Zyaki 3
3
Nyínni kéele
1Ni senyɛ̀nnɛ, ki ga yɛlɛ yele saamaw í kɔ́ yeyɛɛ bye tamafɔɔlɔ í, níì cán yele n gi cán, wolo bele wo syɛ́ɛnbèle tama lè, wolo kútiiw a ba gbàn bi sɔ̀lɔ wozanbèle wóo na. 2Wo myɛ i pùuní kánmi féleye saʔa na. Syɔ́ɔnwee wi ga pye lè wi o nyuu ni tuun keelaa faala ni í, wee bee i nyɛ tɛɛlɛ fun syɔ́ɔn, ní wɔ́ɔ̀ wiyɛɛ cǒmi cán kánmi myɛ na. 3Wolo i kàrafeebèle nii syɔ́ɔnyi nyɔ́ɔyɔ ni jàngó yaa lúro wolo ma, lǎli bee ni a wolo gbàn ni yi woboyi kàragí yi i syée wolo nyɛ́nɛ tɛ́ɛyi ni. 4Ye wɔ́ɔ ye kɔ́rɔkpoloyi#3:4 kɔ́rɔkpoloyi: Kɔ́rɔkpoloyi bee yi da pye booma batobèle, yee káfalagi da ni ŋɔrɔgi ni syée lè, pe si i yi kàragí ní kɔ́rɔbiniyi ní. kéele wéle àmɛɛ yi kpólo lè gbanʔama, á káfalakpoloyi si i yi kaangi a yi i syée kelekele, koro ní ki myɛ ní àmɛɛ kɔ́rɔbiniyi wírē nyɛ lè wobiipiigéle ní, a yi fànvɔbèle sèʔê gbàn ni gele bee téeri ni yi kàragí ni tórogi kàbangee faala na be caa yaa syée lè. 5Anbée si nyínni wɔ́ɔ̄ nyɛ céri tɛ́ɛlaa, lee li cɛ́rɛ lè, níì gbàn ni joogbɔɔmi nyuu.
Ye wéle àmɛɛ naàpiipiile a wɔ́ɔ gbǎn kɔlikpɔʔɔ kaan gi cò bàā sóori lè! 6Nyínni wɔ́ɔ i nyɛ àmɛɛ naà nyɛ lè, loro ni péemi myɛ taagi, pi nyɛ lè dulunyanw ni, li i nyɛ wolo céri tɛ́ɛlaa, a wolo céri myɛ i taagi li péemi na, nlaa pe syɔɔn see lè, kérigèle myɛ wi kpéʔele lè wi sìíw canya ni, loro li náagi nii gele bee na, náagi bee i nyɛ tɛɛwɔʔɔgi wóʔo, gee Sutanaw le li na lè. 7Syɔɔn n fànʔa taa yaweeri féleye myɛ na ni di fwɔɔgi, ti lè tɔlɔyɔ sicɛrɛ-jɛrɛ wóri, ní féjɛɛnri, ní dee ní di fulolo lè, n fàra lǒgi fúngo wóro na, ànbée ki da ni kpéʔele nlaa yaà ki sélimi na. 8Kàjáa gee gi nyínni kéele kwɔ́ɔ lè, syɔɔn faala o beè wee wi kɔ́ɔ̀ gbàn n li fwɔɔgɔ lè í, li n pee, syɔɔn a gbǎn fànʔa taa li na bàā li kàragí í. Li n nyìn sɔ́ɔnri na, dee di syɛ́ɛnbèle kúu lè. 9#Sél 1:26 Ní loro ní wolo Kàfɔw kpɔ̀ʔɔrɔ́ wi lè wolo Tóow, loro wonijanni ní wolo wɔ́ɔ̄ syɛ́ɛnbèle dángi, poro bele Kolocɔlɔɔ faan a be woro tiimaa wíri lè. 10Kolocɔlɔɔ kpɔ̀ʔɔrɔli ní dángaw syɛ́ɛnrɛ di yirigi nyɔɔnijangi ni lè, ni senyɛ̀nnɛ, koro ga yɛlɛ kaa kpéʔele í. 11A lòtanʔa ní lòpɛnʔɛ a gbǎn pínɛ yiri lé púlowee-níjanna ni? 12Ni senyɛ̀nnɛ, a děsyaantiige a gbǎn olivye tíige yasanra san lé? Ba ɛrɛzɛn tírige a gbǎn děsyanʔa san lé? Lòtanʔa a wɔ́ɔ gbǎn taa solomɔ lɔ́ʔɔ ni í.
Sícilimi bi yìrigí lè nyɛ̀ʔɛni na
13A wàa i yaà lé yele níngi ni, wee wi wiyɛɛ zɔ̀ngí lè sícilio ní keele cánvɔlɔ? Ki n yɛlɛ wi gi tɛ̀ɛn wi nàʔajǎnmi báriga ni, gee bee n jo, gee myɛ wi kpéʔele lè, wi a ra gi kpéʔele ní màama, ní sícilimɛ ní. 14Kàjáa yele fúnyi ga nyìn nyabɛɛnni ní fungbɔɔgi na, ki ga yɛlɛ yaa yeyɛɛ nyɛ́nɛ ní yele sícilimi bee ní í, yele ga ni koro kpéʔele, ye gi cán yele n kányɛɛgi cée. 15Sícilimi bee o yìrigí nyɛ̀ʔɛni na í. Kàjáa pi i nyɛ dulunyanw naa, ní syɔɔn tiimaa funzɔngumi, ní màdebèle wómɔ. 16Níì cán beè nyabɛɛnni ní fungbɔɔgi nyɛ lè, funwaliyi ní kanaa-sìnbyeri féleye myɛ wɔ́ɔ i nyɛ nɛɛ bee. 17Kàjáa sícilimi bi yìrigí lè nyɛ̀ʔɛni na, wozeligi gi nyɛ pi i nyɛ tɛɛlɛ fun, gee gi taʔa lè gee bee na, koro gi nyɛ yɛɛ̀nyingi kéele n bi dɛ́nɛ, fûnnyingi si wɔ́ɔ i nyɛ bi ni, pi o jáma í, pi i nyinimɛ ní kacàngēle kpéʔele làrigèle myɛ ni, syɛɛnjóotɛɛyɛ siin joolo o nyɛ bi ni í, pi i nyɛ funviire na. 18Bele be kàsiitunbèle bɛ̀ɛgí ní peyɛɛ ní lè ní i pe kérigèle kpéʔele ní fûnnyinge ní, bele bee a be kasinbyeri tɔ̀nɔ taa.
Currently Selected:
Zyaki 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
