Yirile 37

Joogaanni kásu kéele

1A Besaleyɛli kásuw sámaga ní akasya tíire ní. Wi tɔnɔganmi maa pye mɛ́tiri nibin ní santimɛtiribéle toko ní kagunɔ. Wi yɛ́ɛgi kpɔ́ʔɔganma si i nyɛ santimɛtiribéle togoye taanri ní kpɔrigɔ ní kagunɔ. A wi ǹjogi tɔnɔganma wɔ́ɔ̀ pye santimɛtiribéle togoye taanri ní kpɔrigɔ ní kagunɔ. 2A wi wi tɛ́ɛyi myɛ tɔ́n ní tɛɛteleo ní, n fúngi pínɛ kàdogi ní, níì wi nyɔɔwari pye tɛɛ̀ n wi màʔa n kpàra. 3A wi tɛɛwaa gbàla n vèʔeye sicɛrɛ sámaga n táriga wi jɛ̀ɛ́ngèle sicɛrɛ na. Vèʔeye siin maa pye kàbangee na, a yàa siin i nyɛ kàbangee na. 4A wi tiingéle sámaga akasya tíire woʔolo, níì ge tɛ́ɛyi myɛ tɔ́n ní tɛɛ̀ ní. 5A wi tiingèle foro foro vèʔeyi ni, kásuw lɛ̀ʔɛgēle ni, jàngó bàā kásuw lée.

6A wi kapeegèle kùsulugo tɛ́ʔɛ sámaga ní tɛɛteleo ní. Ki tɔnɔganmi maa pye mɛ́tiri nibin ní santimɛtiribéle toko ní kagunɔ. Ki yɛ́ɛgi kpɔ́ʔɔganma si i nyɛ santimɛtiribéle togoye taanri ní kpɔrigɔ ní kagunɔ. 7A wi syerubɛnbéle siin sámaga kapeegèle kùsulugo tɛ́ʔɛ láʔagéle siin na ní tɛɛ̀ ní, wee be kpúmɔn lè. 8Wi maa syerubɛnwaa yérige láʔalee na níì wee yérige lee na. Wi maa syerubɛnbèle sámaga n pínɛ ní kapeegèle kùsulugo tɛ́ʔɛ láʔagéle ní. 9A syerubɛnbèle bee be fókaanyi yìrige ǹjogi ni n tɛ́ʔɛ n kapeegèle kùsulugo tɛ́ʔɛ tɔ́n. Níì yɛ́ɛyi wáa peyɛɛ ma. Syerubɛnbèle maa yɛ́ɛyi le kapeegèle kùsulugo tɛ́ʔɛ ni.

Búruw wi kaan Kolocɔlɔɔ ma lè wi tàbaliw

10A wi tàbali sámaga akasya tíire wóo. Wi tɔnɔganmi maa pye mɛ́tiri nibin. Wi yɛ́ɛgi kpɔ́ʔɔganma si i nyɛ mɛ́tiri tíla. Wi ǹjogi tɔnɔganma si i nyɛ santimɛtiribéle togoye taanri ní kpɔrigɔ ní kagunɔ. 11A wi tɛɛteleo tɛ́ʔɛ n wi tɛ́ɛyi myɛ tɔ́n, níì wi nyɔɔwari pye tɛɛ̀ n wi màʔa n kpàra. 12A wi kádiri sámaga n wi màʔa n kpàra. Wi yɛ́ɛgi kpɔ́ʔɔganma maa pye santimɛtiribéle kɔrɔtaanri, níì tɛɛ̀ pye kádiriw nyɔ́ɔwara n wi màʔa n kpàra. 13A wi tɛɛ̀ kpúmɔn n pye vèʔeye sicɛrɛ tàbaliw kéele na, níì vèʔeyi táriga jɛ̀ɛ́ngéle sicɛrɛ na n yɛlɛ ní tɔ́lɔyi sicɛrɛ ní. 14Vèʔeyi maa pye kádiriw láara ni, a be i tíingèle nii nɛɛ bee ni tàbaliw lée. 15A wi tiingéle sámaga akasya tíire woʔolo, níì tɛɛ̀ tɛ́ʔɛ n ge tɛ́ɛyi myɛ tɔ́n. A koro pye tàbaliw láala kéele na. 16Yayigeleri di yɛlɛ paa taari tàbaliw na lè, a wi toro sámaga, di lè wi tásaayi, ní wi yagbaagèle, ní wi yalegèle ní, n fàra wi pɛ́ɛgèle na sáriga-yólogow kéele na. Wi maa di sámaga ní tɛɛteleo ní.

Fètingɔyi kɔrɔsiin fetindaʔala kéele

17 # Yir 25:31-40 A wi fètindaʔali sámaga ní tɛɛteleo ní. Wi n li sámaga ní tɛɛ̀ ní, wee be kpúmɔn lè. Li nɔ́gi ní li fètinganagi, ní li yalegèle, ní li puungèle, ní li tiifyɛɛnri niwiriye myɛ maa sámaga n pínɛ ní fètindaʔali ní. 18Fètingɔyɔ kɔrɔni maa yirige fètinganagi na lɛ̀ʔɛgèle ni. Wi maa kɔyɔ taanri yirige n pye fètindaʔali lɛ̀ʔɛlee ni, a yàa taanri pye fètindaʔali lɛ̀ʔɛlee ni. 19Amandi niwiriye yalegéle taanri, ní puungéle, ní tiifyɛɛnrɛ niwiriye maa pye fètingɔgɔ nibin na. A amandi niwiriye yalegèle kèle taanri, ní puungèle kèle, ní tiifyɛɛnri niwiriyaa wɔ́ɔ̀ pye fètingɔgee na. Fètingɔyi kɔrɔni pe yirige fètinganagi na lè, ànbée pe da yi pye. 20Gee si gi fètinganagi tiimaa kéele kwɔ́ɔ lè, amandi niwiriye yalegéle sicɛrɛ maa pye gee bee na n fàra ki puungèle, ní gi tiifyɛɛnri niwiriye na. 21Puunnɔ nibin n pye fètingɔ-séliyi siin tɛɛwàliga láara ni, fètinganagi na, a puunnaa pye fètingɔyee siin tɛɛwàliga láara ni, fètinganagi na, á puundaanri wóli pye fètingɔyee siin tɛɛwàliga láara ni. Kánmi bee na fètindaʔali fètingɔyɔ kɔrɔni da pye. 22Fètinni puungéle ní li fètingɔyi maa sámaga n pínɛ nibin. Li woboli myɛ n pye tɛɛ̀, wee be kpúmɔn lè, li n pye tɛɛteleo wólo. 23A wi li fètingèle kɔrɔsiin, ní li lele yáriri, ní li cɔɔnkoli-yáriri sámaga ní tɛɛteleo ní. 24Tɛɛteleo cúlobéle toko ní kpɔrigɔ wi da tɛ́ʔɛ n fètindaʔali ní li yayigeleri myɛ sámaga.

Nùndaanni yasorigoro sáriga-wòlo-yafanʔa

25A wi nùndaanni yasorigoro sáriga-wòlo-yafanʔa sámaga ní akasya tíire ní. Ki tɔnɔganmi maa pye mɛ́tiri tíla. Ki kpɔ́ʔɔganmi si wɔ́ɔ i nyɛ mɛ́tiri tíla. Ki tɔnɔganmi ní gi yɛ́ɛgi kpɔ́ʔɔganma maa pye sèjira. Ki ǹjogi tɔnɔganma si i nyɛ mɛ́tiri nibin. Ki nyɛ́ngèle maa sámaga n pínɛ ní gi ní. 26A wi tɛɛteleo tɛ́ʔɛ n gi tɛ́ɛyi myɛ tɔ́n, ki ǹjogi, ní gi lɛ̀ʔɛgèle myɛ, n fàra gi nyɛ́ngèle na n gi màʔa. Níì tɛɛwaa sámaga gi nyɔɔwari n gi màʔa. 27Níì tɛɛ̀ vèʔeye pye ki nyɔɔwari láara ni, ki lɛ̀ʔɛgèle siin na. Wi maa yàa siin pye kàbangee na, níì yàa siin pye kàbangee na. Tíingèle ní pe a ra gi lée lè, a vèʔeyi bee pye tíingèle bee tɛɛleye ki láali kéele na. 28A wi tíingéle sámaga akasya tíire woʔolo, níì tɛɛ̀ tɛ́ʔɛ n ge tɛ́ɛyi myɛ tɔ́n.

29A wi syɔɔn kalifaali sìnmɛ sámaga n fàra nùndaanni yáriga wodelege na, n yɛlɛ ní nùndaanna yáriga sámagafɔlɔ falipyeganma ní.

Currently Selected:

Yirile 37: CB10

Highlight

Compare

Copy