Zyaki 2
2
Yele a kɔ́ ra syɔɔnwaa yirigi wàa ni í
1Ni senyɛ̀nnɛ, yele bele ye tága lè wolo Kàfɔw Zyezu Kirisi na, woro wee má nìjangbɔɔri nyɛ lè, ki ga yɛlɛ yele í da wi kólogi táanri sáā syɔɔnwaa yirigi wàa ni í. 2Kapye syɛ̀ɛnnɛ siin n baa jée yele sérikpaagi ni, á wàa wiyɛɛ vère ní fànicàɔn ní níì tɛɛ̀ vèʔeo le wi kabeli na, wee si i nyɛ foomɔfɔlɔ níì burobɛɛrɛ le, 3wee wi fànicǎnw le lè, yele ga woro kpɔ́ʔɔ wi lɔ́ri kéele na níì wi pye: «Ba tɛ́ɛn tɛɛ̀tɛ́nɛjǎngi naa ni,» ní si foomɔfɔw pye: «Yére nɛɛ bee,» wàlá: «Ba tɛ́ɛn nɛɛ naa tári na mii tɔ́lɔyi taana,» 4gee bee ban gi nyɛ yele i pèle yirigi pèle ni ì? Ba yele ga gi cán yele n yeyɛɛ gbéʔele àmɛɛ kútiijoobéle nyɛ lè wii ì? Yele sɔ̀nguri bee ga nyɔɔ í.
5Mii senyɛn-nidaanmabèle, ye lóʔo, yele ga tɔ̀ʔɔ̂ gi cán ncan bele dulunyanw syɛ̀ɛnnɛ córo lè foomɔfɔbèle, bele bee Kolocɔlɔɔ nyɛ́nɛ n wòlo n kpéʔele yarigaa fɔ̀ɔlɔ woro ma tágali kólogo ni ì? Nyɛ̀ʔɛni fànʔa si pye pe woʔò, gee wi joo wi a kaan bele má be tàmaga le ní woro ní lè ì? 6A yele si i foomɔfɔbèle faari! Lɔ́ri fɔ̀ɔlɔ ban be fǎngi cáan yele na, ní i yele kɔ́ri ni syée n sa ni kaangi kútiijoobèle ma ì? 7Mɛ́ɛcǎngi gi nyɛ yele na lè, poro ban be gee bee kálagi ì?
8 #
Lev 19:18
Kolocɔlɔɔ fǎngi làlwa syɛ́ɛnrɛ di nyɛ lè wi syɛɛnsɛbɛri ni, dee di joo lè: «Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè,» kapye yele i gee bee kpéʔele, gee bee n nyɔɔ. 9Kàjáa kapye yele i pèle yirigi pèle ni, yele i nyɛ kapeebyebèlē. Ki n yɛlɛ ye gi cán Kolocɔlɔɔ làlwaw n too yele na, wi i yele córo woro làlwaw céefɔɔlɔ. 10Níì cán syɔɔn ga wíre ni Kolocɔlɔɔ làlwaw kèlē myɛ kpéʔele ní si li làa nibin yaʔa, wi n kolo ke myɛ na. 11#Yir 20:13-14; Làlw 5:17-18 Wee wi gi joo lè níì jo: «Mɔ a kɔ́ kanɔnʔɔrɔ kpéʔele í,» woro wonijanw wi wɔ́ɔ̀ gi joo níì jo: «Mɔ a kɔ́ syɔɔn kpóo í.» Ki si ga wírè pye mɔ o kanɔnʔɔrɔ kpéʔele í, ní si i nyɛ syɛɛnkpóō, lǎli bee ni mɔ sèʔé i nyɛ Kolocɔlɔɔ làlwaw céefɔlɔ. 12Koro na yaa yele nyɔɔsyɛɛnri ní yele kapyegèle kɔ̀rɔsíi, níì cán Kolocɔlɔɔ a ba yele kútiiw joo bi yɛlɛ ní wi làlwaw ní, wee wi wɔ́rɔdi kaangi wo ma lè, 13níì cán syɔ́ɔnwee wi nyɛ lè wi o nyinimɛ taagi wi syɛɛnnyɛnbèle na í, Kolocɔlɔɔ a wɔ́ɔ ba nyinimɛ taa wee bee na wi kútiiw làrijoolo ni í. Wee wi nyinimɛ taagi syɛ́ɛnbèle na lè, wee bee a ní da fɛ̀ɛgí Kolocɔlɔɔ kútiiw kéele na í.
Tágali ní kapyegèle kéele
14Ni senyɛ̀nnɛ, syɔɔnwaa ga joo tágali i nyɛ woro ma, bi gi taa wi kapyegèle o wi tágali tèé í, nyàʔá gee bee a nyɔɔ? A tágali bee félege a gbǎn wi syɔɔ lé? 15Kapye wo senyɛnwaa i yaà yele níngi ni, a wi i nyɛ nàɔn yoo, cɔlɔɔ yoo, burogo si o nyɛ wi ma í, wi yaliiri si wɔ́ɔ o taagi wi na í, 16á yele wàa wi pye: «Ee, ki n yɛlɛ mi sa burogo taa mi le, mí wɔ́ɔ yaliire taa mi lìi,» mɔ si ga yarigaa kaan wi ma gee ki a wi màkow nyɔɔ lè í, nyàʔá gee bee a nyɔɔ wi na? 17Anbée si syɔɔn tágali wɔ́ɔ̄ nyɛ, kapye wi kapyegèle o wi tágali tèé í, wi tágali i nyɛ yakuugo.
18Wàa a wɔ́ɔ gbǎn gi joo wee ma wi joo lè tágali i nyɛ woro ma, si wi pye: «Mɔ n joo tágali i nyɛ mɔ ma, mii si na, kapyegèle i nyɛ mii ma. Mi mɔ tágali tɛ̀ɛn mii na kapyegèle fun ni, mii si a mii wóli tɛ̀ɛn mɔ na mii kapyegèle báriga ni.» 19Mɔ n tága gi na ncan Kolocɔlɔɔ nibin wi yaà, gee bee n nyɔɔ. Màdebèle si n wɔ́ɔ̀ tága gee bee na, fwɔɔ a koro be kaan pe i cɛ̀lɛ́. 20Mɔ kanaa-sìnjáɔn, a mɔ i caa lé mii í náa gi joo tɛ̀ɛn mɔ na mɔ í gi cán, tágali ga pye syɔɔn ma kapyegèle fun ni, li i nyɛ gbanzan? 21#Sél 22:1-14 Wolo tóolɛɛw Abirahami kapyegèle ban ge wi yaʔa a Kolocɔlɔɔ wi córo syɛɛnsiɔn ì, àmɛɛ wi da wi jáaw Izaaki kaan lè, Kolocɔlɔɔ ma sáriga sáriga-wòlo-yafaangi na lè ì? 22Mɔ n gi nyaa àmɛɛ wi tágali ní wi kapyegèle da pínɛ ni báara lè, a wi kapyegèle wi tágali kaan a li foro. 23#Sél 15:6; 2Cán 20:7; Eza 41:8 Koro na syɛ́ɛnree di sɛ́bɛ lè Kolocɔlɔɔ syɛɛnsɛbɛri ni, ti n foro, àmɛɛ di joo lè níì jo: «Abirahami n tága Kolocɔlɔɔ na, a koro gi kaan a Kolocɔlɔɔ wi córo syɛɛnsiɔn,» ní i wi yiri woro tàannyɛnnɛ. 24Yele n gi nyaa syɔɔn kapyegèle ge wi yaʔa Kolocɔlɔɔ i wi córo syɛɛnsiɔn, wi tágali yagana kéele na ban í.
25 #
Zyoz 2:1-21
Arahabi wi da wírè pye lè nànjaacew, kánmi bee wonijanma na ban wi da wɔ́ɔ̀ sínni taa kapyegèle báriga ni ì, àmɛɛ wi da baa tundunbèle yaʔa a be tìrige woro na lè, ní kɔ́ɔ̀ be dɛ̀ɛmɛ a be lúru n kári kologaa nikwɔɔ ni? 26Amɛɛ gi nyɛ lè, syɔɔn pili ga yiri wi ni, wi n kùu, ànbée si gi wɔ́ɔ̄ nyɛ, tágali ga pye kapyegèle fun ni, li i nyɛ yakuugo.
Currently Selected:
Zyaki 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
