Yirile 39

Sáriga-wòlobèle yalere kéele: Efɔdiw

1 # Yir 28:2-14 A be tɛɛcǎngi falipye-buroyo sámaga ní kɔ́luruna céri fàni, ní fàninyɛɛnw, ní fàninyɛɛn-tèlew ní. A be sáriga-wòlo-búroyi sámaga Aarɔn ma, n yɛlɛ ní gi ní àmɛɛ Yawe da gi joo n gbàn Mowizi ma lè.

2A be efɔdiw sámaga ní tɛɛ̀ ní n fàra kɔ́luruna céri fàni, ní fàninyɛɛnw, ní fàninyɛɛn-tèlew, ní lɛn fànifɛɛlɛfɛɛlɛɔ na, wee be sára lè. 3A be tɛɛ̀ yafabi-fabiya sámaga níì yi cɛnɛ mɛɛngéle, níì ge foro foro kɔ́luruna céri fàni, ní fàninyɛɛnw, ní fàninyɛɛn-tèlew, ní lɛn fànifɛɛlɛfɛɛlɛw ni, wee be sára lè. Ki maa sámaga n yɛlɛ ní kacánmi fáli pyeganma ní. 4A be fókaannyunyo yáriya sámaga n táriga wi láʔagèle siin na bi wi cò yérige. 5Sɛntiiriw wi pye efɔdiw na lè, pe maa wi sámaga kanijanmi na ní tɛɛ̀ ní, n fàra kɔ́luruna céri fàni, ní fàninyɛɛnw, ní fàninyɛɛn-tèlew, ní lɛn fànifɛɛlɛfɛɛlɛw na, wee be sára lè. Wi maa tìin n pínɛ ní efɔdiw ní n yɛlɛ ní gi ní àmɛɛ Yawe da gi joo n gbàn Mowizi ma lè. 6A be onikisi kàdɛɛngèlē sámaga n le le tɛ́ɛw wéegéle ni. Pe maa Isirayɛli jáabèle mɛ́ɛyɛ kánʔana n wòlo ge na àmɛɛ be mɛ́ʔɛ fɛɛ yáriga kánʔana ni wóo lè. 7A pe ge le le efɔdiw fókaannyunyo yáriya na, a ge pye sɔ̀ngudaara kàdɛɛngèlē Isirayɛli jáabèle kéele na, n yɛlɛ ní gi ní àmɛɛ Yawe da gi joo n gbàn Mowizi ma lè.

Fìcibigi yáriga kéele

8A be fìcibigi yáriga sámaga, ki maa sámaga n yɛlɛ ní kacánmi fáli pyeganma ní, n yɛlɛ ní efɔdiw sámagaganma ní, wee be sámaga lè ní kɔ́luruna céri fàni, ní fàninyɛɛnw, ní fàninyɛɛn-tèlew ní, n fàra lɛn fànifɛɛlɛfɛɛlɛw na, wee be sára lè. 9Ki tɔnɔganmi ní gi kpɔ́ʔɔganmi maa pye sèjira, á be gi wáa n taʔa n pye àmɛɛ cófaà nyɛ lè. Ki tɔnɔganmi ní gi kpɔ́ʔɔganmi maa pye santimɛtiribéle toko ní kagunɔ kagunɔ, á be gi wáa n taʔa. 10A be kadɛɛngèlē kóloyo sicɛrɛ táriga gi na. Kozeligi wòʔolo ge nyɛ: sariduwani, ní topazi, ní emerodi. 11Koziin wógi wòʔolo si i nyɛ: ɛsikaribukili, ní safiiri, ní jaman. 12Kodaanri wógi wòʔolo si i nyɛ: opali, ní agati, ní amɛtiisi. 13Kosicɛrɛ wógi wòʔolo si i nyɛ: kirizoliiti, ní onikisi, ní zyasipi.#39:10-13 Kàdɛɛngèle féleye kàlawaga wéle. Pe maa kàdɛɛngèle bee sámaga n le tɛ́ɛw ni. 14Kàdɛɛngèle bee maa pye Isirayɛli jáabèle nyɔ́ɔ na kɛɛ ní siin. Isirayɛli syɛɛnfeleyi kɛɛ ní siin mɛ́ɛyɛ maa kánʔana n wòlo ke myɛ nibin nibin na mɛ́ɛyɛ fɛɛ yáriya sámagaganma na.

15A be nyɔ̀ʔɔdirigéle sámaga ní tɛɛteleo ní. Pe maa ge mígele keyɛɛ na àmɛɛ mɛɛnnɛ nyɛ lè, níì ge le le fìcibigi yáriga na. 16A be tɛɛ̀ wéegéle siin sámaga, n fàra tɛɛ̀ vèʔebēle siin na, níì tɛɛ̀ vèʔebèle siin le fìcibigi yáriga nyúnyo siin na. 17A be tɛɛ̀ mɛ́ɛngèle siin le vèʔebèle siin na pe nyɛ lè fìcibigi yáriga nyɔ́ɔyɔ siin na. 18A be sáà mɛ́ɛngèle nyɔ́ɔyee siin le wéegèle siin na ke nyɛ lè efɔdiw fókaannyunyo yáriya siin na yɛʔɛ̀ ma. 19A be níì tɛɛ̀ vèʔebēle siin sámaga n táriga fìcibigi yáriga jɛɛngèle gele siin na, fungomaw kàgo-nyɔ́ɔ na wi táriga efɔdiw na lè. 20A be níì tɛɛ̀ vèʔebèle pèle siin sámaga n le efɔdiw fókaannyunyo yáriya siin láara ni, yɛʔɛ̀ ma, tɛɛsogigi taana, efɔdiw sɛntiiri ǹjoʔo ma. 21A be fìcibigi yáriga pwɔɔ ki vèʔebèle, ní efɔdiw vèʔebēle na n táriga tiyɛɛ na ní kɔ́luruna cére mɛ́ɛnnɛ ní, koro ga pye fìcibigi yáriga í kòro efɔdiw sɛntiiri na, ki a kɔ́ gbǎn láʔa efɔdiw na í. Pe n koro myɛ kpéʔele n yɛlɛ ní gi ní àmɛɛ Yawe da gi joo n gbàn Mowizi ma lè.

Sáriga-wòlo-yalezanri kéele

22Búrogee na efɔdiw a ra nii da taari lè a be koro sámaga ní fàni ní, wee myɛ be tìin kɔ́luruna cére na lè. 23Níì gi yátiigi kúun níngi ni, níì gi taʔala cama ni, n gi màʔa àmɛɛ saliga búrogo nyɛ gee be tìin lè, koro ga pye ki a kɔ́ sulu í. 24A be girenadi sámaga buronyɔɔw na ní jèseenirio ní, a di pye kɔ́luruna cére na, n fàra wonyɛɛnrɛ, ní wonyɛɛntelere na, 25níì tɛɛteleo wèegēle sámaga n le le girenadiw lariya ni, buronyɔɔw na n gi màʔa. 26Pe ga wèelaa nibin le, pe n girenadi nibin taʔa li na, si ní làa nibin le, si girenadiwaa nibin taʔa, n gi pye nya n buronyɔɔw màʔa n kpàra, koro ga pye fáliw í pye bi yɛlɛ ní gi ní àmɛɛ Yawe da gi joo n gbàn Mowizi ma lè.

27A be lɛn fɛ́ɛlɛfɛɛlɛɔ búrodɔnɔyɔ tìin Aarɔn ní wi jáabèle ma, 28níì nyùnbwɔɔyɔ, ní kpɔɔmɔ nyùndɔnyɔ sámaga be ma ní lɛn fànifɛɛlɛfɛɛlɛɔ ní bi be kpɔ́ɔmi tɛ̀ɛn, n fàra kùrusiibéle na, bele be sámaga lè ní lɛn jèseenirio fànifɛɛlɛfɛɛlɛɔ ní, 29ní lɛn fànifɛɛlɛfɛɛlɛw be sára lè, woro sɛntiiriw be súu lè, wí i nyɛ kɔ́luruna cére, ní wonyɛɛɔn, ní wonyɛɛnteleo, n yɛlɛ ní gi ní àmɛɛ Yawe da gi joo n gbàn Mowizi ma lè.

30A be tɛɛteleo jàra yafabi-fabigi sámaga n yaʔa kɔlɔ̀ na Kolocɔlɔɔ ma, níì sɛ́bɛri kánʔana n wòlo gi na n yɛlɛ ní mɛ́ɛyi fɛ̀ɛ yáriya sɛ́bɛganma ní. A di jo: «Yaʔa wojaɔn ní Yawe ma.» 31A be kɔ́luruna cére mɛ́ɛnnɛ le gi na bi gi pwɔɔ táriga nyùnbwɔɔgi na, ǹjoʔo ma, n yɛlɛ ní gi ní àmɛɛ Yawe da gi joo n gbàn Mowizi ma lè.

Pe n pan ní falikwɔɔri ní Mowizi ma

32Kánmi bee na kpɔ̀ʔɔrɔli fànikpaʔa fáli myɛ kwɔ́ɔ, ki lè Syɛ́ɛnmi Tɛɛfaraga fànikpaʔa. Gee myɛ Yawe da joo n gbàn Mowizi ma lè, a Isirayɛli ye gi kpéʔele kánmi bee na.

33A be pan ní kpɔ̀ʔɔrɔli fànikpaʔa ní Mowizi ma, gee bee n jo fànikpaagi ní gi yáriri myɛ ní, ti lè ki yakparagèle, ní gi tiikpakpaayi, ní gi tiipalagèle, ní gi gàángèle, ní ge yataʔayi, 34ní yatɔngi gi lè bàpɔbèle sáliya be nyɛ́nɛgɛ lè, ní yatɔngi gi lè dofɛn sáliyi wóʔo n fàra kpaaweetɔn-fàniw na. 35Ní séeraw kásu, ní wi tiingèle ní kapeegèle kùsulugo tɛ́ʔɛ. 36N fàra tàbaliw ní wi yayigeleri myɛ, ní búruw na wi kaan Kolocɔlɔɔ ma lè, 37ní tɛɛtelew fètindaʔala, ní li fètingèle pe sámaga n yaʔa lè, ní li yayigeleri myɛ, n fàra li leli sìnmɛ na, 38ní tɛ́ɛw sáriga-wòlo-yafanʔa, ní kàlifaali sìnmɛ, ní nùndaanni yasorigogo, ní fànikpaagi kpaaweetɔn-fàni, 39ní kanyɛɛnri sáriga-wòlo-yafanʔa, ní gi kanyɛɛnri cɔ̀ɔ, ní gi tíingèle, ní gi yayigeleri myɛ, ní pɛɛkpɔɔgi, ní gi nɔ́gi, 40ní kàcooli fàniya, ní li gàángèle, ní ge yataʔayi, ní kàcooli kpaaweetɔn-fàni, ní li mɛ́ɛngèle, ní li cèferigèle, ní kpɔ̀ʔɔrɔli fànikpaʔa yayigelere myɛw, ki lè Syɛ́ɛnmi Tɛɛfaraga fànikpaʔa, 41ní tɛɛcǎngi falipye-buroyo, yi lè sáriga-wòlow Aarɔn sáriga-wòlori fáli búroyo yi yaʔa kɔlɔ̀ na Kolocɔlɔɔ ma lè, ní wi jáabèle búroyo, sáriga-wòlori fáli kéele na.

42A Isirayɛli ye fáliw bee myɛ kpéʔele n yɛlɛ ní gi ní àmɛɛ Yawe da gi joo n gbàn Mowizi ma lè. 43A Mowizi fáliw myɛ sámaga n wéle, a wi gi nyaa a be wi kpéʔele n yɛlɛ ní gi ní àmɛɛ Yawe da gi joo n gbàn lè. Lǎli bee ni a Mowizi dùba kpéʔele be ma.

Currently Selected:

Yirile 39: CB10

Highlight

Copy

Compare