Heburubèle 7
7
Mɛlikizedɛki, wi lè fànʔafɔlɔ ní sáriga-wòloo
1 #
Sél 14:17-20
Níì cán Mɛlikizedɛkiw bee wi da pye Salɛmi#7:1 Salɛmi: Mɔ ga lóʔo Salɛmi, mɛ́ɛgi bee kɔ́rɔ wi nyɛ yɛɛ̀nyingi. ye fànʔafɔw ní wɔ́ɔ̀ pye sáriga-wòloo Kolocɔlɔɔ ma, woro wee wi nyɛ lè Pe Myɛ Nyúngo na. Lǎli ni Abirahami da yìri fànʔafɔbèle tɛɛ̀kpoʔo ni ni maa lè, a Mɛlikizedɛki wi fàra níì dùbaw kpéʔele wi ma. 2A Abirahami yáʔaw wòlo wi yáriri myɛ ni n kaan wi ma. Mɛlikizedɛki mɛ́ɛgi kɔ́rɔ i nyɛ tɛɛyɛ siin: Wozeligi i nyɛ sínni fànʔafɔlɔ, siin wógi si i nyɛ yɛɛ̀nyingi fànʔafɔlɔ, àmɛɛ wi nyɛ lè Salɛmi ye fànʔafɔw, 3Tofɔlɔ o wi na í, nafɔlɔ o wi na í, àlí tofɔlɛɛbèlē o wi na í. Sélimɛ o nyɛ wi sìíw na í, kwɔ́ɔmɔ wɔ́ɔ o nyɛ wi na í. Wi i nyɛ kwɔ́ɔmɔ fun sáriga-wòloo, Kolocɔlɔɔ n wi kpéʔele àmɛɛ woro Jáaw nyɛ lè.
4Ye gi wéle àmɛɛ nǎnw bee da kpɔ́ʔɔ lè, Abirahami wi lè tofɔlɛɛgi, yacanri wi da taa lè kapɛɛnni ni, wi tiimaa n yáʔaw wòlo ti myɛ ni n kaan wi ma! 5#Cór 18:21 Gee si gi Levii yòdaʔayi* kéele kwɔ́ɔ lè, poro bele má sáriga-wòlori fáli kaan lè, Mowizi làlwaw n gi joo n kaan bele bee ma níì jo, paa yáʔaw syoo syɛ́ɛnbèle ma, gee bee n jo paa wi syoo be senyɛnbèle ma, àlí bi gi taa pe wɔ́ɔ i nyɛ Abirahami jàala céri kàbaan na. 6Wee si wi lè wi o nyɛ Levii yòdaʔaga í, Abirahami maa yáʔaw wòlo n kaan wee bee ma! A wi dùbaw kpéʔele Abirahami ma woro wee má Kolocɔlɔɔ da wi nyɔ́ɔgi fàli lè! 7Wo n gi cán wogbɔɔɔ wi dùba kpéʔele wobile ma, kàkabalaga faala o nyɛ gee bee ni í. 8Bele si be yáʔaw syoo lè syɛ́ɛnbèle ma lǎli naa ni, bele bee i kúu, kàjáa gee gi Mɛlikizedɛki kéeli kwɔ́ɔ lè, woro wee wi da wi syɔɔ lǎli bee ni lè, wi i nyɛ sìi na àmɛɛ syɛɛnsɛ́bɛri gi séeraw kpéʔele lè. 9Levii wi yáʔaw syoo syɛ́ɛnbèle ma lè, lǎli ni Abirahami da yáʔaw wòlo n kaan Mɛlikizedɛki ma lè, ki i wéle mɔ a jo Levii tiimaa wi da gee bee kpéʔele, 10bi gi taa wi maa sèʔê pye wi tóow Abirahami ma sìnzee ni lǎli ni Mɛlikizedɛki da Abirahami fàra lè.
11Levii ye sáriga-wòlori ti da pye Mowizi làlwaw kàpɔɔn, wee Kolocɔlɔɔ da kaan Zyefubèle ma lè, kapye syɛ́ɛnbèle maa sínni taa n foro Levii ye sáriga-wòlori báriga ni, nyàʔá na pe màko mǎà dée ní pye sáriga-wòlowaa nikwɔɔ na wi yìri bi yɛlɛ ní Mɛlikizedɛki félegi ní, Aarɔn félegi sìndɛʔɛ ni? 12Níì cán pe ga sáriga-wòlobèle fàli, ŋàʔanaga gii fwɔɔ pe wɔ́ɔ làlwaw fàli. 13Wee si wi lè wo Kàfɔw, woro wee kéele na wolo kérigèle naa nyuu lè, wi i nyɛ felegaa nikwɔɔ wóo, wàa si da kɔ́ɔ̀ yiri félegi bee ni n wiyɛɛ gaan sáriga-wòlo-yafaangi fáli ma í. 14Níì cán ki n fílige gbanʔama ncan wo Kàfɔw n yiri Zyuda yòdaʔayi* ni, yee yi lè Mowizi da yafyɛn joo sáriga-wòlobēle kéele na yi kàbaan na lè í.
Sáriga-wòlowee wi Mɛlikizedɛki wíri lè
15Kéeli naa n níì gi fílige gbanʔama n sɔ̀lɔ, ncan sáriga-wòlowaa nikwɔɔ n yìri, wee wi Mɛlikizedɛki wíri lè, 16wi ga wi nyɛ́nɛ n wòlo n yɛlɛ ní céri làlwa kajoolo ní í, fwɔɔ n yɛlɛ ní sìinaa-bàngwɔɔw fànʔa ní. 17#Ŋún 110:4 Níì cán séeraw naa n kpéʔele wi kéeli na n jo: «Mɔ i nyɛ sáriga-wòloo làla o làla n yɛlɛ ní Mɛlikizedɛki félegi ní.» 18Kánmi bee na làlwalɛɛw sàa wi fànʔa-fǔnmi, ní wi tɔ̀nɔ-fǔnmi kéele na, 19níì cán wi ga yafyɛn sín n foro í, kàjáa Kolocɔlɔɔ n sɔ̀ngumɔ tɛɛtaʔaga kaan wolo ma, gee gi nyɔɔ n sɔ̀lɔ lè booma wógi na, sɔ̀ngumi bee tɛɛtaʔaga báriga ni wolo nùuní Kolocɔlɔɔ na.
20Gee bee si ga kpéʔele kàliga fun ni í. Pe maa ni sáriga-wòlobèle bele télegi sìngali ni. 21#Ŋún 110:4 Kàjáa Kolocɔlɔɔ da Zyezu télege sìngali ni í, wi maa wi télege ní kàliga ní níì jo: «Kàfɔw n kàli, wi si a tée wi sɔ̀nguri fàli í, wi n jo: Mɔ i nyɛ sáriga-wòloo làla o làla.» 22Kánmi bee na Zyezu baa pye joogaanni forofɔlɔ, lee li nyɔɔ n sɔ̀lɔ lè booma wóli na. Woro bárigaw ni li a gbǎn sàa í,
23Amɛɛ kùúw da sáriga-wòlobèle bele kaan lè pe o mɔngi í, koro na pe da ni i télegi làla o làla wonɛʔɛbéle ní. 24Kàjáa Zyezu i nyɛ sìi na làla o làla, koro na wi sáriga-wòlo-fáliw a gbǎn kaan wàa nikwɔɔ ma í. 25Gee bee na bele be nùuní lè Kolocɔlɔɔ na wi bárigaw ni, wi a tɔ̀nɔ́ gbǎn be syɔɔ foro péw, níì cán wi i nyɛ sìi na làla o làla jàngó bàā nyɛ́ɛri be kéeli na.
26Sáriga-wòlobèle kàfɔlɔ bee félege mako wi da tɔ̀nɔ n pye wolo na, woro wee wi sín lè, ní i nyɛ kajoolo fun, ní wɔ́ɔ i nyɛ tɛɛlɛ fun, wi n fàli n léeli kapeebyebèle na, wi i yaà kpɔ́ɔmi tɛ́ʔɛ ni, nyɛ̀ʔɛgèle ǹjoʔo ni. 27#Lev 9:7 Wi o nyɛ àmɛɛ sáriga-wòlo-kàfɔbèle bele nyɛ lè í, bàā sáriga wóo canʔa o canʔa wiyɛɛ kapeegèle kéele na gbɛnʔɛnɛ, si naa ra wi wóo syɛ́ɛnbèle kéele na í. Wi n sárigaw wòlo tɔlɔgɔ nibin pée, lǎli ni wi wiyɛɛ bye lè sáriga. 28Pe i sáriga-wòlobèle kàfɔɔlɔ télegi ni yɛlɛgi ní Mowizi làlwaw ní, poro bele be nyɛ lè fànʔa fun. Kàjáa Kolocɔlɔɔ n Jaafɔw télege ní kàliga ní, gee wi kpéʔele lè làlwaw kàdoʔo ma, Jaafɔw wi sín n foro lè, si wɔ́ɔ kòro nya làla o làla.
Currently Selected:
Heburubèle 7: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
