Heburubèle 8

Zyezu wi nyɛ wolo sáriga-wòlobèle kàfɔlɔ

1 # Ŋún 110:1 Syɛ́ɛnri bee mii joo lè, ti kɔ́rɔw wi nyɛ wee naa, ncan sáriga-wòlobèle kàfɔlɔ i nyɛ wolo ma wodɛ́ɛɔn ní Nìjangbɔɔri Fɔ́lɔ fàngolo kàliige ma nyɛ̀ʔɛni ni. 2Wi i báara ní Kolocɔlɔɔ kpɔ̀ʔɔrɔli fànikpaʔa yacanra ní, ki lè kányɛɛgi wóʔo, gee Kàfɔw sámaga lè, syɔɔn wozamagaga ban í.

3Sáriga-wòlobèle kàfɔlɔ myɛ télegele nyúngo gi nyɛ jàngó paa syɛ́ɛnbèle yakaanya ní sárigaw wóo bàā kaangi Kolocɔlɔɔ ma. Gee bee na ki da wɔ́ɔ̀ yɛlɛ yarigaa í pye sáriga-wòlobèle kàfɔlɔ bee ma wi wòlo sáriga. 4Koro na kapye wi maa pye naa tári na wi mǎà dée pye sáriga-wòloo í, níì cán pèle i naa n kwɔ́ɔ, bele be yakaanyi wóo ni kaangi lè n yɛlɛ ní Mowizi làlwaw ní. 5#Yir 25:40 Bele bee fáli i nyɛ fɛ̀ɛ ní kànyinnɛ bi nyɛ̀ʔɛni wóo tɛ̀ɛn, lǎli ni Mowizi da ni caa bi Kolocɔlɔɔ kpɔ̀ʔɔrɔli fànikpaʔa sámaga lè, a Kolocɔlɔɔ wi sàmi níì wi pye: «Maa kɔ̀rɔsíi mí yáriri myɛ sámaga mi yɛlɛ ní kánmee ní mii da tɛ̀ɛn mɔ na lè nyanbelegi na.» 6Kàjáa fáliwee wi nyɛ Kirisi ma lè tɔ́ɔliw ni, wi n nyɔɔ n sɔ̀lɔ sáriga-wòlobèle wóo na, níì cán woro wi baa pye joogaanni kpéʔelefɔlɔ Kolocɔlɔɔ ní syɛ́ɛnbèle nínge ni, joogaanni bee n nyɔɔ n sɔ̀lɔ wolɛɛli na, li kàpɔɔnw i nyɛ nyɔɔfaliya, yee yi nyɔɔ n sɔ̀lɔ lè wolɛɛyi na.

7Níì cán kapye joogaanzelili bee maa pye tɛɛtoolo fun, Kàfɔw mǎà dée ní làa nikwɔɔ caa lee bee sìndɛʔɛ ni í. 8#Zyer 31:31-34 Kàjáa àmɛɛ Kàfɔw syɛ́ɛnbèle nyaa a be kolo lè, koro na wi gi joo níì jo:

«Ye wéle, canyaa i maa, yee ni mii a joogaanvɔnnɔ kpéʔele

lè ní Isirayɛli narigbaagi ní,

n fàra Zyuda wógi na.

9Joogaanni mii da kpéʔele ní be toolɛɛbèle ní lè,

cángee na mii be cò kɔ́yi na n yirige Ezyipiti tári ni lè,

lee naa a pye sèjira ní lee bee ní í.

Amɛɛ si gi nyɛ lè pe da kòro mii joogaanni ni ni li kpéʔele í,

koro na mii be yaʔa,

Kàfɔw wi joo nya.

10Joogaanni naa mii a kpéʔele ní Isirayɛli kpáagi wòolo ní

cányi bee kàdoʔo ma,

mii a ra mii kajoodɛɛngèle nii be fúnyi ni,

si wɔ́ɔ ra ge sɛ́bɛ be zɔ̌nbèle na.

Mii a pye be Kolocɔlɔw,

pé pye mii syɛ́ɛnbèle,

11níì cán pe wàa faala a ní ba ra wi felegefɔ-nyɛ́nwaa,

wàlá wi senyɛnwaa tama nyáana í, si jo:

Ki n yɛlɛ mɔ í Kàfɔw cán í.

Níì cán pìíbèle ní wolɛɛbèle myɛ a ba mii cán.

12Níì cán mii a nyinimɛ taa be na

si be kakolobyeri kùsulugo syɔɔ,

mii a ní sɔ̀ngí taa be kapeegèle na nyáana í.

13Amɛɛ wi joogaanni naa yiri lè wovɔnnɔ, gee bee n gi tɛ̀ɛn wi n wozelili córo li n lɛɛ. Lee si li lɛɛ lè, á li lǎli wɔ́ɔ̀ sɔ̀lɔ, lee bee i caa bi kwɔ́ɔ.

Currently Selected:

Heburubèle 8: CB10

Highlight

Copy

Compare