Oze 9
9
Kolocɔlɔɔ syɛ́ɛnbèle a bɔ̀nɔ ki myɛ ni
1Isirayɛli, mɔ a kɔ́ ra fundaanra kpéʔele bàā muguri àmɛɛ syɛɛnfeleyi nyɛ lè í,
níì cán mɔ n mɔ Kolocɔlɔw yaʔa níì miyɛɛ gbéʔele nànjaacɔɔ̀,
ki n mɔ dɛ́nɛ bàā sàranɔnʔɔw syoo bilew kàsyɔɔyɔ myɛ na.
2Kàsyɔɔgi ní ɛrɛzɛn lógi tɛɛnùgugo a ní da be kaangi paa líi í,
dùvɛɛnfɔnw a be jànváa.
3Pe a ní kòro Yawe tári ni í.
Efirayimi a lúru kári Ezyipiti ma,
pe a sa ra yaliinɔnʔɔri líi Asirii ni.
4Pe a ní da dùvɛɛnw sáriga wóo Yawe ma í.
Pe sárigaw kéele a wi dɛ́nɛ í.
Ki a pye be ma àmɛɛ kùu káyaʔa búru nyɛ lè,
wi lìifɔbèle myɛ a peyɛɛ nɔ́nʔɔ.
Níì cán pe búruw a pye pe gɔ̀ɔ́ngèle wóo.
Wi a jée Yawe kpáagi ni í.
5Nyàʔá yele a kpéʔele kpóʔorojànna canʔa,
ní Yawe séri canʔa na?
6Níì cán wéle, pe i yirigi ni syée kálagili kéele na.
Ezyipiti a be syɔɔ lége,
Mɔfi a nyanya kaan be ma.
Nyàápeegi a be wálifiiw wojaɔn syɔɔ taa,
wúuro a fìin be fànikpaayi ni.
7 #
Luk 21:22
Kpúmɔnri canya yi maa yee,
sàraw canya yi maa yee, Isirayɛli a koro cán!
Kanyaajoow n cúro,
a cánni pìlefɔlɔ nyúngo nyáʔami mɔ sinzinmi nɛʔɛnɛ,
ní mɔ céenɛʔɛmi kéele na.
8Efirayimi i nyɛ kɔ̀rɔsiifɔlɔ mii Kolocɔlɔw kánma na.
Kanyaajoow wii,
féjɛɛnjo-pára n le wi na wi kóloyi myɛ ni,
paragi i nyɛ wi Kolocɔlɔw kpaʔa ni.
9 #
Jàb 19:1-30
Pe n jée n cùru kálagimi ni,
mɔ a jo àmɛɛ gi pye lè Gibeya cányi na.
Yawe a sɔ̀ngí taa be kolomi na,
wi a keele tɛ́ʔɛ be na kapeegèle kéele na.
Yawe fúnbɛɛnri kéele
10 #
Cór 25:1-5
«Mii n Isirayɛli caa n nyaa fìími tára ni àmɛɛ ɛrɛzɛn nyɛ lè,
mii n yele tóobèle nyaa àmɛɛ děsyaantiige yasanzelire nyɛ lè.
Kàjáa pe n kári Baali-Peyɔɔri ma,
pe n peyɛɛ gaan yasun-nɔ́nʔɔgi ma,
ní baa pye yanɔnʔɔyɔ àmɛɛ be tàmagi yáriga nyɛ lè.
11Efirayimi nìjanri a yìri bi kári àmɛɛ féjɛɛnnɛ nyɛ lè,
pyà a ní see yaà í,
fícɛnnɛfɔlɔ a ní pye yaà í,
fícɛnnɛ a ní taa yaà í.
12Alí pe ga ni be pìíbèle gbóo,
mii a be bɔ̀nɔ be ni sáni pe lɛɛ bi nìri lè,
mii ga kàdoʔo wáa be ma lǎli ni lè,
wɔʔɔli a pye be na.
13Mii maa ni Efirayimi nyaagi wojɔ́rɔɔ ní yaweenaʔa-tɛ́ɛcànga ni àmɛɛ Tiiri nyɛ lè.
Kàjáa Efirayimi n baa nyɛ́nɛ n wòlo bi tórigo ní wi pìíbèle ní
wee má wi a be kpóo lè.»
14Pe kaan, ee Yawe!
Nyàʔá mɔ a kaan be ma?
Ficarikalagi-láaya kaan be ma,
ní yiremɛ fun yiregéle.
15«Pe péemi myɛ i tèé Giiligali ni.
Nɛɛ bee be kéeli mii bɛɛn.
Mii a be nɛnɛ mii kpáagi na be péemi kapyere kéele na.
Pe kéeli a ní mii dɛ́nɛ í.
Pe kùndigibèle myɛ i nyɛ niceebéle.
16Efirayimi n kpúmɔn, wi nǐnri n waʔa,
pe a ní yasanra san í.
Alí pe ga pìibēle taa mii a be láayi pìinidaanmabéle kpóo.»
17Mii Kolocɔlɔw a be cée,
níì cán pe ga lóʔo wi ma í,
pe a ra curugu da máari syɛɛnfeleyi nínge ni.
Currently Selected:
Oze 9: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
