpogbɔɔlɔ wáa wee ma wi tɛ́ɛn lè fàfaangi na, níì wi pye: «Tári yaliire kɔni ní mɔ kɔ́nigi ní, níì cán ti làrilaali n nan àmɛɛ di lɛɛ lè.» 16Wee wi tɛ́ɛn lè fàfaangi na, a wi wi kɔ́nigi tɛ́ʔɛ n tári yaliire kɔni.
17A nyɛ̀ʔɛni tundunwaa nikwɔɔ níì yiri kpɔ̀ʔɔrɔli kpaʔa ni, gee gi nyɛ lè nyɛ̀ʔɛni ni. Kɔnidanʔa maa wɔ́ɔ̀ pye wee bee kɔ́lɔ ni.
18A nyɛ̀ʔɛni tundunwaa nikwɔɔ níì yìri sáriga-wòlo-yafaangi ma, woro wee wi nyɛ lè náagi nyúngo na, n baa joo ní yákpogbɔɔlɔ ní kɔnidaangi fɔ́lɔ ma níì wi pye: «Sa mɔ kɔnidaangi tɛ́ʔɛ mi tári ɛrɛzɛn tírire yasanra cɛnɛ mi kpóʔoro, níì cán ti ɛrɛzɛnw n lɛɛ n kwɔ́ɔ.» 19A nyɛ̀ʔɛni tunduɔn sáà wi kɔ́nigi tɛ́ʔɛ n tári ɛrɛzɛn cɛnɛ n kpóʔoro n cáan ɛrɛzɛnw tɛɛnùgugo ni, gee gi kpɔ́ʔɔ n yɛlɛ ní Kolocɔlɔɔ fundanʔari ní lè. 20#Eza 63:3; Kay 1:15; Tɛ̀ɛn 19:15 A be ɛrɛzɛnw tánʔana ɛrɛzɛnw tɛɛnùgugo ni kěgi kàdoʔo ma. A sìsyaan yiri ɛrɛzɛnw tɛɛnùgugo ni, n nɛʔɛ fwɔɔ n baa nan syɔ́ɔnyi gbǎdanbēle na, á wi tɛɛ̀foolaʔagi cúlobéle sirakele ní dabata kwɔ́ɔ.
Currently Selected:
Tɛ̀ɛnnɛ 14: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
