Heburubèle 6
6
1Gee bee na gi yɛlɛ wo sɔ̀lɔ nya tamani syɛɛnselide na, dee di nyuu lè Kirisi kéeli na, wáā syée wozanri kurugo ti lè wogbanri, ki ga yɛlɛ wolo í ní kàpɔɔnw le kavɔn í, gee bee n jo bi kòro kàdowaari tamana yagana na tɔ̀nɔ fun kapyegèle ma í, wàlá tágali kéele Kolocɔlɔɔ na syɛ́ɛnri yagana na í, 2wàlá wolo í kòro batɛmiw féleye tamana yagana na í, wàlá kɔ́yi taʔala wólo na í, koro ga jáa kúbèle nyán-yirile, ní kwɔ́ɔmɔ fun kútiijoori wólo na í. 3Gee bee wo a kpéʔele ní Kolocɔlɔɔ ga fɔ̀lɔ.
4Bele be láʔa lè tágali na n too, syɔɔn a ní gbǎn be dɛ̀ɛmɛ be kàdoʔo wáa be kapeegèle ma í, poro bele fúnyo ni gbɛ̀ɛ́nmi da jée lè á be nyɛ̀ʔɛni yakanʔa tàanma laala n wéle, níì be lɛɛli taa Pìicǎnni ni, 5níì Kolocɔlɔɔ syɛɛntaanri tàanma laala n wéle n fàra dulunyanw kakpologéle na wee wi maa lè, 6ní níì láʔa tágali na n too lè, syɔɔn a ní gbǎn be dɛ̀ɛmɛ be kàdoʔo wáa be kapeegèle ma í. Níì cán pe n níì Kolocɔlɔɔ Jáaw kóri tiiparigi na peyɛɛ fúnyi ni, níì fɛ̀ɛrɛ wáa wi na syɛ́ɛnbèle nyɛ́nɛ na.
7Zěgi ga ni tuun làrigēle saʔa ni tári na ti i gi gbo, á di fálafɔbèle si i yaliire taagi di ni, Kolocɔlɔɔ n ni dùbaw kpéʔele tári bee na. 8#Sél 3:17-18 Kàjáa wúuro ní solovinge ga fìin di ni, tári bee n pɛɛn, dángaw a ba too di na, ti kwɔ́ɔmi si ba pye sógulo.
9Wolo wojoori bee ní ki myɛ ní, wolo syɛɛn-nidaanmabèle, wolo n tága yele na ncan yele n pɔ́rɔ n sɔ̀lɔ kánmi bee na, ní wɔ́ɔ̀ tága gi na ncan yele n syɔɔli taa n kwɔ́ɔ. 10Níì cán Kolocɔlɔɔ o kologi í, fáliw yele kpéʔele lè n fàra tàmagi na yele tɛ̀ɛn pèle na wi mɛ́ɛgi na lè, àmɛɛ yele da ni Kolocɔlɔɔ syɛɛncanbèle dɛ̀ɛmɛ́ lè ní sèʔé i nyɛ be dɛ̀ɛmɛni na tɔ́ɔliw ni lè, wi a fɛ̀ʔɛ gee bee kàa faala na í. 11Wolo si i caa yele myɛ nibin nibin í pínɛ da ŋàʔaná gbanʔama bi taa sa nan ki kwɔ́ɔmi na, jàngó gee na yele yele sɔ̀ngumi taʔa lè, yele í ki myɛ taa. 12Wolo o caa yele í pye sàlagafɔɔlɔ í, bele be Kolocɔlɔɔ nyɔɔfaliyi kɔ́rigɔ lìi lè be tágali ní be kpàracogi báriga ni fwɔɔ yele í da bele bee tɛ́ɛlɛ.
Kolocɔlɔɔ nyɔɔfaligi kéele
13Lǎli ni Kolocɔlɔɔ da wi nyɔ́ɔgi fàli Abirahami ma lè, wàa nikwɔɔ da pye yaà wee wi kpɔ́ʔɔ n sɔ̀lɔ woro na lè í, wee na woro da yɛlɛ bi kàli lè í, koro na wi da kàli wiyɛɛ na, 14#Sél 22:16-17 níì jo: «Mii a tɔ̀nɔ́ dùbaw taʔa mɔ na kányɛʔɛ ni, si wɔ́ɔ mɔ yodaʔayi yaʔa yi nɛʔɛ gbanʔama.» 15A nyɔɔfaligi wɔ́ɔ baa foro Abirahami ma àmɛɛ wi da kpàracogo kpéʔele lè. 16Syɛ́ɛnbèle i kɛ̀ɛ́ bele na be kpólo n sɔ̀lɔ lè poro na, kàligi mɛ̀ɛ́ nyɔɔfaligi forolo kakabalaga myɛ kwɔ́ɔ be ma. 17Kolocɔlɔɔ si maa tɔ̀nɔ ni caa bi gi fílige tɛ̀ɛn syɛ́ɛnbèle na poro bele má woro nyɔ́ɔgi fàli lè, jàngó pe gi cán woro kakɔrirɔli a gbǎn sàa í, koro na wi kàligi fàra wi nyɔɔfaligi na, 18jàngó yi katɛɛyi siin yi lè yi a gbǎn fàli í, Kolocɔlɔɔ si a wɔ́ɔ gbǎn finɛ yi kéeli na í, yee bee kéele í wolo kɛɛlɛ gbanʔama, wolo bele wo fàn n sáà sɔ̀ngumi tɛɛtaʔaga taa n cò níì syɔɔ lè, koro gee Kolocɔlɔɔ tɛ́ʔɛ wolo yɛ́ʔɛ ma lè. 19#Lev 16:2 Sɔ̀ngumi bee tɛɛtaʔaga n wolo fúnyi sámaga n yérige àmɛɛ bàto-yérige-tunmɔjinige nyɛ lè. Yayerigegi bee i nyɛ tágala wóʔo, níì sámaga n yére fàniw kàdoʔo ma pe pari lè Kolocɔlɔɔ kpɔ̀ʔɔrɔli kpaʔa fúngo ni, ki lè nyɛ̀ʔɛni ni, 20#Ŋún 110:4 beè yɛɛ̀kiniw jée lè wolo kéeli na, wi lè Zyezu, woro wee wi baa pye lè kwɔ́ɔmɔ fun sáriga-wòlobèle kàfɔlɔ n yɛlɛ ní Mɛlikizedɛki félegi ní.
Currently Selected:
Heburubèle 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
