Mariki 5
5
Zyezu n nànwaa pɔʔɔ, wee màdebēle da ni fɔ̀rɔgí lè
(Mat 8:28-34; Luk 8:26-39)
1A pe ga lòkpɔɔgi jeli a be nan Zyerasa#5:1 Zyerasa: Pe wɔ́ɔ i tári bee yiri Gadara. ye tári na. 2Lǎli ni Zyezu yiri lè kɔ́rɔw ni, a nànwaa yìri nyangbaaw ma n baa wi fàra, màdeo maa pye wi ni. 3Wi tɛɛ̀syɔɔngi ki da pye kɔ̀ɔnweeyi, àlí syɔɔn fánʔa da níì pye wi na bi gbǎn wi pwɔɔ yérige ní nyɔ̀ʔɔmɔ ní í. 4Níì cán pe maa kpɛ̀ʔɛlɛyɛ le wi na, ní wɔ́ɔ̀ wi pwɔɔ ní nyɔ̀ʔɔmɔ ní tɔlɔyɔ saʔa, a wi nyɔ̀ʔɔmi cɛnɛ ní wɔ́ɔ̀ kpɛ̀ʔɛlɛyi kabagi, syɔɔn fánʔa da níì pye wi na bi gbǎn wi fwɔɔgɔ í. 5Wi maa ni kòró kɔ̀ɔnweeyi ni, ní nyanbeleyi na canʔa ní yébilige, ní i yákpoli wáa làrigèle myɛ ni, ní i wiyɛɛ gɔnɔgi ní kàdɛnɛyi ní.
6A wi ga Zyezu wéle n nyaa léelige, a wi fala ni fé ni syée wi ma n sáà kpùmɔnɔ wi taana, 7níì yákpoli wáa gbanʔama níì jo: «Nyàʔá gi nyɛ mii ní mɔ níngi ní, Zyezu, mɔ wi lè wee Jáa wi lè Pe Myɛ Nyúngo na? Mii i mɔ nyɛ́ɛri kányɛʔɛ ni Kolocɔlɔɔ mɛ́ɛgi na, mɔ a tɔ́ɔ kɔ́ mii wɔʔɔ í.» 8Wi maa toro joo níì cán Zyezu maa wi pye: «Màdeo, yiri nǎnw ni.» 9A Zyezu wi yíbe níì jo: «Mɛ̀ɛ́ be mɔ yiri?» A wi wi yari: «Pe i mii yiri Nɛʔɛmɛ, níì cán wolo n nɛʔɛ.» 10A be fala n Zyezu nyɛ́ɛri gbanʔama níì jo wi a tɔ́ɔ kɔ́ poro nɛnɛ yirige tári bee ni í.
11Gbòyoonɛʔɛrɛ si maa pye yaà nyanbelege na ni líi, 12a màdebèle wi nyɛ́ɛri níì jo: «Wolo tórigo gbòyoori yaa ma wolo í sa jée di ni.» 13A Zyezu yére gi ni. A màdebèle fala n yiri nǎnw ni n sáà jée gbòyoori ni, a di fàn n tìgi terire nyanbelegi tìgimɛ ni n sáà too lòkpɔɔgi ni, a ti myɛ wáa yaà. Ti maa selebinnɛ félege kwɔ́ɔ.
14A di nàʔafɔbèle fàn n sáà gee bee jáari kèkpɔɔgi ni, ní gi taana kèpiigèle syɛ̀ɛnnɛ ma. A be yiri n kári sa gi wéle àmɛɛ gi kpéʔele n sɛ́ɛ lè. 15A pe ga sáà nan Zyezu na, a be màdebèle syɔ́ɔn nyaa a fúngi tɛ́ɛn wi na, a wi burogo le n tɛ́ɛn, woro wee ni màdenɛʔɛbèle da pye lè, a fyáari fala n be cò. 16A gi nyaafɔbèle i gi nyuu be ma àmɛɛ gi kpéʔele n sɛ́ɛ lè màdebèle syɔ́ɔn ní gbòyoori na. 17A be fala ni Zyezu nyɛ́ɛri níì jo wi yiri poro tɛ́nɛmi ni.
18A Zyezu ga ni jǐn kɔ́rɔw ni, nǎnwee ni màdebèle da pye lè, a woro wi nyɛ́ɛri níì jo woro a kári ní wi ní. 19Zyezu si ga yére gi ni í, kàjáa wi maa wi pye: «Da syée kpaʔa ma mi sa gi joo mɔ wóbèle ma gee Kàfɔw kpéʔele mɔ ma lè wi nyínimi báriga ni.» 20A wi kári n sa ni gi nyuu ni máari Dekapoli tɛ́nɛmi ni, gee Zyezu kpéʔele woro ma lè, a syɛ́ɛnbèle myɛ i káama gi na.
Zyayirusi pìíw kéele ní céw wi tánga Zyezu búrogi na lè
(Mat 9:18-26; Luk 8:40-56)
21A Zyezu ga níì lúru n jeli jeligi na kɔ́rɔw ni, a syɛɛnnɛʔɛmɛ piyɛɛ gbóʔoro wi na n wi yaʔa lòkpɔɔgi nyɔ́ɔ na. 22A Zyefubèle sérikpaʔa kafɔwaa pan wi ma, pe i wi yiri Zyayirusi. Lǎli ni wi Zyezu nyaa lè, a wi sáà kpùmɔnɔ wi taana, 23níì wi nyɛ́ɛri gbanʔama níì jo: «Mii pìíw wi lè pìcaapile, wi i yaà ni yáa ni caa bi kùu. Da maa mi ba kɔ́yi taʔa wi na jàngó wi pɔʔɔ bi pye sìi na.» 24A Zyezu i syée ní wi ní, a syɛɛnnɛʔɛmɛ taʔa wi na n wi cɔ̀ɔnri.
25Cewaa maa pye ní lòwelige ní, a gi kwɔ́ɔ wi na yɛ̀ʔɛlɛ kɛɛ ní siin. 26Wi maa tɔ̀nɔ n fɔ̀rɔ nìngbumɔnbèle saʔa kɔ́yɔ ni. Wi maa wi kɔlɔ̀ yáriri myɛ nyɔʔɔrɔ, wi ga téè pɔʔɔ í, a gi náà tanʔa. 27Wi si maa Zyezu kéeli lóʔo, a wi baa jée syɛ́ɛnmi ni ni syée wi kurugo n sáà tánga wi búrogi na. 28Níì cán wi maa gi tímana wi fúngi ni n jo: «Alí mii ga tánga wi búroyi yagana na mii a pɔʔɔ.» 29Lǎli ni wi tánga wi búrogi na lè, a sìsyaanw wolo fala n yére lǎli bee wonijanna ni, a wi gi cán wi céri na ncan woro yáami n kwɔ́ɔ. 30A Zyezu fala n gi cán wi fúngi ni ncan bárigawee wi nyɛ lè woro ni, wàa n yiri wi ni, a wi kàri n wéle níì jo: «Wìí wi tánga mii búroyi na?» 31A wi pìitamabèle wi pye: «Mɔ nyɛ́nɛ i syɛ́ɛnmi na àmɛɛ bi mɔ cɔ̀ɔnri lè, a mɔ náà jo lé: ‹Wìí wi tánga mii na?› » 32A wi i wéle ni máari koro ga pye woro í kéeli bee kpéʔelefɔlɔ cán. 33A fyáari fala n jée céw ni, a wi i cɛ̀lɛ́, níì cán wi n gi cán gee gi kpéʔele woro na lè, a wi kári n sáà kpùmɔnɔ Zyezu yɛ́ʔɛ ma, níì kányɛɛgi myɛ joo wi ma. 34A Zyezu wi pye: «Ni pyà, mɔ tágali n mɔ syɔɔ. Da syée yɛɛ̀nyinge na, mɔ yáami si kwɔ́ɔ láʔa mɔ na.»
35N sèʔê wi yaʔa jooli na, a syɛ́ɛnbèle pèle yìri sérikpaagi kàfɔlɔ kpaʔa ma n baa wi pye: «Mɔ piiw n kùu, nyàʔá na mɔ ní i Tamafɔw fɔ̀rɔgí?» 36Zyezu si ga be syɛ́ɛnri córo í, níì sérikpaagi kàfɔlɔ pye: «Mɔ a kɔ́ fyáa í, tɛ́nɛ mi tága.» 37Wi si ga fɔ̀lɔ syɔɔn faala í pínɛ kári ní woro ní í, fwɔɔ Pyɛri, ní Zyaki, ní Zyan wi lè Zyaki cɔnɔw. 38A be sáà nan sérikpaagi kàfɔlɔ kpaʔa na, a Zyezu syɛ́ɛnbèle nyaa pe i nyaan ni peele ni máari ní i yákpogèle wáa gbanʔama. 39A wi jée níì be pye: «Nyàʔá na yele nyaan ní i peele ni máari nya? Pìíw ga kùu í, a wi ŋúnɔ wii.»
40A be i peyɛɛ nyɛ́nɛ wi na. A wi pe myɛ yirige kàfugi na níì pìíw tóo ní wi nɔ́ɔw kɔ́ri n fàra bele na pe da pye lè ní woro ní, a be jée beè pìíw pye lè. 41A wi sáà pìíw cò kɔ́gi na níì wi pye: «Talita kumi,» ki kɔ́rɔw wi nyɛ: «Pìcaapile, mii n jo mɔ í yìri.»
42A pìcaapili fala n yìri ni táanri. Níì cán li maa yɛ̀ʔɛlɛ kɛɛ ní siin taa. A be i káama gi na gbanʔama. 43A Zyezu gi joo n gbàn be ma níì jo ki ga yɛlɛ pe gi yaʔa syɔɔn í gi cán í, níì be pye be pìíw kaan wi lìi.
Currently Selected:
Mariki 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
