Yirile 38

Sáriga-sórigow sáriga-wòlo-yafanʔa, ní jéemununi pɛɛkpɔʔɔ kéele

1A wi sáriga-sórigow sáriga-wòlo-yafanʔa sámaga ní akasya tíire ní. Ki tɔnɔganmi maa pye mɛ́tiribéle siin ní tíla, a gi kpɔ́ʔɔganmi wɔ́ɔ i nyɛ mɛ́tiribéle siin ní tíla. Ki tɔnɔganmi ní gi yɛ́ɛgi kpɔ́ʔɔganma maa pye sèjira. Ki ǹjogi tɔnɔganma si i nyɛ mɛ́tiri nibin ní tíla. 2A wi nyɛngéle sámaga ki jɛ̀ɛ́ngèle sicɛrɛ na. Wi maa ge sámaga n pínɛ ní gi ní, níì kanyɛɛnrɛ tɛ́ʔɛ n gi tɛ́ɛyi myɛ tɔ́n. 3A wi sáriga-wòlo-yafaangi yayigelere myɛ sámaga ní kanyɛɛnrɛ ní, ti lè gi cɔ́ɔngi yaleye, ní gi cɔ́ɔngi yakoliyo, ní gi nyari-nyarili pɛ́ɛgéle, ní gi kaà-síbele ŋáayi, ní gi naàniganw yaleye. 4A wi kanyɛɛnrɛ cɔ̀ɔkpoloo sámaga, a wi pye àmɛɛ cɔ̀ɔwaa félege nyɛ lè, n cáan ki nyɔɔwari tìgimɛ ni fungo ma, a wi sáriga-wòlo-yafaangi tíla n séli táàma n baa yére ǹjoʔomaw tíla na. 5A wi kanyɛɛnraa kpúmɔn vèʔeye sicɛrɛ n le kanyɛɛnri cɔ̀ɔ jɛ̀ɛ́ngèle sicɛrɛ na, a yoro pye tíingèle tɛɛleye. 6A wi akasya tíiri tíingéle sámaga, níì kanyɛɛnrɛ tɛ́ʔɛ n ge tɛ́ɛyi myɛ tɔ́n. 7A wi tíingèle foro kanyɛɛnri vèʔeye ni yi pye lè sáriga-wòlo-yafaangi lɛ̀ʔɛgēle ni, a koro pye sáriga-wòlo-yafaangi láala tíingéle. Wi maa sáriga-wòlo-yafaangi bee sámaga ní tiikpakpaaya ní, níì gi nɔ́gi yaʔa wovorovalaga ní.

8A wi kanyɛɛnri pɛɛkpɔʔɔ sámaga. Ki nɔ́gi si wɔ́ɔ i nyɛ kanyɛɛnrɛ. Cébèle bele pe da ni báara Syɛ́ɛnmi Tɛɛfaraga fànikpaʔa nyɔ́ɔ na lè, poro kanyɛɛnri dùbalebéle wi da tɛ́ʔɛ n pɛɛkpɔɔgi, ní gi nɔ́gi sámaga.

Kàcooli sùlulo fàniya kéele

9A wi kàcooli sámaga. Fànibèle wi da tɛ́ʔɛ n li sùlu wòrogulo kàbangi na lè, pe maa pye lɛn fànifɛɛlɛfɛɛlɛɔ, wee be sára lè. Kàcooli tɔnɔganma maa pye mɛ́tiribéle togoye siin ní kpɔrigɔ. 10Pe gàángèle toko, ní ge yataʔayi toko maa pye kanyɛɛnrɛ. Gàángèle yacɔrɔgéle, ní ge kpèeparigèle maa pye wálifiio wóro. 11Solomɔkulo kàbangi fànibēle tɔnɔganma maa pye mɛ́tiribéle togoye siin ní kpɔrigɔ, n fàra pe gàángèle toko, ní ge kanyɛɛnri yataʔaya toko na. Gàángèle yacɔrɔgéle, ní ge kpèeparigèle maa pye wálifiio. 12Canʔajeemɛ kabangi fànibēle tɔnɔganma maa pye mɛ́tiribéle toko ní kagunɔ, pe gàángèle ní ge yataʔayi si i nyɛ kɛɛ-gɛɛ. Gàángèle yacɔrɔgéle, ní ge kpèeparigèle maa pye wálifiio. 13Canʔafolomɔ kabangi, n wáa canʔafolomɔ ma, koro maa pye mɛ́tiribéle toko ní kagunɔ. 14Kàbangɔgaa fànibēle maa pye mɛ́tiribéle kɔrɔsiin ní tíla, n fàra be gàángèle taanri, ní ge yataʔayi taanri na, 15kàbangɔ-siin wógi gi sɔʔɔ gee ni lè kàcooli tɛɛ̀jeele ma, á koro pye fànibēle mɛ́tiribéle kɔrɔsiin ní tíla, n fàra be gàángèle taanri, ní ge yataʔayi taanri na.

16Kàcooli sùlulo fànibēle myɛ maa pye lɛn fànifɛɛlɛfɛɛlɛɔ wòolo, wee be sára lè. 17Gàángèle yataʔaya maa pye kanyɛɛnrɛ, á gàángèle yacɔrɔgéle, ní ge yakparagèle pye wálifiio, a ge ǹjogi yataʔaya tɔ́n ní wálifiio ní. Wálifiio yakparagéle pe da tɛ́ʔɛ n kàcooli gàángéle myɛ sogi keyɛɛ na. 18Kàcooli kpaaweetɔn-fàni maa pye n yɛlɛ ní fànisuuri fáli pyeganma ní. Wi maa pye kɔ́luruna cére, ní fàninyɛɛɔn, ní fàninyɛɛn-tèleo, ní lɛn fànifɛɛlɛfɛɛlɛɔ, wee be sára lè. Wi níngi tɔnɔganma maa pye mɛ́tiribéle kɛɛ. Wi ǹjogi tɔnɔganma si i nyɛ mɛ́tiribéle siin ní tíla, n yɛlɛ ní kàcooli fànibēle yɛ́ɛyɛ kpóloganma ní. 19Gàángèle sicɛrɛ, ní ge yataʔayi sicɛrɛ maa pye kanyɛɛnrɛ, ke yacɔrɔgèle, ní ge yakparagèle si i nyɛ wálifiio, á be wálifiiwaa tɛ́ʔɛ n ge ǹjogi yataʔaya tɛ́ɛyɛ myɛ tɔ́n. 20Kpɔ̀ʔɔrɔli fànikpaʔa ceferigéle myɛ, ní kàcooli sùlulo cèferigéle myɛ maa pye kanyɛɛnrɛ.

Fànikpaagi sámagala yárira córomɔ kéele

21Kpɔ̀ʔɔrɔli fànikpaʔa gi lè séeraw fànikpaʔa, koro sámagali yárira córomɔ bi nyɛ bee naa bi yɛlɛ ní tundunri ní Mowizi da joo n gbàn Levii ye ma be yákirii yaʔa di na lè. Aarɔn wi lè sáriga-wòlow, woro jáaw Itamari wi da pye pi yɛ́ɛgi na. 22Gee myɛ Yawe da joo n gbàn Mowizi ma lè, Urii jáaw Besaleyɛli wi lè Zyuda syɛɛnfelegi wówaa, woro maa gee bee kpéʔele n foro. Urii wi pye lè Besaleyɛli tóow, woro tóow pe da ni yiri Huri. 23Besaleyɛli dɛ̀ɛmɛfɔw wi pye Ahisamaki jáaw Oholiyabi, wi pye lè Dan syɛɛnfelegi wówaa. Woro maa wɔ́ɔ̀ pye sícilimi fáli cánvɔwaa, ní tiitaɔn, ní i falifɔɔn sélegi, ní i fàniw súu, wi lè kɔ́luruna céri fàni félege, ní fàninyɛɛnw, ní fàninyɛɛn-tèlew, n fàra lɛn fànifɛɛlɛfɛɛlɛw na.

24Tɛ́ɛw Isirayɛli syɛ́ɛnbèle kaan lè sáriga-fíigeo, á be wi le tɛɛcǎngi fáli ni lè, wi maa pye cúlobéle saala sicɛrɛ ní togoye taanri ní kpɔrigɔ ní kɔrɔsiin, ní gíramibéle sirakele ní dabata, n yɛlɛ ní tɛɛcǎngi cúlo líbeganma ní.

25 # Yir 30:11-16; Mat 17:24 Wálifiiw wi da kaan lè syɛ́ɛnbèle córomɔ lala ni, wi maa pye cúlobéle selebinnɛ ní saala kagunɔ ní kɛɛ ní kɔrɔsiin, ní gíramibéle saala taanri ní togoye kɔrɔsiin ní kpɔrigɔ, n yɛlɛ ní tɛɛcǎngi cúlo líbeganma ní. 26Gíramibéle kagunɔ kagunɔ n yɛlɛ ní tɛɛcǎngi wáli nyɔ́ɔ ní, woro wi pye nǎnbèle myɛ nibin nibin nyúnyo na, poro bele sirakamayɛ toko ní kpɔrigɔ ní selebinnɛ ní saala kɔrɔsiin ní togoye kɔrɔsiin ní kpɔrigɔ be córo lè, n séli yɛ̀ʔɛlɛ toko wóbèle na ni syée yaà. 27A be wálifiiw cúlobéle selebinnɛ ní saala kagunɔ gbàla n yataʔaya dabata sámaga tɛɛcǎngi gàángéle, ní fànipariw gàángéle kéele na. Yataʔaga o yataʔaga maa pye wálifiio cúlobéle toko ní kpɔrigɔ. 28A be wálifiiw cúlobéle kɛɛ ní kɔrɔsiin, ní gíramibéle saala taanri ní togoye kɔrɔsiin ní kpɔrigɔ tɛ́ʔɛ n kàcooli sùlulo gàángéle yacɔrɔgéle, ní ge yakparagèle sámaga, ní wɔ́ɔ̀ ge ǹjogi yataʔaya tɔ́n.

29Kanyɛɛnri Isirayɛli syɛ́ɛnbèle kaan lè sáriga-fíigeo, ti líbeganmi maa pye cúlobéle selebinnɛ ní togoye kɔrɔni ní sicɛrɛ. 30A be dee bee kpéʔele Syɛ́ɛnmi Tɛɛfaraga fànikpaʔa tɛɛ̀jeele gaangéle yataʔaya, ní kanyɛɛnri sáriga-wòlo-yafanʔa, ní kanyɛɛnri cɔ̀ɔ, ní wɔ́ɔ̀ sáriga-wòlo-yafaangi yayigelere myɛ sámaga ní di ní, 31n fàra kàcooli sùlulo gàángéle yataʔaya, ní kàcooli kpàánweele gaangéle yataʔaya na, n níì fàra kpɔ̀ʔɔrɔli fànikpaʔa ceferigéle, ní kàcooli sùlulo cèferigéle na.

Currently Selected:

Yirile 38: CB10

Highlight

Compare

Copy