Misye 1
1
1 #
2Fàn 15:32—16:20; 18:1—20:21; 2Cán 27:1-7; 28:1—32:33 Yawe syɛ́ɛnri di nan Misye na lè wi lè Moresyɛti ye wów, Zyuda fànʔafɔbèle be lè Yotami, ní Akazi, ní Ezekyasi, poro lǎli ni. Yanyaʔa, Samarii ní Zyerusalɛmi kéeli na.
Yawe n tìgi wi syɛ́ɛnbèle na
2Yele syɛɛnfeleyi myɛ, ye lóʔo!
Líiyi cáan tári, n fàra yáriree na di nyɛ mɔ na lè!
Ki n yɛlɛ Kàfɔw Yawe í pye séera yele kánmi na,
Kàfɔw wi yìri wi kpɔ̀ʔɔrɔli kpaacanga ma ni maa lè!
3Níì cán Yawe i yirigi wee wi tɛɛkòrogi ni,
wi i tíri, wi i táanri tári dǎndamaya na.
4Nyanbeleyi i pegi ni tíri
wi láari ni,
jǐnlɔyi i wòʔorí àmɛɛ sékuro nyɛ naà yɛ́ʔɛ ma lè,
ní àmɛɛ lɔ̀ʔɔ fóo ni tíri tɛɛkòlo-dìgige na lè.
5Koro myɛ si n taa Zyakɔbi kapeegi kéele na,
Isirayɛli kpáagi wòolo kapeegéle kéele na!
Zyakɔbi kapeegi gi nyɛ gìí?
Koro ban gi nyɛ Samarii ì?
Zyuda sáriga-wòlo-tɛ́ɛyi yi nyɛ yìí?
Yoro ban yi nyɛ Zyerusalɛmi ì?
6Mii a Samarii kàriga kàdɛnɛgbooro séʔe,
gi pye ɛrɛzɛn tírire tɛɛ̀cɔ́rɔgɔ.
Mii a wi kàdɛnɛri fàari bi wáa jǐnlɔgi ni,
mii a wi kàpɔɔnbèle múgu yaʔa.
7Wi ǹdedanyi myɛ a tɔ́nʔɔnɔ,
wi sàranɔnʔɔw myɛ a sórigo
náagi ni,
mii a wi yasunyi myɛ cɔ̀nʔɔ cɔ̀nʔɔ,
yoro yee wi taa lè nànjaari sàra báriga ni,
yi a ní lúru pye nànjaara sàra.
Wɔʔɔli n nan Zyerusalɛmi na
8Gee bee na mii a ra nyaan,
mii a ra nyaan bàā peele,
mii a ra táanri taʔalaya fun, ní cepyá,
mii a ra yákpoli wáa àmɛɛ gbàʔa nyɛ lè,
bàā cɛ́ɛn àmɛɛ sòʔolobèle nyɛ lè.
9Níì cán wi námigi i nyɛ naminaa-sìnbɔʔɔgɔ,
ki n cariga fwɔɔ n sáà nan
Zyuda na.
Ki n nan mii syɛ́ɛnbèle kpàánweele na
fwɔɔ n sáà nan Zyerusalɛmi na.
10 #
2Sam 1:20
Yele a kɔ́ gi jáari Gati#1:10 Gati: Ki kɔ́rɔw wi nyɛ jáarila. ni í,
yele a kɔ́ nyɛni Ako#1:10 Ako: Ki kɔ́rɔw wi nyɛ nyɛnigɛ. ni í!
Da kòlogí támiigi ni,
Bɛti-Leyafira#1:10 Bɛti-Leyafira: Ki kɔ́rɔw wi nyɛ támiigi kpaʔa. ni.
11Da sɔ̀lɔ́ Syafiiri#1:11 Syafiiri: Ki kɔ́rɔw wi nyɛ yacanga. ye cɔ́ɔ,
níbori ní fɛ̀ɛrɛ wóo ní!
Saanan#1:11 Saanan: Ki kɔ́rɔw wi nyɛ yirile. ye céw ga fɔ̀lɔ bi yiri í.
Bɛti-Yayesɛli#1:11 Bɛti-Yayesɛli: Ki kɔ́rɔw wi nyɛ dɛ̀ɛmɛnɛ kpaʔa. kùu káyaagi n yele kún ki dɛ̀ɛmɛni na.
12Marɔti#1:12 Marɔti: Ki kɔ́rɔw wi nyɛ fungo wɔʔɔgɔ. ye céw i cɛ̀lɛ́,
wi i caa woro í kacànna taa,
níì cán wɔʔɔli n yìri Yawe ma
n tìgi fwɔɔ n baa nan Zyerusalɛmi kpàánweeli na.
13Lakiisyi#1:13 Lakiisyi: Ki kɔ́rɔw wi nyɛ wòtorow pwɔɔlɔ syɔ́ɔnyi na. ye céw,
wòtorow pwɔɔ syɔ́ɔnyi na,
mɔ wi pye kapeeli sélimɛ,
calipili Siyɔn ma,
níì cán mɔ ni Isirayɛli kapeeyi nyaa.
14Koro na mɔ a wàli Moresyɛti-Gati#1:14 Moresyɛti-Gati: Ki kɔ́rɔw wi nyɛ kɔrigɔ. na.
Akizibi#1:14 Akizibi: Ki kɔ́rɔw wi nyɛ jànváala. kpáayi a Isirayɛli fànʔafɔbèle jànváa.
15Mii a ní pan ní wàa ní,
wee wi a ba mɔ jáa lè,
Maresya#1:15 Maresya: Ki kɔ́rɔw wi nyɛ jáala. ye céw,
Isirayɛli nìjanri a kári
sa nan fwɔɔ Adulami na.
16Mɔ njoori kɔ́nɔgi,
nyùnjɛɛli kpoori mɔ piinidaanmabèle kéele na!
Ki n yɛlɛ mi tɔ̀nɔ mi miyɛɛ kàriga nyùngbowaala fɔ́lɔ àmɛɛ kàcɔʔɔgɔ nyɛ lè,
níì cán pe a be cò bi kári púlori na bi léeli mɔ na.
Currently Selected:
Misye 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
