Oze 10
10
Sérikologi ní fǎngi kwɔ́ɔmɔ
1Isirayɛli maa pye àmɛɛ ɛrɛzɛn tírige nyɛ,
gee gi cábiga lè,
wi maa ni yasanra sangi.
Wi yasanri si maa ni nɛʔɛgi,
a wi wɔ́ɔ i sáriga-wòlo-yafaanyi nɛʔɛgi.
Wi maa ni yasungaangèle nyɔɔgi ni yɛlɛgi ní wi tári nìjanra ní.
2Pe fúnyi n tíla, tɔ́ɔliw ni,
pe a be kolomi túgoro tugo.
Yawe a be sáriga-wòlo-yafaanyi cáan,
si be yasungaangèle jabagi.
3Lǎli bee ni pe a gi joo si jo:
«Fànʔafɔlɔ o nyɛ wolo ma í,
níì cán wolo ga fyáa Yawe na í.
Nyàʔá si fànʔafɔw a dée gbǎn kpéʔele wolo ma?»
4Pe i syɛɛnrɛ nyuu, ní i jànvaa kàliyi kɛ̀ɛ́,
ní i joogaanna kpéʔele.
Kútiiw i fún àmɛɛ nyàápeʔe nyɛ lè séyi sɔ̀nyɔ ni.
5 Samarii ye a ra cɛ̀lɛ́ Bɛti-Avɛn náapyaayi kéele na.
Syɛ́ɛnbèle a pye kùu káyaʔa na yasungi kéele na,
ki sáriga-wòlobèle pe da ni muguri ki kéeli na lè,
pe a ra cɛ̀lɛ́ gi kéeli na,
ki nìjanri kéele na ti a yiri be níngi ni bi kári lè.
6Pe a gi láa kári Asirii ma,
bi sa kaan fànʔafɔw Yarebi ma kpɔʔɔrɔ.
Fɛ̀ɛrɛ a Efirayimi taa.
Fɛ̀ɛrɛ a Isirayɛli taa wi katimanagèle kéele na.
7Ki n pye Samarii na n kwɔ́ɔ,
wi fànʔafɔw n pye àmɛɛ nìmulɔɔlɔ nyɛ lè lɔ̀ʔɔ ǹjoʔo ni.
8 #
Luk 23:30; Tɛ̀ɛn 6:16 Bɛti-Avɛn sáriga-wòlo-tɛ́ɛyi a kálagi,
beè Isirayɛli kapeele kpéʔele lè.
Solovinge ní wúuro a fìin be sáriga-wòlo-yafaanyi na.
Pe a gi joo nyanbeleyi ma si jo:
«Ye wolo tɔ́n!»
Bi gi joo dǎndamayi ma si jo:
«Ye too wolo na.»
Gee Isirayɛli lùgu lè, koro wi a ba láa
9 #
Jàb 19:1-30
«Isirayɛli, nlaa yaà Gibeya cányi na,
mɔ n kapeele pye! Beè be kòro.
Kapɛɛnni li nyɛ syɛɛnpeebèle kánma na lè,
li a nan be na Gibeya ni ì?
10Mii a be kpúmɔn kàriga mii fúngo,
syɛɛnfeleyaa a kpóʔoro be kánmi na lǎli ni pe ga ni be pwoo be kapeetɛɛyi siin kéele na lè.
11Efirayimi i nyɛ náapyaʔa,
gee be sámaga n kóro lè,
á ki gi dɛ́nɛ bàā yaliiri tánʔana,
kàjáa mii a zúu taʔa ki yátiicǎngi na.
Mii a nìtěgi pwɔɔ Efirayimi na,
Zyuda sáā fála ní gi ní,
Zyakɔbi sáā tári fuguri ní kanadyɛnw ní.
12 #
Zyer 4:3
Yaa sínni lùguro lúru,
yáā funjǎngi yaliilaara kpéʔele,
ye sefɔngɔ cáan yeyɛɛ ma!
Yawe caali làla n nan fwɔɔ bi taa wi pan ba sínni yàli yele na.
13Yele n péemi fála,
ní baa sìnzinmi yaliilaara kpéʔele,
níì jànvaaw yasanga lìi.
Níì cán mɔ n mɔ sɔngumi taʔa mɔ kólogi na,
ní mɔ sanbalipɔbèle na be nɛʔɛ lè.
14Kàfulogbɔʔɔ a yìri mɔ syɛ́ɛnbèle nínge ni,
mɔ keniriyi myɛ a tɔ́nʔɔnɔ àmɛɛ Syaliman Bɛti-Aribɛli tɔ́nʔɔnɔ kapɛɛnni canʔa na lè,
beè be nafɔlɔ pulɔlɔ wi pìibēle na lè.
15Gee bee ki a kpéʔele yele na Betɛli ye,
yele péemi kéele na bee bi sɔ̀lɔ ki dǎnw na lè.
Ki ga pye nyǐnjerigi na,
koro a pye Isirayɛli fànʔafɔw kwɔ́ɔmɔ.»
Currently Selected:
Oze 10: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
