Heburubèle 11
11
Tágali kéele
1Tágali li gi kaan a wolo gi cán ncan yáriree na wolo wolo sɔ̀ngumi taʔa lè, ti i nyɛ kányɛʔɛ wóro, yáriree di lè wolo o di nyaagi í, loro li dee bee kàkabalaga kwɔ́ɔ wolo ma. 2Booma wolɛɛbèle tágala li gi kaan a Kolocɔlɔɔ da séeracǎnw kpéʔele be kéeli na.
3 #
Sél 1:1; Ŋún 33:6,9; Zyan 1:3 Tágali báriga ni wolo gi cán ncan Kolocɔlɔɔ n dulunyanw sámaga wi nyɔɔsyɛɛnri báriga ni, kánmi bee na yáriree wolo nyaagi lè, yanyaara ban wi tɛ́ʔɛ n di sámaga í.
4 #
Sél 4:3-10
Tágali báriga ni Abɛli da sárigaw wòlo Kolocɔlɔɔ ma, a wi nyɔɔ n sɔ̀lɔ Kayɛn wów na. Amɛɛ si Kolocɔlɔɔ da fɔ̀lɔ Abɛli yakaanyi na lè, gee bee na wi séeraw kpéʔele Abɛli kéeli na níì jo wi n sín tágali báriga ni. Loro li gi kaan a Abɛli sèʔé i nyuu àlí n gi yaʔa wi n kùu n kwɔ́ɔ.
5 #
Sél 5:21-24
Tágali báriga ni Kolocɔlɔɔ da Henɔki láa n lúrugo, wi ga kùu í. Pe da níì wi caa n nyaa í, níì cán Kolocɔlɔɔ maa wi láa. Sáni Kolocɔlɔɔ í wi láa lè, wi maa gi séeraw kpéʔele níì jo wi kéeli n woro dɛ́nɛ. 6Koro na syɔɔn faala a gbǎn Kolocɔlɔɔ dɛ́nɛ tágali kàdoʔo ma nyáana í. Wee wi maa lè Kolocɔlɔɔ ma, ki n yɛlɛ wi tága gi na bi cán Kolocɔlɔɔ i yaà, si wɔ́ɔ̀ gi cán wi i tɔ̀nɔ kaangi wi caafɔbèle ma.
7 #
Sél 6:13-22
Tágali báriga ni Nowe da kɔ́rɔkpɔɔgi sámaga, àmɛɛ Kolocɔlɔɔ da wi sàmi lè kérigèle na, gele ge lè syɔɔn da kɔ́ɔ̀ ge nyaa í, wi maa ni fɛ̀ɛgí Kolocɔlɔɔ na níì gi sámaga jàngó woro ní wi kpaʔa wóbèle í syɔɔ. Tágali bee báriga ni wi da kútiiw cáan dulunyanw syɛ̀ɛnnɛ na, ní baa pye sínni kɔriliio lee li yìri lè tágali ma.
8 #
Sél 12:1-5
Tágali báriga ni Abirahami da Kolocɔlɔɔ kayeli lóʔo níì kári tɛɛgaa ma, gee wi a kɔ́ ba taa lè gi pye wi kɔ́rigi. Wi maa yiri ni syée bi gi taa wi da wi kàbangárigi cán í. 9#Sél 35:27 Tágali báriga ni wi da tɛ́ɛn nyɔɔfaligi tára ni àmɛɛ nibɔɔn nyɛ lè, fànikpaaya ni wi da ni kòró, ànbée si Izaaki ní Zyakɔbi da wɔ́ɔ baa gi kpéʔele, be pye lè wi kɔriliinyɛnbèle nyɔɔfaligi bee wonijanga ni. 10Níì cán wi maa ni kèkpɔɔgi sige, gee be faan lè kàpɔɔnnirio ǹjoʔo ni, Kolocɔlɔɔ si wi nyɛ gi tímanafɔw ní gi faanfɔw.
11 #
Sél 18:11-14; 21:2 Tágali báriga ni fànʔa da wɔ́ɔ̀ jée Sara tiimaa ni a wi fícɛnnɛ taa, àlí n gi yaʔa wi maa lɛɛ n sɔ̀lɔ pìiseeri na, níì cán wee wi da nyɔ́ɔgi fàli wi ma lè, wi maa wee bee córo tágala syɔ́ɔn. 12#Sél 15:5; 22:17; 32:12 Gee bee na nǎnwee wi da pye lè mɔ a jo wi n kùu n kwɔ́ɔ, nǎnw bee nibin yòdaʔaya n baa nɛʔɛ àmɛɛ nyɛ̀ʔɛni ŋɔ́ripiigéle nyɛ lè, ní wɔ́ɔ i nyɛ córomɔ fun àmɛɛ sólomi lòkpɔʔɔ kagomɔ táminyɔɔ nyɛ lè.
13 #
Sél 23:4; 1Cán 29:15; Ŋún 39:13 Bele bee myɛ maa baa kùu tágali ni, nyɔɔfaliyi da foro be nyɛnɛ na í, kàjáa pe maa yi nyaa léelige níì yére yi ni ní fundaanra ní, ní wɔ́ɔ̀ gi séeraw kpéʔele níì jo poro i nyɛ nibɔɔnnɔ ní kùsɛɛbéle tári na. 14Bele be gi nyuu kánmi bee na lè, pe i gi tèé n jo poro i táraa caa ti pye poro wóro. 15Táree ni pe da yiri lè, pe ga maa ni di kéeli sɔ̀ngí, pe mǎà dée kanmaa taa bi lúru kári yaà. 16Kàjáa pe maa ni táraa caa, dee di nyɔɔ n sɔ̀lɔ lè, ti lè nyɛ̀ʔɛni wóro. Koro na àmɛɛ pe da ni Kolocɔlɔɔ yiri lè be Kolocɔlɔw, gee bee da pye wi na fɛ̀ɛrɛ í. Níì cán wi maa kèkpɔʔɔ sámaga be ma.
17 #
Sél 22:1-14
Tágali báriga ni Abirahami da Izaaki cò n wòlo sáriga, lǎli ni Kolocɔlɔɔ wi pye n wéle lè. Woro wee má Kolocɔlɔɔ da nyɔɔfaliyi kpéʔele lè, wi maa wi pìinibingi wòlo sáriga, 18#Sél 21:12 wee kéele na Kolocɔlɔɔ da gi joo lè níì jo: «Izaaki ni mɔ yodaʔayi a yiri, yee na mɔ mɛ́ɛgi a pye lè.» 19Níì cán Abirahami maa gi tímana ncan fànʔa i nyɛ Kolocɔlɔɔ ma bi tɔ̀nɔ́ gbǎn Izaaki nyán yirige kúbèle nínge ni. A gi wɔ́ɔ baa pye mɔ a jo wi n wi nyán n yirige n kaan wi ma.
20 #
Sél 27:27-29,39-40 Tágali báriga ni Izaaki da wɔ́ɔ̀ dùbaw kpéʔele Zyakɔbi ní Ezau ma pe nyɛ̀ʔɛnaw kéele na.
21 #
Sél 47:31—48:20
Tágali báriga ni Zyakɔbi da dùbaw kpéʔele Zyozɛfu jáabèle ma nibin nibin, be lè nǎnbèle, lǎli ni wi da nan bi kùu lè, níì kogo wi kàgbeeli na níì Kolocɔlɔɔ kpɔ̀ʔɔrɔ.
22 #
Sél 50:24-25; Yir 13:19 Tágali báriga ni, lǎli ni Zyozɛfu da nan bi kùu lè, a wi jo Isirayɛli pìíbèle yirile kéele na, Ezyipiti ni, ní wɔ́ɔ̀ woro kaceleyi kéele joo be ma.
23 #
Yir 2:2; 1:22 Tágali báriga ni, lǎli ni Mowizi seefɔbèle wi see lè, a be wi làriga n baa taa yeye taanri, níì cán pe maa gi nyaa wi i nyɛ pìicàɔn. Pe da fyáa fànʔafɔw kajoolo na í.
24 #
Yir 2:10-12
Lǎli ni Mowizi baa lɛɛ lè, a wi cée tágali báriga ni níì jo pe a ní kɔ́ ra woro yiri Faraɔnw calipile pyà í 25níì wɔʔɔli nyɛ́nɛ n wòlo níì jo ki a pɔ́rɔ woro í pínɛ da wɔʔɔ ní Kolocɔlɔɔ syɛ́ɛnbèle ní si kapeegèle nyáanagbɛ kèlē yaʔa gele ke a làla cɛɛri yagana kwɔ́ɔ lè. 26Wi maa gi tímana n gi nyaa pe ga woro wɔʔɔ Kirisi kéeli na, gee bee a pye woro ma lɔnɛʔɛrɛ bi sɔ̀lɔ Ezyipiti tári lɔ́rɔ na. Níì cán wi nyɛnɛ maa pye gi tɔ̀nɔw na.
27 #
Yir 2:15
Tágali báriga ni wi da yiri Ezyipiti ni, wi ga fyáa fànʔafɔw fundanʔara na í. Níì cán wi maa ni kpàracogo kpéʔele, mɔ a jo wi i Kolocɔlɔɔ nyaagi, woro wee wi lè syɔɔn o wi nyaagi í. 28#Yir 12:21-30 Tágali báriga ni wi da Isirayɛli ye pye be Sɔ̀lɔ-mí-yaʔali séri kpéʔele, bé sìsyaanw nyari nyari kpaaweegèle na, koro ga pye nyɛ̀ʔɛni tunduɔn ga pan woro wee wi a pìiselibèle kpóo lè, wi poro wóbèle yaʔa.
29 #
Yir 14:21-31
Tágali báriga ni Isirayɛli ye da Sólomi Lònyɛnʔɛ jeli mɔ a jo táwaara tɛ́ʔɛ gii, a Ezyipiti ye ga jo poro a ŋàʔana bi gi jeli, a gi be wáa.
30 #
Zyoz 6:12-21
Tágali báriga ni Zyeriko tǒw da too, lǎli ni Isirayɛli syɛ́ɛnbèle gi màʔa n kwɔ́ɔ lè cányi kɔrɔsiin. 31#Zyoz 2:1-21; 6:22-25 Tágali báriga ni Arahabi da pínɛ n kùu ní sìnloʔobèle ní í, wi pye lè nànjaacew, níì cán wi maa tundunlarabèle sámaga n cò ní funjànga ní, poro bele pe da sáà Zyeriko saanri n wéle lè làrama ni.
32 #
Jàb 6:11—8:32; 4:6—5:31; 13:2—16:31; 11:1—12:7; 1Sam 16:1—1Fàn 2:11; 1Sam 1:1—25:1 Dìí si mii a ní joo? Làla o mii ma bi joo Zyedeyɔn, ní Baraki, ní Samisɔn, ní Zyefite ye kérigèle na í, n fàra Davidi, ní Samyɛli, ní kanyaajoobèle wòʔolo na í. 33#Dan 6:1-27 Tágali báriga ni bele bee pèle da fànyaa jáa, á pèle kasingèle kpéʔele, a nyɔɔfaliyi foro pèle ma, á pèle càarabèle nyɔ́ɔyɔ tɔ́n, 34#Dan 3:1-30 a pèle naakpoloyi fígi, á pèle syɔɔ ŋɔséebèle kpóolo ma, bele pe da pye lè fànʔa fun, a be fànʔa taa tágali báriga ni, a pèle gbàn kapɛɛnkpumɔnri na, ní sáà nigoobèle sùlasiibéle jáa. 35#1Fàn 17:17-24; 2Fàn 4:25-37 Cébèle bele syɛ̀ɛnnɛ be kùu lè, a poro pèle wòolo nyán n yiri kúbèle nínge ni.
Kàjáa pèle nikwɔɔlɔ maa kùu kpúmɔnri báriga ni, ncan pe da ni caa wàa í poro syɔɔ í, níì cán pe maa ni nyán-yirilaa caa, lee li nyɔɔ n sɔ̀lɔ lè. 36#1Fàn 22:26-27; 2Cán 18:25-26; Zyer 20:2; 37:15; 38:6 Pèle nikwɔɔlɔ maa faʔara taa ní wɔ́ɔ̀ sapiigèle kpúmɔnrɔ syɔɔ, á be pèle nikwɔɔlɔ pwɔɔ níì be le kàsow ni. 37#2Cán 24:21 Pe maa pèle wábagi n kpóo ní kàdɛnɛri ní, níì pèle fígiri ní wɔʔɔli syɛ́ɛnrɛ ní, níì pèle cɛnɛ ní tiicɛnɛ-síi ní, pe n pèle kpóo ní ŋɔséebèle ní, bàsaliyi ní sikesaliyi n pye pèle yalere, a be i nyaari ni máari fɔ̌ngi, ní wɔʔɔli, ní fɔ̀rɔgi kɔ́yɔ ni, 38bi gi taa dulunyanw da nyɔɔ n yɛlɛ ní be ní í! Pèle maa ni nyaari ni máari fìími tára ni, ní nyanbeleyi na, pèle si i kòró nyanbeweeyi, ní tári wéeye ni.
39Séeracàɔn maa kpéʔele be kéeli na pe tágali báriga ni, koro ní ki myɛ ní nyɔɔfaligi da foro be nyɛnɛ na í. 40Níì cán Kolocɔlɔɔ maa yarigaa kɔ̀rirɔ n kpéʔele wolo kéeli na, gee gi nyɔɔ n sɔ̀lɔ lè, koro ga pye pe a kɔ́ nyɔɔ foro wolo kàdoʔo ma í.
Currently Selected:
Heburubèle 11: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
