Misye 2
2
Bele pe be fǎngi gbàngí ni sɔ̀lɔ́ lè
1 #
Ŋún 36:5
Wɔʔɔlɔ a pye bele na be sìnzinmi pyeganma sɔ̀ngí lè,
ní i kapeegi kpéʔeleganma tímana ni yaari n be yaʔa pe yasinɛyi na!
Nyǐngi ga tali, lǎli ni gi kpéʔeleli fànʔa ga pye be ma lè
pe n gi foro.
2Pe i nyabɛɛnnɛ kpéʔele seye kéele na,
ní i yi nɛnɛ ni syoo,
ní kpaaya kéele na, ní i yi syoo fànʔa na.
Pe i fǎngi gbàngí kànanbile ní li kpáagi na,
n wɔ́ɔ ni gi gbàngí nàɔn ní wi kɔ́rigi na.
3Gee bee na Yawe syɛ́ɛnri naa joo níì jo:
«Wéle, mii i wɔʔɔgɔ tímana narigi bee wòolo kánma na.
Yele a gbǎn yele yátiiyi yirige gi ni í.
Yele a gbǎn yele nyúnyi yìrige sáā táanri í,
níì cán wɔʔɔgɔ lala lii.»
4Cángi bee na, pe a kútii joo ceri yele na,
pe a ra funbɛɛnrɛ ŋúnugo ŋúu,
bàā gi nyuu si jo:
«Wolo n tɔ̀nɔ n kálagi péw!
Wi i mii syɛ́ɛnbèle lɛɛlɛ lee!
Ee! Wi i li syoo mii ma dɛ́!
Wi i wolo séyi kaangi niceeye ma!»
5Koro na mɔ a tée syɔɔn taa Yawe syɛɛnkpoʔolomi ni,
wee wi mɛɛnnɛ cáan tálɛɛlɛ na lè í.
Bele be kanyaajoow syɛ́ɛnrɛ kábala lè
6 #
Eza 30:9-14; Lev 18:24-28 Pe i gi nyuu níì jo:
«Ye joonɛʔɛgi yaʔa!
Joonɛʔɛgɛ a kɔ́ ra nyuu kánmi bee na í!
Tɛʔɛlɛyi a tée kwɔ́ɔ í!»
7Zyakɔbi kpáagi wòolo,
kánmi bee na lé yele nyuu?
A Yawe fúngi tanʔama dɛ́nɛ lé?
Kánmi bee na lé wi gi kpéʔele?
Wee wi táanri ní sínnɛ ní lè,
mii syɛ́ɛnri a kacànna pye wee bee na ì?
8Nlaa yaà làridɔɔnnɔ ni,
pe n yére nigooro na#2:8 pe n yére nigooro na: Syɛ́ɛnri naa a wɔ́ɔ gbǎn jo, mii syɛ́ɛnbèle n yìri n yére nigooro na. n mii syɛ́ɛnbèle sige,
bele be yìri kapɛɛnni ma n lúru ni sɔ̀lɔ́ yɛɛ̀nyinge na lè,
yele i burogboloyi wóo be na ni láari yaleree na.
9Yele i mii syɛ́ɛnbèle càbala nɛnɛ ni yirigi
pe kpaanidaanmayi ni,
nìjanri mii taʔa be pìíbèle na lè
yele i di láari be na ki kòro nya làla o làla.
10Ye yìri, yaa syée!
Níì cán tári naa o nyɛ ŋɔ́ndaala tɛ́ʔɛ í.
Ti nɔ́nʔɔri kéele na ti a pan ní wɔʔɔyɔ ní,
yi a pye wɔʔɔbeeye.
11Ki n yɛlɛ nànwaa í da nyuu da wáa káfalagi kurugo,
bàā jànvaaw nyuu si jo:
«Mii a joo mɔ ma dùvɛɛnw ní singbǎnmi kéele na!»
Joonɛʔɛgɛfɔw bee félege wi a tɔ̀nɔ́ yɛlɛ syɛ́ɛnbèle naa na!
Isirayɛli wóbèle pe a kòro sìi na lè Kolocɔlɔɔ a be kpóʔoro
12Ee Zyakɔbi, mii a tɔ̀nɔ́ mɔ wobow myɛ kpóʔoro!
Mii a Isirayɛli wogorobèle kpóʔoro,
mii a be kpóʔoro àmɛɛ bàkpaʔa baala nyɛ lè,
ní àmɛɛ yaweere gboolo nyɛ lè yaweenaʔa-tɛ́ʔɛ ni.
Syɔɔn ye kàfulogo a pye yaà.
13Wee wi wéegi kúunri lè wi i lúru ni syée be yɛ́ɛgi na.
Pe i wéegi kúunri ni sɔ̀lɔ́ ni yirigi gi ni.
Pe fànʔafɔw i syée be yɛ́ɛgi na,
Yawe si i nyɛ pe nyúngi na.
Currently Selected:
Misye 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
