Popular Bible Verses from Heburubèle 11

Share

Tágali li gi kaan a wolo gi cán ncan yáriree na wolo wolo sɔ̀ngumi taʔa lè, ti i nyɛ kányɛʔɛ wóro, yáriree di lè wolo o di nyaagi í, loro li dee bee kàkabalaga kwɔ́ɔ wolo ma. Booma wolɛɛbèle tágala li gi kaan a Kolocɔlɔɔ da séeracǎnw kpéʔele be kéeli na.

Koro na syɔɔn faala a gbǎn Kolocɔlɔɔ dɛ́nɛ tágali kàdoʔo ma nyáana í. Wee wi maa lè Kolocɔlɔɔ ma, ki n yɛlɛ wi tága gi na bi cán Kolocɔlɔɔ i yaà, si wɔ́ɔ̀ gi cán wi i tɔ̀nɔ kaangi wi caafɔbèle ma.

Tágali báriga ni wolo gi cán ncan Kolocɔlɔɔ n dulunyanw sámaga wi nyɔɔsyɛɛnri báriga ni, kánmi bee na yáriree wolo nyaagi lè, yanyaara ban wi tɛ́ʔɛ n di sámaga í.

Tágali báriga ni Abirahami da Kolocɔlɔɔ kayeli lóʔo níì kári tɛɛgaa ma, gee wi a kɔ́ ba taa lè gi pye wi kɔ́rigi. Wi maa yiri ni syée bi gi taa wi da wi kàbangárigi cán í. Tágali báriga ni wi da tɛ́ɛn nyɔɔfaligi tára ni àmɛɛ nibɔɔn nyɛ lè, fànikpaaya ni wi da ni kòró, ànbée si Izaaki ní Zyakɔbi da wɔ́ɔ baa gi kpéʔele, be pye lè wi kɔriliinyɛnbèle nyɔɔfaligi bee wonijanga ni.

Tágali báriga ni Nowe da kɔ́rɔkpɔɔgi sámaga, àmɛɛ Kolocɔlɔɔ da wi sàmi lè kérigèle na, gele ge lè syɔɔn da kɔ́ɔ̀ ge nyaa í, wi maa ni fɛ̀ɛgí Kolocɔlɔɔ na níì gi sámaga jàngó woro ní wi kpaʔa wóbèle í syɔɔ. Tágali bee báriga ni wi da kútiiw cáan dulunyanw syɛ̀ɛnnɛ na, ní baa pye sínni kɔriliio lee li yìri lè tágali ma.

Tágali báriga ni Kolocɔlɔɔ da Henɔki láa n lúrugo, wi ga kùu í. Pe da níì wi caa n nyaa í, níì cán Kolocɔlɔɔ maa wi láa. Sáni Kolocɔlɔɔ í wi láa lè, wi maa gi séeraw kpéʔele níì jo wi kéeli n woro dɛ́nɛ.

Tágali báriga ni Abɛli da sárigaw wòlo Kolocɔlɔɔ ma, a wi nyɔɔ n sɔ̀lɔ Kayɛn wów na. Amɛɛ si Kolocɔlɔɔ da fɔ̀lɔ Abɛli yakaanyi na lè, gee bee na wi séeraw kpéʔele Abɛli kéeli na níì jo wi n sín tágali báriga ni. Loro li gi kaan a Abɛli sèʔé i nyuu àlí n gi yaʔa wi n kùu n kwɔ́ɔ.

Tágali báriga ni fànʔa da wɔ́ɔ̀ jée Sara tiimaa ni a wi fícɛnnɛ taa, àlí n gi yaʔa wi maa lɛɛ n sɔ̀lɔ pìiseeri na, níì cán wee wi da nyɔ́ɔgi fàli wi ma lè, wi maa wee bee córo tágala syɔ́ɔn.

Níì cán wi maa ni kèkpɔɔgi sige, gee be faan lè kàpɔɔnnirio ǹjoʔo ni, Kolocɔlɔɔ si wi nyɛ gi tímanafɔw ní gi faanfɔw.

Lǎli ni Mowizi baa lɛɛ lè, a wi cée tágali báriga ni níì jo pe a ní kɔ́ ra woro yiri Faraɔnw calipile pyà í níì wɔʔɔli nyɛ́nɛ n wòlo níì jo ki a pɔ́rɔ woro í pínɛ da wɔʔɔ ní Kolocɔlɔɔ syɛ́ɛnbèle ní si kapeegèle nyáanagbɛ kèlē yaʔa gele ke a làla cɛɛri yagana kwɔ́ɔ lè. Wi maa gi tímana n gi nyaa pe ga woro wɔʔɔ Kirisi kéeli na, gee bee a pye woro ma lɔnɛʔɛrɛ bi sɔ̀lɔ Ezyipiti tári lɔ́rɔ na. Níì cán wi nyɛnɛ maa pye gi tɔ̀nɔw na. Tágali báriga ni wi da yiri Ezyipiti ni, wi ga fyáa fànʔafɔw fundanʔara na í. Níì cán wi maa ni kpàracogo kpéʔele, mɔ a jo wi i Kolocɔlɔɔ nyaagi, woro wee wi lè syɔɔn o wi nyaagi í.

Tágali báriga ni Abirahami da Izaaki cò n wòlo sáriga, lǎli ni Kolocɔlɔɔ wi pye n wéle lè. Woro wee má Kolocɔlɔɔ da nyɔɔfaliyi kpéʔele lè, wi maa wi pìinibingi wòlo sáriga

Tágali báriga ni Arahabi da pínɛ n kùu ní sìnloʔobèle ní í, wi pye lè nànjaacew, níì cán wi maa tundunlarabèle sámaga n cò ní funjànga ní, poro bele pe da sáà Zyeriko saanri n wéle lè làrama ni.

Tágali báriga ni Isirayɛli ye da Sólomi Lònyɛnʔɛ jeli mɔ a jo táwaara tɛ́ʔɛ gii, a Ezyipiti ye ga jo poro a ŋàʔana bi gi jeli, a gi be wáa.

Tágali báriga ni Zyeriko tǒw da too, lǎli ni Isirayɛli syɛ́ɛnbèle gi màʔa n kwɔ́ɔ lè cányi kɔrɔsiin.

Tágali báriga ni wi da Isirayɛli ye pye be Sɔ̀lɔ-mí-yaʔali séri kpéʔele, bé sìsyaanw nyari nyari kpaaweegèle na, koro ga pye nyɛ̀ʔɛni tunduɔn ga pan woro wee wi a pìiselibèle kpóo lè, wi poro wóbèle yaʔa.

Tágali báriga ni, lǎli ni Zyozɛfu da nan bi kùu lè, a wi jo Isirayɛli pìíbèle yirile kéele na, Ezyipiti ni, ní wɔ́ɔ̀ woro kaceleyi kéele joo be ma.

Tágali báriga ni Zyakɔbi da dùbaw kpéʔele Zyozɛfu jáabèle ma nibin nibin, be lè nǎnbèle, lǎli ni wi da nan bi kùu lè, níì kogo wi kàgbeeli na níì Kolocɔlɔɔ kpɔ̀ʔɔrɔ.

Tágali báriga ni Izaaki da wɔ́ɔ̀ dùbaw kpéʔele Zyakɔbi ní Ezau ma pe nyɛ̀ʔɛnaw kéele na.