Misye 3
3
Kùndigibèle sàmina kéele
1Mii n jo:
«Ye lóʔo Zyakɔbi kùndigibèle,
ní Isirayɛli kpáagi fànʔafɔbiigéle,
yele má ban gi nyɛ bi kútiisinw cán ì?
2Kacǎnni n yele bɛɛn,
á yele tàmaga le ní kapeegi ní.
Yele i be sáliyi wóo,
ní i kaapiremi láari kaceleyi na.
3Pe i mii syɛ́ɛnbèle cére káa,
pe i be césaliyi láʔala,
ní i be kaceleyi kabagi.
Pe i be cɔ̀nʔɔ́ àmɛɛ yarigaa nyɛ,
gee be soori nɛ̀ʔɛdaʔaga ni lè,
ní àmɛɛ kaara nyɛ kòdɔɔlɔ ni lè.»
4Lǎli bee ni,
pe a ra yákpogèle wáa Yawe kurugo,
kàjáa wi a lóʔo be ma í.
Wi a wi yɛ́ɛgi làriga be na
lǎli bee ni.
Níì cán pe n kapeeye kpéʔele.
Joogbanna kanyaajoobèle kánma na pe Isirayɛli ye fáana ni pùuní lè
5Yawe wi syɛ́ɛnri naa joo kanyaajoobèle kéele na,
poro bele be mii syɛ́ɛnbèle fáana ni pùuní lè,
pe gǎngèle ga yarigaa taa bàā sànʔá,
pe n ni yɛɛ̀nyingi kéele nyuu,
wee ga pye wi ga yarigaa le pe nyɔ́ɔyi ni lè í,
pe n ni kapɛɛnni kéele nyuu ni wáa wee bee na.
6Gee bee kéele na yébiligi a wɔ́ɔ yele ma.
Yanyaʔa si a ní nyaa í!
Yébilimɛ a pye yele ma,
yele a ní da kérigèle wéle bàā nyuu í!
Cángi a jée kanyaajoobèle bee ma,
gbɛ̀ɛ́nmi a pye yébilimɛ be na.
7Nyaafɔbèle a curugo,
fɛ̀ɛrɛ a cɛ́lɛfɔbèle taa,
pe myɛ a kɔ́yi tɔ́n pe nyɔ́ɔyi na.
Níì cán Kolocɔlɔɔ a ra syɛɛnlurugoro kaangi í.
8Kàjáa mii na,
mii n nyìn fǎngi na Yawe pǐli báriga ni,
tànʔa ní lòmaana i nyɛ mii ma
jàngó bi Zyakɔbi kakologi tɛ̀ɛn
wi na,
bi Isirayɛli kapeeli tɛ̀ɛn wi na.
Misye i Zyerusalɛmi kálagili kéele nyuu ni yaari
9Koro na ki n yɛlɛ ye dee naa lóʔo,
yele Zyakɔbi kpáagi kùndigibéle,
yele Isirayɛli kpáagi fànʔafɔbiigéle,
yele bele ye kútiisinw kàragí lè yanɔnʔɔgɔ,
yele bele ye námaraw kpéʔele kútiisinw myɛ ni lè.
10Yele bele ye Siyɔn faanri ní sìsyaanwori ní lè,
ní i Zyerusalɛmi faanri ní péemi ní lè.
11Wi kùndigibèle i kútiiw nyuu námara kpɔ́ʔɔri kéele na
wi sáriga-wòlobèle i syɛ́ɛnbèle tama sàra na,
wi kanyaajoobèle i kérigèle nyuu ni yaari wáli na.
A be si peyɛɛ zígi Yawe na ní i gi nyuu níì jo:
«Yawe o nyɛ wolo níngi ni ì?
Wɔʔɔgi a nan wolo na í.»
12 #
Zyer 26:18
Koro na, yele kéeli na Siyɔn a tɔ̀nɔ́ fála àmɛɛ seʔe nyɛ lè.
Zyerusalɛmi a pye kàdɛnɛgboolo,
kpɔ̀ʔɔrɔli kpaʔa nyanbelege si pye dǎndamaga,
gee kɔligɔ tɔ́n lè.
Currently Selected:
Misye 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
