Mariki 6

Nazarɛti syɛ́ɛnbèle ga tága Zyezu na í

(Mat 13:53-58; Luk 4:16-30)

1A Zyezu yiri nɛɛ bee n kári wi kàʔa ma. Wi pìitamabèle si maa pínɛ n kári ní wi ní. 2A cândɛnɛgi canʔa ga nan, a wi fala n sa ni syɛ́ɛnbèle tama Zyefubèle sérikpaʔa ni. A syɛ̀ɛnnɛ saʔa ga wi syɛ́ɛnri lóʔo a be i káama níì jo: «Sán wi dee naa myɛ tama? Nyàʔá sícili-vélege gi nyɛ gee naa? Sán wi fǎngi taa n gbàn ni kakpoloyi naa kpéʔele nya? 3Wee naa ban wi nyɛ minizye-nǎnw ì? Wi nɔ́ɔw ban wi nyɛ Marii ì? Zyaki, ní Zyozi, ní Zyudi,#6:3 Zyozi ní Zyudi: Pe wɔ́ɔ i Zyozi mɛ́ɛgi yiri Zyozɛfu, ní wɔ́ɔ i Zyudi mɛ́ɛgi yiri Zyudasi. ní Siimɔn ye ban be nyɛ wi cɔnɔbèle ì? Ba wi cɔnɔbèle be lè cébèle, poro o naa ní wolo ní ì?» A wi kéeli fala n be bɛɛn. 4#Zyan 4:44 A Zyezu be pye: «Syɔɔn faala o kanyaajooo faari í, kapye wi kàʔa wóbèle, ní wi senyɛnbèle, ní wi kpaʔa wóbèle ban í.»

5Wi ga gbàn n kakpoloyo saʔa kpéʔele yaà í, kapye wi kɔ́yi taʔa lè yáabèle pèle cɛɛri na a be pɔʔɔ lè í. 6A be sìndagali kéele tɔ̀nɔ n wi fúngi wɔ́ɔ.

Zyezu n pìitamabèle tun siin-ziin

(Mat 10:5-15; Luk 9:1-6)

A wi kári n sa ni syɛ́ɛnbèle tama ni máari kěyi ni. 7Wi si maa wi pìitamabèle kɛɛ ní siin yeri n tun siin-ziin, níì fǎngi kaan be ma a be màdebèle jáa. 8#Luk 10:4-11 Wi n be pye: «Yele ga ni syée yele a kɔ́ yarigaa láa da syée í, kapye kpèegēle yagana ban í. Yele a kɔ́ búru ní kùsɛɛ-kpàbibēle láa í. Yele a wɔ́ɔ kɔ́ wáli le cófaabèle ni í. 9Kàjáa ki n yɛlɛ ye taʔalaya le, yele si a kɔ́ buroyo siin-ziin le í.»

10A wi níì be pye: «Yele ga sáà jée kàʔa o kàʔa ni, á be yele lége kpáagee ni lè, ye kòro gee bee ni bi taa yele làrigárili í ba nan. 11#Kap 13:51 Kapye pe ga fɔ̀lɔ ni lúro yele ma tɛ́ɛgee ni lè í, ye yiri nɛɛ bee, yé cíbigi kóri ye láʔa yele taʔalayi na yé yi le. Gee bee a pye be ma séera.»

12A be kári n sa ni gi nyuu syɛ́ɛnbèle ma níì jo, ki n yɛlɛ be kàdoʔo wáa be kapeegèle ma. 13#Zya 5:14 A be màdebēle saʔa nɛnɛ n yirige syɛ́ɛnbèle ni, ní wɔ́ɔ̀ yaabèlē saʔa pɔ̀li ní sìnmɛ ní, a be pɔʔɔ.

Zyan Batisiti kùúw kéele

(Mat 14:1-12; Luk 9:7-9)

14 # Mat 16:14; Mar 8:28; Luk 9:19 A fànʔafɔw Herodi Zyezu kéeli lóʔo, níì cán wi mɛ́ɛgi maa léeli. A syɛ́ɛnbèle pèle jo: «Zyan Batisiti wi nyán n yiri kúbèle nínge ni, koro na wi fànʔa taa ni kakpoloyi bee kpéʔele.» 15A pèle jo: «Elii wii.» A pèle wɔ́ɔ̀ jo: «Wi i nyɛ kanyaajooo àmɛɛ kanyaajoobèle wozanbèlē nyɛ lè.» 16Amɛɛ si Herodi gee bee lóʔo lè, a wi jo: «Zyanwee nyúngo mii ceri lè, woro wi nyán n yiri kúbèle nínge ni.»

17 # Luk 3:19-20 Níì cán Herodi tiimaa wi da tun, a be sáà Zyan cò n pwɔɔ n sáà le kàsow ni wi cɔnɔw Filipi céw Herojadi kéeli na, woro wee wi da syɔɔ lè. 18Níì cán Zyan maa Herodi pye: «Ki da yɛlɛ mɔ í mɔ cɔnɔw cɔ́ɔ syɔɔ í.» 19A gee bee Herojadi bɛɛn, a wi i sɔ̀ngí bi Zyan kpóo. Wi fanʔa si ga taa í. 20Níì cán Herodi maa ni fɛ̀ɛgí Zyan na, àmɛɛ wi da gi cán lè ncan wi fúngi n nyɔɔ, a wi wɔ́ɔ̀ sín. Koro na wi da fɔ̀lɔ syɔɔn í kapeele tɛ́ʔɛ wi na í, wi maa tɔ̀nɔ ni Zyan syɛ́ɛnri lúro, a di i wi fúngi curugu. Koro ní ki myɛ ní wi maa ni di lúro ní fundaanra ní.

21Cangaa a Herodi ba ni wi canzeegi fɛ́tii kpéʔele, níì wi syɛɛnkpolobèle yeri ní sùlasiibèle kàfɔɔlɔ ní, n fàra Galile tári fɔ̀ɔlɔ na. 22A pe ga ba ni wi kpéʔele, Herojadi pìíw wi lè pìcaaw, a woro jée ni yóo be níngi ni. A wi yɔ́ɔganmi Herodi dɛ́nɛ ní wɔ́ɔ̀ syɛ́ɛnbèle dɛ́nɛ pe da pye yaà lè fɛ́tiiw na. A fànʔafɔw Herodi fala n pìcaaw pye: «Yárigee ga mɔ dɛ́nɛ lè, ki joo mii ma, mii a gi kaan mɔ ma.» 23A wi kàli n kaan wi ma níì jo: «Gee mɔ ga ni caa lè, mii a gi kaan mɔ ma, àlí ki ga yére mii í fǎngi tíla ní mɔ ní.» 24A wi yiri n sáà wi nafɔw yíbe níì jo: «Nyàʔá gi yɛlɛ mii í sa nyɛ́ɛri?» A nafɔw wi pye: «Da syée mi sa wi pye wi Zyan Batisiti nyúngi kaan mɔ ma.»

25A wi fala n kári n sáà fànʔafɔw pye: «Mii i caa mɔ í Zyan Batisiti nyúngi kaan mii ma tɔ́ɔliw ni gǒnaʔa ni.» 26A gi tɔ̀nɔ n fànʔafɔw bɛɛn gbanʔama, kàjáa wi da ni caa bi cée wi ma gi na í woro kàligi kéele, ní syɛ́ɛnbèle kéele na be pye yaà lè fɛ́tiiw na. 27Lǎli bee ni a wi fala n sùlasiiwaa yeri n tun níì jo wi sa Zyan nyúngi ceri waa maa, a wi kári n sáà gi ceri kàsokpaagi ni 28n le gǒnaagi ni n baa kaan pìcaaw ma. A pìcaaw sáà gi kaan wi nafɔw ma. 29Lǎli ni Zyan pìitamabèle gee bee lóʔo lè, a be kári n sáà wi láa n baa tɔ́n.

Zyezu n nànbēle selebingéle siin ní saala kagunɔ kaan a be lìi

(Mat 14:13-21; Luk 9:10-17; Zyan 6:1-14)

30A Zyezu pìitunbèle baa peyɛɛ gbóʔoro wi na, gee myɛ be sáà kpéʔele lè, ní àmɛɛ be syɛ́ɛnbèle tama lè, a be koro joo wi ma. 31A wi be pye: «Yaa maa wo kàri kɔlɔ̀ na wo sa ŋɔ́n wo daa cɛɛri.» Níì cán syɛ́ɛnbèle maa nɛʔɛ, bele i syée, bele si i maa, àlí làla ga taa Zyezu ní wi pìitamabèle ma be lìi í. 32Koro na be fala n jée kɔ́rɔw ni ni syée pe yagwɔɔlɔ fìími tára tɛ́ɛgaa ni. 33A syɛ̀ɛnnɛ saʔa ga be nyaa pe i syée, níì be wéle n cán, a be i yìrigí kěyi myɛ ma ni fé ni syée tɔlɔyɔ na n sáà be jèʔele yaà.

34 # Cór 27:17; 1Fàn 22:17; 2Cán 18:16; Ezek 34:5; Mat 9:36 Lǎli ni wi sáà yiri kɔ́rɔw ni lè, a wi syɛ́ɛnmi nyaa a bi nɛʔɛ n baa sɔ̀lɔ, a be nyínimi wi taa ncan pe maa pye àmɛɛ bànaʔaɔ fun bàala nyɛ lè. A wi séli ni be tama kèlē saʔa na.

35Lǎli ni cángi kɔ́ ni kwóo lè, a wi pìitamabèle nùuni wi na níì wi pye: «Mɔ nyɛ́nɛ i cángi na á gi kwɔ́ɔ, tɛ́ɛgi naa si i nyɛ fìimɛ tára. 36Ki n yɛlɛ mi syɛ́ɛnmi yaʔa bi sa jée kěyi, ní vǒyi ni, bi yaliire syɔɔ piyɛɛ kéeli na.» 37A Zyezu be yari: «Ye be kaan be lìi.» A be wi pye: «Wolo si tɔ̀ʔɔ́ kári lé sa selebingéle siin búru syɔɔ ba kaan be ma be lìi?» 38A wi be yari: «Búrubéle jòorí be yaà yele ma? Ye sa caa ye wéle.» A be sáà caa n wéle, ní baa wi pye: «Pe i nyɛ kagunɔ ní fàāla siin.»

39Lǎli bee ni a wi be pye be syɛ́ɛnmi myɛ télege kabiya kabiya nyàápungi ni. 40A be tɛ́ɛn kabiya kabiya, bele dabata-da, bele togoye siin ní kpɔrigɔ kpɔrigɔ. 41A wi búrubèle kagunɔ ní fábèle siin láa, níì wi yɛ́ɛgi yìrige n le nyɛ̀ʔɛni ni, níì bariga kaan Kolocɔlɔɔ ma. Koro kàdoʔo ma a wi búrubèle kabagi kabagi n kaan pìitamabèle ma níì jo be wi lɛɛ pe myɛ na. A wi wɔ́ɔ̀ fábèle siin lɛɛ be na. 42A pe myɛ lìi n tín. 43A be búru-kabagiri ní fákorobèle koli n le sɛ̀ʔɛgēle kɛɛ ní siin ni, a ge nyìn. 44Búruliibèle maa pye nànbēle selebingéle siin ní saala kagunɔ.

Zyezu n tánʔa lǒgi ǹjoʔo ni

(Mat 14:22-33; Zyan 6:15-21)

45Lǎli bee ni a Zyezu wi pìitamabèle kɔ́ri n lége kɔ́rɔw ni, níì jo paa syée woro yɛ́ʔɛ ma lǒgi jelige na Bɛtisayida ma, woro a syɛ́ɛnmi yaʔa. 46A wi ga syɛ́ɛnmi yaʔa n kwɔ́ɔ, a wi lúgu nyanbelegi na bi sa Kolocɔlɔɔ nyɛ́ɛri. 47Cânjeevɔngi na kɔ́rɔw maa pye lòkpɔɔgi nínge ni, Zyezu si i nyɛ tári na wi nibin. 48A wi be nyaa pe i fɔ̀rɔgí kɔ́rɔw waarila na, níì cán káfalagi maa ni be fàrá. Lǎli ni ki baa kòro lè cɛɛri gǒbèle si nyɛni, a Zyezu i táanri lǒgi ǹjoʔo ni ni syée be ma, ní i caa bi sɔ̀lɔ be na. 49A pe ga wi nyaa wi i táanri lǒgi ǹjoʔo ni, pe ga wi cán í, a be i gi sɔ̀ngí màdeo wii, níì fala ni yákpogèle wáa. 50Níì cán àmɛɛ pe myɛ wi nyaa lè, a be i fɛ̀ɛgí. A wi fala n be pye: «Ye yele fúnyi nyíngi, mii wii, ye a kɔ́ fyáa í.»

51Níì fala n jée kɔ́rɔw ni be kurugo, a káfalagi yére. A be i káama gi na gbanʔama. 52Níì cán pe da kɔ́ɔ̀ búruw kakpɔʔɔ kɔ́rɔ cán í, ncan be fúnyi maa tɔ́n.

Zyezu n yáabèle pɔʔɔ Zyenezarɛti tɛ́nɛmi ni

(Mat 14:34-36)

53A pe ga lǒgi jeli n nan Zyenezarɛti tɛ́nɛmi na a be yiri kɔ́rɔw ni. 54Lǎli ni be yiri lè kɔ́rɔw ni, a syɛ́ɛnbèle wi wéle n cán. 55A be i fé ni máari tɛ́nɛmi myɛ ni n sa ni yáabèle lée ní be yasinɛyi myɛ ní ni syée wi ma beè pe ga lóʔo wi i nyɛ lè. 56Tɛʔɛ o tɛʔɛ ni wi ga jée lè, kèpiigèle yoo, kèkpoloyi yoo, vǒyi yoo, pe n ni yáabèle lée ni téeri cédalayi na, ní i wi nyɛ́ɛri níì jo wi yáabèle yaʔa be tánga wi búrogi kàgomɔ yagana na. Bele myɛ be tánga wi na lè, a be pɔʔɔ.

Currently Selected:

Mariki 6: CB10

Highlight

Copy

Compare