Zyaki 1
1
Fòów kéele
1 #
Mat 13:55; Mar 6:3; Kap 15:13; Gal 1:19 Mii Zyaki wi nyɛ lè Kolocɔlɔɔ púlo ní wɔ́ɔ i nyɛ Kàfɔw Zyezu Kirisi wóo, mii a sɛ́bɛw naa tórigo yele ma, yele bele ye nyɛ lè Isirayɛli syɛɛnfeleyi kɛɛ ní siin yodaʔaya níì cariga dulunyanw tɛ́ɛyɛ myɛ ni lè, mii i yele syáanri!
Tágali ní sícilimi kéele
2Ni senyɛ̀nnɛ, kagbanyee myɛ féleye yi tuun yele na lè, ki n yɛlɛ yaa fundaanra kpéʔele gbanʔama, 3àmɛɛ yele gi cán lè ncan kagbanyee yi tuun yele na lè ni yele tágali sɛʔɛ ni wéle, yele i kpàracogi tama yee bee báriga ni. 4Ki si n yɛlɛ yaa kpàracogo kpéʔele kérigèle myɛ ni làla o làla, koro ga pye yele í nyɔɔ foro si pye tɛɛlɛ fun, yarigaa faala a kɔ́ yele fɔ̀n í. 5Kapye sícilimɛ n fɔ̀n yele wàa ma, ki n yɛlɛ wi bi nyɛ́ɛri Kolocɔlɔɔ ma, wi a bi kaan wi ma, níì cán woro wi syɛ́ɛnbèle myɛ kaangi saʔa, wi si o fúlo wi nyɛ́ɛrifɔbèle na í. 6Kàjáa ki n yɛlɛ wi bi nyɛ́ɛri ní tágala ní, ki ga yɛlɛ waa wiyɛɛ gábala wi fúngi ni nyáana í. Níì cán syɔ́ɔnwee wi nyɛ́ɛri ní kàkabalaga ní lè, wi i nyɛ àmɛɛ sólomi lòkpɔʔɔ kunguruyo nyɛ lè, yee káfalagi gáā lée ni wáa lè kàbanyi myɛ na. 7Ki ga yɛlɛ syɔ́ɔnw bee félege í kɔ́ ra sɔ̀ngí woro a yarigaa taa Kàfɔw ma í, 8funyo siin fɔ́lɔ wi nyɛ, ní wɔ́ɔ i wiyɛɛ gábala wi kapyegèle myɛ ni.
Fóomi ní lɔ́ri
9Kapye wolo senyɛnwaa i nyɛ fóomi ni á Kolocɔlɔɔ wi kpɔ́ʔɔ, ki n yɛlɛ waa fundaanra kpéʔele gee bee na. 10#Eza 40:6-7 Wolo senyɛnwaa ga wɔ́ɔ̀ pye lɔrɔfɔlɔ á Kolocɔlɔɔ wi cɛ́rɛ, ki n yɛlɛ waa fundaanra kpéʔele gee bee na. Níì cán lɔrɔfɔw kwɔ́ɔganma a ba pye àmɛɛ nyàáfyɛɛnri nyɛ lè. 11Cángi ga yiri ni wáa gbanʔama, ki káfugbangi n nyàági kaan ki n fána. Nyàáfyɛɛnri n wɔ́ɔ̀ kɔlɔ n wo, ti nìjanri n fala n kwɔ́ɔ. Kánmi bee na lɔrɔfɔlɔ a ba kwɔ́ɔ bi yiri wi lɔ́ri caala ni.
Kagbanyi ní lɛ́ɛlɛgi kéele
12Syɔ́ɔnwee wi kòro ni kpàracogo kpéʔele lè kagbanyi ni, wee bee i nyɛ dùba pyà. Níì cán àmɛɛ yi wi sɛʔɛ n wéle lè á wi fànʔa taa yi na, wi a kpɔ́ʔɔri nyùndɔnnɔ taa li lè sìíw wólo, lee Kolocɔlɔɔ joo wi a kaan bele má be tàmaga le ní woro ní lè. 13Keelaa ga ni syɔɔn kárima bi lége kapeele ni, ki ga yɛlɛ wi kɔ jo Kolocɔlɔɔ wi woro kárima í. Níì cán yarigaa faala a gbǎn Kolocɔlɔɔ kárima wi kapeele kpéʔele í, woro tiimaa si wɔ́ɔ o syɔɔn kárima wi kapeele kpéʔele í. 14Kàjáa gee gi syɔɔn kárima ni légi kapeele ni lè, koro gi nyɛ wi tiimaa fundaagi, àmɛɛ gi wi kíle ní i wi lɛ́ɛlɛ ni có lè. 15Syɔɔn fundaagi n si baa ficɛnnɛ taa bi kapeele see. Kapeebyeri ga baa foro, ti n kùu see. 16Mii senyɛn-nidaanmabèle, ki ga yɛlɛ yaa yeyɛɛ váana í, 17ki n yɛlɛ ye gi cán yakaanree myɛ di nyɛ lè wojanra ní, ní kpɔ́ʔɔree di nyɔɔ n foro lè, toro myɛ i yìrigí Kolocɔlɔɔ ma, woro wee wi gbɛ̀ɛ́nmi yárira myɛ kpéʔele lè,#1:17 wee wi gbɛ̀ɛ́nmi yárira myɛ kpéʔele lè: Syɛ́ɛnri naa n sɛ́bɛ Girɛkiiri ni n jo: «Gbɛ̀ɛ́nmi Tofɔlɔ,» ki kɔ́rɔw si wi nyɛ wee wi gbɛ̀ɛ́nmi yárira myɛ kpéʔele lè ti lè nyɛ̀ʔɛni na. ti lè nyɛ̀ʔɛni na, woro wee wi wɔ́ɔ̄ nyɛ lè wi o fɛ̀ɛ́ í, wi si wɔ́ɔ o kàragí àmɛɛ nyínmi nyɛ lè í. 18Wi n wolo séli n see kavɔn kányɛɛgi syɛ́ɛnrɛ báriga ni, wi n gee bee kpéʔele n yɛlɛ ní wi tiimaa kínidɛnɛgi ní, koro ga pye wolo í pye wozelibèle woro ma wi yafaanri myɛ nínge ni.
Kolocɔlɔɔ syɛ́ɛnri lóʔolo ní di kpéʔeleli kéele
19Mii senyɛn-nidaanmabèle, ye gi cán ki n yɛlɛ syɔɔn o syɔɔn í wári wi líiyi cáan bàā lúro, wi si a wári kɔ́ ra nyuu í, wi fúngi si a wári kɔ́ ra taanri í, 20níì cán syɔɔn fundanʔari a gbǎn Kolocɔlɔɔ kasingèle foro í. 21Gee bee na gi yɛlɛ ye láʔa nɔ́nʔɔri kèlē myɛ na si wɔ́ɔ láʔa kanaa-sìnzinri myɛ na yele kpéʔele lè, syɛ́ɛnree Kolocɔlɔɔ le yele fúnyi ni àmɛɛ lùguro nyɛ lè, ki n yɛlɛ ye dee bee cò ní funjànya ní, toro dee ti a gbǎn yele pìígèle syɔɔ lè.
22Gee Kolocɔlɔɔ syɛ́ɛnri joo lè, ki n yɛlɛ yele í da gee bee kpéʔele, ki ga yɛlɛ yele í pye ti lóʔofɔbèle yagana sáā yeyɛɛ váana í. 23Níì cán syɔ́ɔnwee wi Kolocɔlɔɔ syɛ́ɛnri lúro lè wi si o gi kpéʔele àmɛɛ di joo lè í, wee bee i nyɛ àmɛɛ syɔɔnwaa nyɛ lè wee wi wiyɛɛ wéle lè dùbale ni, 24lǎli ni wi ga wiyɛɛ wéle n kwɔ́ɔ lè, wi n sɔ̀lɔ n fala ní wɔ́ɔ̀ fɛ̀ʔɛ terire wiyɛɛ kánmi na. 25Kàjáa Kolocɔlɔɔ làlwaw wi foro lè ní i wɔ́rɔdi kaangi wo ma, syɔ́ɔnwee ga ni wee bee sɛʔɛ ni wéle lè ní kɔ̀rɔsíi ní, níì kòro gee bee na ni kpéʔele ní lòmaana ní, Kolocɔlɔɔ a dùbaw taʔa wee bee na wi kérigèle myɛ ni wi kpéʔele lè, níì cán wi o nyɛ làlwaw bee syɛ́ɛnrɛ lóʔofɔlɔ ní i fɛ̀ʔɛ́ di na í, kàjáa wi i táanri ni yɛlɛgi ní di ní.
26Wàa ga ni wiyɛɛ zɔ̀ngí n jo woro i nyɛ Kolocɔlɔɔ kôdanʔaɔ, wi si o wi nyɔɔsyɛɛnri kɔ̀rɔsíi í, syɔ́ɔnw bee i wiyɛɛ váana, wi Kolocɔlɔɔ kôdanʔari i nyɛ gbanzan. 27Wee wi Kolocɔlɔɔ kólogi táanri ni síngi lè kolomɔ fun wolo Tóow Kolocɔlɔɔ ma, woro wi nyɛ wee wi syée lè n sa ni círibèle ní lɔgucebèle wéle ní i be dɛ̀ɛmɛ́ pe fɔ̀rɔyi kèlē na, ní wɔ́ɔ i wiyɛɛ kɔ̀rɔsíi péemi kèlē na ge nyɛ lè dulunyanw ni.
Currently Selected:
Zyaki 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
