Mariki 4
4
Yaliiwáaw kàseele
(Mat 13:1-9; Luk 8:4-8)
1 #
Luk 5:1-3
Zyezu maa níì séli ni syɛ́ɛnbèle tama lòkpɔɔgi nyɔ́ɔ na, a syɛɛnnɛʔɛmɛ piyɛɛ gbóʔoro wi na. Gee bee na wi da jée n tɛ́ɛn kɔ́rɔwaa ni lǒgi ni, á syɛ́ɛnmi yére lǒgi nyɔ́ɔ na. 2A wi i be tama kèlē saʔa ni ní kàseegéle ní, ní i gi nyuu be ma níì jo: 3«Ye lóʔo, yaliiwáaɔ maa kári sa yaliire wáa. 4A wi ga ni di wáa, a tàa too kólogi nyɔ́ɔ na, a féjɛɛngèle pan n baa di jɔ́ɔ. 5A tàa too fálaya tɛ́ʔɛ ni, tári si da nɛʔɛ yaà í. A di wárì fìin, níì cán tári da cùru í. 6A cángi ga yiri ni wáa, a di pábari, níì cán ti da nìnre taa í, a di waʔa. 7A tàa too wúuro tɛ́ʔɛ ni, a wúuri yìri n di cò, ti ga gbàn n san í. 8A dee too tácànra tɛ́ʔɛ ni, a toro fìin n baa tɔnɔ, ní baa san n taa, tàa toko ní kpɔrigɔ, tàa togoye taanri, tàa dabata.
9Líiweeloʔolo ga pye wee na lè wi líiyi cáan waa lúro.»
Kɔ́rɔwee na Zyezu nyuu kàseegéle ni lè
(Mat 13:10-17; Luk 8:9-10)
10Lǎli ni Zyezu léeli lè syɛ́ɛnmi na, bele be pye wi taana lè, a poro ní wi pìitamabèle kɛɛ ní siin wi yíbe kàseegèle kɔ́rɔ na. 11A wi be pye: «Kolocɔlɔɔ fǎngi kalaragēle cánna n kaan yele ma, kàjáa bele be lè pe o nyɛ ní wolo ní í, kérigèle myɛ i nyuu poro ma kàseegéle ni.
12 #
Eza 6:9-10
‹Koro ga pye paa gi wéle,
pe si a kɔ́ gi nyaa í.
Pe wɔ́ɔ ra gi lúro,
pe si a kɔ́ gi kɔ́rɔw cán í,
jàngó pe a kɔ́ kàri,
pe kapeegèle kùsulugo si syɔɔ í.› »
Zyezu n yaliiwáaw kàseele kɔ́rɔ tɛ̀ɛn
(Mat 13:18-28; Luk 8:11-15)
13A wi níì be pye: «Yele ga kàseeli naa kɔ́rɔ cán lé í? Mɛ̀ɛ́ si yele a gbǎn pye si wozangèle kɔ́rɔ cán? 14Yaliiree yaliiwáaw wáa lè, toro di nyɛ Kolocɔlɔɔ syɛ́ɛnri. 15Yaliiree di too kólogi nyɔ́ɔ na lè, koro gi nyɛ syɛ́ɛnbèle ga syɛ́ɛnri lóʔo, á di jée be ni, Sutanaw n pan terire n baa di yirige be ni. 16Dee di too lè fálagi tɛ́ʔɛ ni, koro gi nyɛ syɛ́ɛnbèle ga syɛ́ɛnri lóʔo níì di cò ní fundaanra ní, 17ti si ga nìnre wáa pe fúnyi ni í, ti n kòro be ni n làla cɛɛri kwɔ́ɔ. Funjurugori wàlá wɔʔɔli ga nan be na Kolocɔlɔɔ syɛ́ɛnri kéele na, gee bee n be kaan pe n lúru kàdoʔo ma. 18Dee si di too lè wúuri tɛ́ʔɛ ni, koro gi nyɛ syɛ́ɛnbèle ga syɛ́ɛnri lóʔo, 19á dulunyanw naa kasɔngugēle pan ní lɔ́ri fáanaga ní n fàra ki laànitaagi yárira na, dee bee n baa syɛ́ɛnri tɔ́n, koro n gi kaan ti n kòro tɔ̀nɔ fun. 20Dee si di too lè tácǎnri tɛ́ʔɛ ni, koro gi nyɛ syɛ́ɛnbèle ga syɛ́ɛnri lóʔo níì di cò, pe n ni sangi ni taagi, tàa toko ní kpɔrigɔ, tàa togoye taanri, tàa dabata.»
Fètinni kàseele
(Luk 8:16-18)
21 #
Mat 5:15; Luk 11:33 A wi be pye: «Syɔɔn ga fètinnɛ le, a gi yɛlɛ lé wi li tɔ́n sɛ̀ʔɛlɛ láara ni, koro ga jáa yasinɛgɛ láara ni? Yele ga cán wi ga li taʔa fètindaʔala na, koro gi pɔ́rɔ ì? 22#Mat 10:26; Luk 12:2 Yariga o yariga syɔɔn làriga lè, ki a ba kòro sìn-yiri ni kàfugo na í, kalaralaa faala a ba kòro sìnján ni í. 23Líiweeloʔolo ga pye wee na lè, wi líiyi cáan waa lúro.»
24 #
Mat 7:2; Luk 6:38 A wi níì be pye: «Dee mii a joo yele ma lè, ki n yɛlɛ ye di sámaga ye lóʔo. Yalegee ni yele yáriri kíri ni kaangi syɛ́ɛnbèle ma lè, gee bee félege ni pe a wɔ́ɔ ba yele wóri kíri kaan yele ma, kàa si a ba taʔa yele wógi na. 25#Mat 13:12; 25:29; Luk 19:26 Níì cán wee wi taa lè, pe a ní wi kaan taʔa. Wee si wi fɔ̀n lè, àlí cɛɛriwee wi nyɛ wi ma lè, pe a wee bee syɔɔ wi ma.»
Yaliiri kàseele àmɛɛ ti leegi tiyɛɛ ma lè
26A wi níì jo: «Kolocɔlɔɔ fǎngi i nyɛ àmɛɛ yaliire nyɛ lè, dee nànwaa lùgu lè seʔe ni. 27A wi i ŋúnɔ yoo, a wi kòro nyɛ̀nɛ na n yébiligi pínɛ cángi ni yoo, yaliiri a fìin sáā leegi, bi gi yaʔa wi ga gi cán àmɛɛ gi pingi ni sée lè í. 28Tári si di yaliiri kaan di i fíin, ní i tɔnɔgi bi ba puru, koro kàdoʔo ma ti n pye yaliire. 29#Zyow 4:13 Ti làrilaali ga nan, wi n kɔ́nigi láa n sa ni di kɔɔn, níì cán di làrilaali n nan.»
Mutaridi tíigi pìifalila kaseele
(Mat 13:31-32,34; Luk 13:18-19)
30A wi níì jo: «Nyàʔá ní wolo a gbǎn Kolocɔlɔɔ fǎngi tímana, wàlá ní nyàʔá kàseefelile ní wolo a gi kánmi joo tɛ̀ɛn? 31Ki i nyɛ àmɛɛ mutaridi tíige piifalila nyɛ lè, li n cɛ́rɛ n sɔ̀lɔ tári yaliire myɛ pìifalida na pe lúru lè tári ni. 32Pe ga li lùgu, li n fìin, ní i tɔnɔgi n baa kpɔ́ʔɔ n sɔ̀lɔ yaliiri fíinye myɛ na, níì kágangboloyo yirige, féjɛɛngèle n ba ni kòró yaà ki nyínmi ni.»
33Wi maa ni Kolocɔlɔɔ syɛ́ɛnri nyuu be ma ní kàseegèle bee féleye saʔa ní ni yɛlɛgi ní wi syɛɛnloʔobèle cánna ní. 34Wi da ni yarigaa nyuu syɛ́ɛnbèle ma kàseele kadoʔo na í. Koro kàdoʔo ma a wi ke myɛ kɔ́rɔ joo wi pìitamabèle ma kɔlɔ̀ na.
Zyezu n káfalakpɔʔɔ yérige
(Mat 8:23-27; Luk 8:22-25)
35Cángi bee cângwɔʔɔ nyɔ́ɔ na, a Zyezu be pye: «Ye tíi wo jeli lǒgi jelige na.»
36A be núngo syɛ́ɛnmi taana n sáà jée kɔ́rɔw ni Zyezu kurugo ni syée ní wi ní, kɔ́rɔbèle pèle maa fàra wi wojeew na. 37A káfalakpɔʔɔ sáà yìri, a lǒgi kùnguruyo i jǐn kɔ́rɔw ni, a kɔ́rɔw i caa bi nyìn. 38Zyezu si maa sínɛ n nyǔngi taʔa nyùndaʔaga na ni ŋúnɔ kɔ́rɔw fúngo ni kàdoʔo ma. A be wi yìrige, níì wi pye: «Tamafɔw, wolo a wáa lǒgi ni, gee bee ga tɔ̀ʔɔ̂ wári mɔ na wii ì?»
39A wi yìri ŋúnɔmi na níì fúlo káfalagi na níì lǒgi pye: «Yére.» A káfalagi yére, a lǒgi wɔ́ɔ̀ sámaga n yére. 40A wi be pye: «Nyàʔá na yele fɛ̀ɛgí? Yele ga sèʔé kɔ́ɔ̀ tága wii ì?»
41A be fyáa gbanʔama ní i gi nyuu peyɛɛ ma níì jo: «Nyàʔá syɛɛnfeleo wi wee naa, àlí káfalagi ní lòkpɔɔgi i lúro wi ma?»
Currently Selected:
Mariki 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
