Heburubèle 10
10
1Níì cán yacanri di maa lè, Mowizi làlwaw o di tiimaw tèé í, kàjáa wi i nyɛ ti kànyinnɛ. Bele be caa bi nùuni Kolocɔlɔɔ na lè, pe i sáriga-wòlori wonijanra kpéʔele yɛɛlɛ o yɛɛlɛ sìnlaʔa ni, làlwaw si a gbǎn be nyɔɔ foro sáriga-wòlori bee báriga ni í. 2Sáriga-wòlori ga maa kapeegèle yirige wi wòlofɔbèle fúnyo ni níì yi jée n mùnu tɔlɔgɔ nibin, ti mǎà dée kwɔ́ɔ ì? 3Kàjáa sáriga-wòlori bee n be kaan a be i sɔ̀ngí ni taagi be kapeegèle kéele na yɛɛlɛ o yɛɛlɛ. 4Níì cán náapɛʔɛlɛ sisyaan ní sikepɔɔlɔ wóo a gbǎn kapeegèle láʔa nyáana í.
5 #
Ŋún 40:7-9
Gee bee na lǎli ni Kirisi jée lè dulunyanw ni, a wi gi joo níì jo:
«Mɔ da ni sáriga ní yakanʔa caa í.
Kàjáa mɔ n cere sámaga n kaan mii ma.
6Sáriga-sórigow ní kapeegèle kùsulugo
sáriga da mɔ dɛ́nɛ í.
7Koro na mii jo: ‹Ee Kolocɔlɔɔ, wéle mii n pan
bi ba mɔ nyɛ́nɛ kéeli kpéʔele,
pe n mii kéeli sɛ́bɛ sɛ́bɛmigiw tɛ́ɛgaa ni.› »
8Wi maa sélì gi joo níì jo: «Mɔ da ni sárigaw, ní yakaanyi, ní sáriga-sórigow, ní kapeegèle kùsulugo sáriga caa í, dee bee tàa faala da caa wɔ́ɔ̀ mɔ dɛ́nɛ í.» Sáriga-wòlori bee si i kpéʔele ni yɛlɛgi ní Mowizi làlwaw ní. 9A wi níì jo: «Wéle, mii n pan bi ba mɔ nyɛ́nɛ kéeli kpéʔele.»
Wi n baa sáriga-séliw sàa níì siin wów télege. 10Zyezu Kirisi n baa wiyɛɛ wòlo sáriga tɔlɔgɔ nibin pée n yɛlɛ ní Kolocɔlɔɔ nyɛ́nɛ kéeli bee ní n wolo jéemununi fáli kpéʔele.
11 #
Yir 29:38
Sáriga-wòlobèle myɛ i yèré canʔa o canʔa, ní i báara, ní i sáriga-wòlo-níjanri kpéʔele tɔlɔyɔ saʔa, toro dee di lè ti a gbǎn kapeegèle láʔa nyáana í. 12#Ŋún 110:1 Kàjáa Kirisi n kwɔ́ɔmɔ fun sárigaw wòlo syɛ́ɛnbèle kapeegéle kéele na, ní sáà tɛ́ɛn Kolocɔlɔɔ kàliige ma 13ni lǎli sige, lee ni Kolocɔlɔɔ a ba wi nigoobèle myɛ kpéʔele wi tɔ́lɔyi yataʔaga lè. 14Níì cán bele wi jé ni mùú ni yaari Kolocɔlɔɔ ma lè, wi n bele bee sín n foro bàngwɔɔ yakaangi nibin báriga ni.
15Koro séeraw Pìicǎnni wɔ́ɔ̀ kpéʔele wolo ma níì jo:
«Kàfɔw wi gi joo níì jo:
16 #
Zyer 31:33
‹Lee naa li nyɛ joogaanni,
lee mii a joo kaan be ma lè cányi bee kàdoʔo ma.›
Ní níì jo: ‹Mii a ra mii kajoodɛɛngèle nii pe zɔ̌nbèle ni,
si wɔ́ɔ ra ge sɛ́bɛ be fúnyi ni.
17 #
Zyer 31:34
Mii a ní sɔ̀ngí taa be kapeegèle
ní be kakolobyeri na nyáana í.› »
18Lǎlee ni kapeegèle kùsulugo ga syɔɔ lè, nyùngo ní o nyɛ sáriga-wòloro na ge kéeli na í.
Ki n yɛlɛ wo nùuni Kolocɔlɔɔ na
19Ni senyɛ̀nnɛ, gee bee gi gi kaan a wolo soro ni jǐn tɛɛcàndelegi ni Zyezu sìsyaanw báriga ni. 20Wi n tɛɛsɔ̀lɔvɔngɔ sámaga wolo ma ki lè sìíw wóʔo, ki n foro fànipariw nínge ni n jée tɛɛcàndelegi ni, fàniw bee wi nyɛ wi céri. 21Wi i nyɛ wolo ma sáriga-wòlobèle kàfɔgbɔɔɔ Kolocɔlɔɔ kpáagi ni. 22#Lev 8:30; Ezek 36:25 Ki n yɛlɛ wolo í nùuni Kolocɔlɔɔ na ní funjànya ní, bi fàra tágala na, lee li sámaga n kpɔ́ʔɔ lè, wo nùuni wi na ní fúnyi ní, yee Kàfɔw nyari nyari ní wi sìsyaanw ní lè n sɔ̀ngubeeri yirige yi ni, ní céri ní be jée n mùnu ní lòcànga ní lè. 23Ki n yɛlɛ wolo í wolo sɔ̀ngumi tɛɛtaʔaga cò cama, gee séera wolo kpéʔele lè, níì cán wee wi nyɔɔfaligi kpéʔele lè, wi i nyɛ tágala syɔ́ɔn. 24Ki n yɛlɛ wolo í da woyɛɛ kɔ̀rɔsíi, sáā woyɛɛ kɛɛlɛ, koro ga pye wolo í da tàmaga nii ní syɛ́ɛnbèle ní, sáā kacàngēle kpéʔele. 25Ki ga yɛlɛ wolo í woyɛɛ gbóʔoroli yaʔa àmɛɛ pèle tàli ni gi kpéʔele lè í, kàjáa àmɛɛ yele cángi nyaa ki i nùuní lè, ki n yɛlɛ waa woyɛɛ kɛɛlɛ gbanʔama bi sɔ̀lɔ.
26Níì cán wolo ga woyɛɛ dɔri ní i kapeegèle kpéʔele n gi yaʔa wolo n kányɛɛgi cán n kwɔ́ɔ, wo gi cán kapeegèle kùsulugo syɔɔlɔ sárigawaa faala ga níì kòro í. 27#Eza 26:11 Kàjáa kútiiw sigele ní naakpɔɔgi sórigolo fyáakpɔɔrɔ di kòro, náagi bee ki a ba Kolocɔlɔɔ nigoobèle kálagi! 28#Làlw 17:6; 19:15 Syɔɔnwaa faala ga Mowizi làlwaw faʔa, pe n wi kpóo nyinimɛ fun, pe i gáà gee bee kpéʔele séerafɔɔlɔ siin wàlá taanri syɛ́ɛnrɛ báriga ni. 29#Yir 24:8 Syɔ́ɔnwee si wi Kolocɔlɔɔ Jáaw tánʔana lè, níì Pìicǎnni mɛ́ʔɛ kálagi li kpɔ́ʔɔri kaangi woro ma lè, níì joogaanni sìsyaan córo yafaʔaga, wee ní Kolocɔlɔɔ wi jée n mùnu n yaʔa wiyɛɛ ma lè, yele ga gi cán Kolocɔlɔɔ a wee bee córo wi n yɛlɛ ní wɔʔɔli ní n sɔ̀lɔ Mowizi làlwaw faʔafɔlɔ na ì? 30#Làlw 32:35-36 Níì cán wolo n syɛ́ɛnri naa joofɔlɔ cán, woro wee wi gi joo lè níì jo: «Mii má kapeegèle fwɔɔtɔnrɔ nyɛ, mii a ge fwɔ́ɔli tɔ́n.» Ní níì jo: «Kàfɔw a wi syɛ́ɛnbèle kútii joo.» 31Bi jée Kolocɔlɔɔ woweew kɔ́yɔ ni, gee bee i nyɛ fyáakpɔɔrɔ kéele!
32Ki si n yɛlɛ yele í da sɔ̀ngí da taagi booma cányi na, àmɛɛ yele da gbɛ̀ɛ́nmi taa lè, á wɔʔɔgbɔɔli fala n too yele na lè, á yele li kpàraco, 33koro gi nyɛ pe maa ni yele mɛ́ɛyi kálagi ní i yele wɔʔɔ syɛ́ɛnbèle nyɛ́nɛ na, á yele wɔ́ɔ̀ pínɛ ni wɔʔɔ ní pèle nikwɔɔlɔ ní pe wɔʔɔli ni. 34Níì cán yele n pínɛ n wɔʔɔ ní kàsolebèle ní, lǎli ni yele wɔʔɔfɔbèle yele kɔ́lɔ yáriri nɛnɛ n syɔɔ yele ma lè, a yele yére gi ni ní fundaanra ní, àmɛɛ yele gi cán lè ncan bàngwɔɔ yáriga i nyɛ yele ma, gee gi nyɔɔ n sɔ̀lɔ lè. 35Gee bee na ki ga yɛlɛ yele í kɔ́ yele sɔ̀ngumi tɛɛtaʔaga yaʔa í, tɔ̀nɔkpɔɔɔ i nyɛ gi ni! 36Ki n yɛlɛ yele í da kpàracogo kpéʔele koro ga pye yele í Kolocɔlɔɔ nyɛ́nɛ kéeli foro, koro kàdoʔo ma, gee nyɔ́ɔ wi fàli yele ma lè, yele si náa gi taa àmɛɛ wi syɛɛnsɛbɛri gi joo lè níì jo:
37 #
Hab 2:3-4
«Wee wi maa lè,
ki n kòro cɛɛri wi nan naa!
Wi a ní mɔn í.
38Mii syɔ́ɔnwee wi sín lè,
wi a sìi taa tágali báriga ni.
Wi si ga lúru kàdoʔo ma,
wi kéeli a ní mii dɛ́nɛ í.»
39Bele be lúrugu kàdoʔo ma ní i kálagi lè, wolo o nyɛ bele bee pèle í, fwɔɔ bele be tága lè, koro ga pye poro í sìíw taa, wolo i nyɛ poro pèle.
Currently Selected:
Heburubèle 10: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
