Zyonasi 4
4
Zyonasi i gi tama gee na Kolocɔlɔɔ nyinimɛ taa Niniivi ye na lè
1A Zyonasi gee bee córo kapeʔe, a wi wi fúngi tanʔa. 2#Yir 34:6 A wi Yawe nyɛ́ɛri níì jo: «Ee Yawe, koro ban mii da ni nyuu lǎli ni mii sèʔê pye yaà lè mii tári ni ì? Koro yɛ́ʔɛ mii da ni ceri, koro na mii da ni fé ni syée Tarisiisi ma. Níì cán mii maa gi cán mɔ i nyɛ Kolocɔlɔwaa, wee wi nyɔɔgi syɔɔn na lè, ní wɔ́ɔ i nyinimɛ taagi, mɔ fúngi o taanri kelekele í, mɔ nyínimi n nɛʔɛ, mɔ i mɔ sɔngumi láari kapeʔe pyele na. 3#1Fàn 19:4 Tɔ́ɔliw ni, Yawe, mii sìíw kwɔ́ɔ nya, níì cán mii í kùu, koro n pɔ́rɔ mii ma n sɔ̀lɔ mii í kòro sìi na.» 4A Yawe wi yari: «A tànʔa i nyɛ lé mɔ ma mɔ í mɔ fúngi tanʔa?»
5A Zyonasi yiri kěgi ni n sáà tɛ́ɛn kěgi canʔafolomɔ kabangi na. A wi kpáala kpúmɔn yaà beè n tɛ́ɛn loro láari ni, nyínmi ni, jàngó bi gi nyaa gee ki a ba pye kěgi ni lè. 6A Yawe Kolocɔlɔɔ kpotirige yaʔa a gi fìin yaà, a gi tɔnɔ n pye Zyonasi ǹjogi ni, koro ga pye ki nyínmɛ lége wi nyúngi ni, bi wi fúngi wɔʔɔgɔ kwɔ́ɔ. A kpotirigi bee kéele Zyonasi dɛ́nɛ gbanʔama. 7Kàjáa koro nyǐndaligi nyǐnjerige na, a Kolocɔlɔɔ fyɛɛnpiige yaʔa a ki baa jée kpotirigi ni n gi káa, a gi waʔa. 8Lǎli ni cángi folo lè, a Kolocɔlɔɔ káfalaga yaʔa a gi yìri canʔafolomɔ ma, gee gi sórogi lè. A cángi i Zyonasi kóri gbanʔama nyǔngi ni. A wi bárigaw myɛ kwɔ́ɔ. A wi wiyɛɛ kùúw kéele nyɛ́ɛri, níì jo: «Mii í kùu, koro n pɔ́rɔ mii ma n sɔ̀lɔ mii í kòro sìi na.» 9A Kolocɔlɔɔ Zyonasi pye: «A tànʔa i nyɛ lé mɔ ma mɔ í mɔ fúngi tanʔa kpotirigi naa kéele na?» A wi wi yari: «Ɛɛn, tànʔa tɔ̀nɔ́ i nyɛ mii ma mii í mii fúngi tanʔa fwɔɔ bi sa nan kùúw na.» 10A Yawe jo: «Mɔ mɔ nyaa lè, kpotirigi naa nyínimɛ n mɔ taa, bi gi taa mɔ ga fɔ̀rɔgɔ faala pye gi kéeli na í, mɔ ban wi gi lɛɛ í, ki n fìin yébilige nibin ni, ní wɔ́ɔ̀ kùu yébilige nibin ni. 11A mii, mii da yɛlɛ bi nyinimɛ taa Niniivi na ì, ki lè kèkpɔɔgi, gee ni syɛ́ɛnmi nyɛ, bee bi sɔ̀lɔ sirakamayɛ kɔrɔni na lè ì, poro bele be lè pe ga be kàliiyi cán n wàli be kàmɔnbèle na í, a yaweenɛʔɛrɛ wɔ́ɔ i nyɛ gi ni?»
Currently Selected:
Zyonasi 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
