Tɛ̀ɛnnɛ 11

Séerafɔbèle siin kéele

1 # Ezek 40:3; Zak 2:5-6 A be nyɛnɛrɛ kàgaanna kaan mii ma lee li mɛ́tiri wíri lè, níì jo: «Yìri mi sa Kolocɔlɔɔ kpɔ̀ʔɔrɔli kpaʔa tímana, mi wɔ́ɔ sáriga-wòlo-yafaangi tímana, bele be Kolocɔlɔɔ kpɔ̀ʔɔrɔ́ yaà lè, mí poro córo. 2#Luk 21:24 Tɛ́ɛgee si gi nyɛ lè kpáagi yɛ́ʔɛ ma kàfugi na lè, ki ga yɛlɛ mɔ í tɛ́ɛgi bee tímana í, níì cán pe n gi kaan syɛɛnfeleyi wozanya ma yaa kècǎngi kàfalima táanri bi ba taa yeye togoye siin ní siin. 3Mii a fànʔa kaan mii séerafɔbèle siin ma paa kérigèle nyaagi paa nyuu bi ba taa canya saala kɔrɔni ní togoye taanri, gɔ̀nvaʔaya búroyo si pye be na.»

4 # Zak 4:3,11-14 Bele bee be nyɛ olivye tíiyi siin, ní fètindaʔagèle siin, gele ge nyɛ lè woyérigegéle ní tári Kàfɔlɔ yɛ́ʔɛ ma. 5Waa ga ni caa bi be wɔʔɔ, naà i yirigi pe nyɔ́ɔyi ni ni be nigoobèle sórogi ni kúu. Wàa ga jo bi be wɔʔɔ, ànbée gi yɛlɛ pe wi kpóo. 6#1Fàn 17:1; Yir 7:17-19; 1Sam 4:8 Fànʔa i nyɛ be ma bi gbǎn nyɛ̀ʔɛni tɔ́n, koro ga pye zàʔá a kɔ́ too pe kanyaajoori canya ni í, fànʔa wɔ́ɔ i nyɛ be ma bàā lǒyi kàragí sìsyaan, si wɔ́ɔ ra yapeeri féleye myɛ téeri da tári kpúmɔn tɔlɔyɔ saʔa bi yɛlɛ ní pe kínidɛnɛgi ní.

7 # Dan 7:7,21; Tɛ̀ɛn 13:5-7; 17:8 Lǎli ni pe ga be séeraw kpéʔele n kwɔ́ɔ lè, yaweegee gi yirigi weecurugi ni lè, gee bee a kapɛɛnni kpúmɔn ní be ní bi be jáa si be kpóo. 8#Eza 1:9-10 Pe kúceri si a kòro kèkpɔɔgi nínge kógbɔʔɔ ni, kěgee tiimaa ni pe be Kàfɔw kóri tiiparigi na lè. Pe i kěgi bee yiri kanmaa na Sodɔmi ní Ezyipiti. 9Dulunyanw syɛ̀ɛnnɛ, ní syɛɛnfeleyi yòdaʔaya, ní syɛɛnfeleri joofɔɔlɔ, ní dulunyanw syɛɛnfeleye a ra pe kúceri wéle bi taa canya taanri ní tíla, pe a fɔ̀lɔ wàa í di tɔ́n í. 10Tári syɛ̀ɛnnɛ a ra fundaanra kpéʔele be kéeli na, sáā muguri. Pe a ra kpɔʔɔrɔ tórogi peyɛɛ ma, níì cán kanyaajoobèle bee siin maa ni tári syɛ̀ɛnnɛ wɔʔɔ ni caanri.

11 # Ezek 37:10 A cányi taanri ní tíla ga sɔ̀lɔ, a Kolocɔlɔɔ wi sìíw ŋɔ́ngara le be ni, a be yìri n yére be tɔ́lɔyi na. A fyáakpɔɔrɔ fala n be nyaafɔbèle myɛ cò. 12#2Fàn 2:11 A be yákpogbɔɔlɔ lóʔo nyɛ̀ʔɛni ni, a li be pye: «Ye lúgu naa!» A be lúgu n kári nyɛ̀ʔɛni na fàfaangaa ni pe nigoobèle nyɛ́nɛ na. 13#Tɛ̀ɛn 6:12; 16:18 Lǎli bee ni a tári cúngo gbanʔama, a kěgi tílaya kɛɛ wóʔo too. A syɛ̀ɛnnɛ selebingéle taanri ní saala kagunɔ kùu tári cúngolo báriga ni, a fyáara syɛɛnsanbèle cò, a be Kolocɔlɔɔ mɛ́ɛgi kpɔ́ʔɔ wi lè nyɛ̀ʔɛni na.

14Wɔʔɔ ziin wóli n sɔ̀lɔ n kwɔ́ɔ. Wéle, cɛɛri ga pye taanri wóli a nan.

Búru kɔrɔsiin wów kéele

15 # Yir 15:18; Dan 2:44; 7:14,27 A nyɛ̀ʔɛni tundun-kɔrɔsiin wóo wi búruw wìi. A be yákpogbologéle wáa nyɛ̀ʔɛni ni níì jo:

«Dulunyanw fànʔa myɛ n kàri wolo Kàfɔw

ní wi Kirisiw wóʔo.

Wi si a kòro fǎngi na làla o làla kwɔ́ɔmɔ fun!»

16Wolɛɛbèle toko ní sicɛrɛ pe da tɛ́ɛn lè be fàngorigèle na Kolocɔlɔɔ yɛ́ʔɛ ma, a poro fala n too n be yɛ́ɛyi cíbele ní i Kolocɔlɔɔ kpɔ̀ʔɔrɔ́ 17níì jo:

«Wolo i bariga kaangi mɔ ma, Kàfɔw Kolocɔlɔɔ,

mɔ wi lè Séew Myɛ Kàfɔlɔ,

mɔ wee wi nyɛ lè beè tɔ́ɔliw ni,

ní wɔ́ɔ̀ pye yaà booma ni,

níì cán mɔ n mɔ séekpɔɔw láa n baa tɛ́ɛn mɔ fangi na.

18 # Ŋún 2:5; 110:5; 115:13 Syɛɛnfeleyi fúnyo maa tanʔa,

kàjáa mɔ fúngi làridanʔana si li nan,

lee ni mɔ a kúbèle kútii joo ceri lè,

mɔ púlobèle be nyɛ lè kanyaajoobèle,

ní mɔ syɛɛncanbèle,

n fàra bele na be fɛ̀ɛgí mɔ mɛ́ɛgi na lè,

poro làrizarali n nan,

bele be nyɛ lè woyilibèle n fàra wogbolobèle na,

bele si be tári kálagi lè,

á poro làrigbooli nan.»

19 # Tɛ̀ɛn 8:5; 16:18,21 A wàa Kolocɔlɔɔ kpɔ̀ʔɔrɔli kpaʔa múgu gi nyɛ lè nyɛ̀ʔɛni ni, a mii wi joogaanni kásu nyaa wi kpɔ̀ʔɔrɔli kpaʔa ni. A nyɛ̀ʔɛni fala ni nyɛ́ʔɛnɛ, ní i tìngí, ní i folo ni kabagi, a tári cúngo, a zěsolomɔ i tuun wogbolomɔ ní.

Currently Selected:

Tɛ̀ɛnnɛ 11: CB10

Highlight

Copy

Compare