Yirile 36

1Besaleyɛli ní Oholiyabi, ní nǎnbèle myɛ be pye lè fáliw cánvɔɔlɔ, poro bele myɛ má Yawe sícilimɛ ní cánna kaan lè, koro ga pye be Kolocɔlɔɔ kpɔ̀ʔɔrɔli tɛ́ɛcànga fáli myɛ kpéʔele, poro a fáliw bee kpéʔele foro, wee kéele Yawe joo n gbàn lè.»

2A Mowizi Besaleyɛli ní Oholiyabi yeri n fàra nǎnbèle bele myɛ na be nyɛ lè fáliw cánvɔɔlɔ, poro bele fúnyo ni Yawe sícilimɛ le lè, poro bele myɛ fúnyo ni gi pye lè bi fáliw sámaga kpéʔele foro. 3Yakaanree myɛ Isirayɛli ye da ni láʔala lè n ba ni kaangi tɛɛcǎngi fáli kéele na, a falipyebèle bee i syée n sa ni dee bee lée Mowizi yɛ́ʔɛ ma. Syɛ́ɛnbèle maa ni maa canʔa o canʔa nyɛ̀ʔɛ nyɔ́ɔ na ní kínidɛnɛgi yakaanra ní Mowizi ma. 4Lǎli bee ni nǎnbèle be pye lè fáliw cánvɔɔlɔ, ni Kolocɔlɔɔ kpɔ̀ʔɔrɔli tɛɛcànga fáli kpéʔele, a poro myɛ nibin nibin fáliw yaʔa yaà, 5ní baa gi joo Mowizi ma níì jo: «Kpɔ̀ʔɔrɔli tɛ́ɛcànga sámagala kéele Yawe joo n gbàn lè níì jo gi kpéʔele, syɛ́ɛnbèle i maa ní gi sámagali yárira ní a di nɛʔɛ n baa sɔ̀lɔ fáliw kánma na.» 6A Mowizi tun níì jo pe nyaari be sɔ̀lɔ syɛ́ɛnmi tɛ́ɛkòrogo ni pe gi jáari pe jo: «Nàɔn yoo cɔlɔɔ yoo, syɔɔn faala ga yɛlɛ wi ní pan ní yakanʔa ní, gee wi a wòlo bi kaan kpɔ̀ʔɔrɔli tɛ́ɛcànga fáli kéele na lè í.» Kánmi bee na be syɛ́ɛnbèle yérige, wàa ga níì pan ní yarigaa ní í. 7Yáriree pe da kaan lè, a toro fáliw kwɔ́ɔ, a tàa kòro.

Tɛɛkòrojǎngi kéele

8 # Yir 26:1-37 Nǎnbèle bele myɛ be pye lè fáliw cánvɔɔlɔ, poro bele be fáliw kpéʔele lè, a poro kpɔ̀ʔɔrɔli fànikpaʔa sámaga ní fàniya kɛɛ ní, yi n pye lɛn fànifɛɛlɛfɛɛlɛɔ wóyo, yee be sára lè yi i nyɛ kɔ́luruna cére fàni, ní fàninyɛɛɔn, ní fàninyɛɛn-tèleo wóyo, níì syerubɛnbéle sámaga yi na, n yɛlɛ ní kacánbèle fálipyeganma ní. 9Fàniyi myɛ nibin nibin tɔnɔganma n pye mɛ́tiribéle kɛɛ ní sicɛrɛ-jɛrɛ, yi yɛ́ɛyi kpóloganma si i nyɛ mɛ́tiribéle siin-ziin. Fàniyi myɛ tímanaganma n pye sèjira. 10A be fàniyi bee yàa kagunɔ sogisogi yiyɛɛ na, níì yee kagunɔ sogisogi yiyɛɛ na. 11Fàniyee yi jɔli n sogi yiyɛɛ na lè, a be kɔ́luruna cére mɛnɛpiire kùru weegèlē n táriga yi nyɔ́ɔgi na. Ní wɔ́ɔ̀ gee bee wonijanga kpéʔele fànitɔnɔyee siin wóʔo nyɔ́ɔ na pe jɔli n sogi yiyɛɛ na lè. 12A be mɛnɛpiiraa togoye siin ní kpɔrigɔ kùru weegèlē n táriga fàniyee wozelige nyɔ́ɔ na, ní wɔ́ɔ̀ tàa togoye siin ní kpɔrigɔ kùru weegèlē n táriga siin wógi nyɔ́ɔ na. Mɛnɛpiiri bee wéegéle maa sín ní keyɛɛ ní. 13A be tɛɛ̀ yakparagéle togoye siin ní kpɔrigɔ sámaga n tɛ́ʔɛ n fàniyi pínɛ n sogi yiyɛɛ na ní yakparagèle bee ní. A kpɔ̀ʔɔrɔli fànikpaʔa pínɛ n pye nibin.

14A be fàniyaa sámaga sike-síire wóyo, yoro í pye kpɔ̀ʔɔrɔli fànikpaʔa yatɔngɔ. Yi maa pye fàniya kɛɛ ní nibin. 15Fàniyi bee myɛ nibin nibin tɔnɔganma maa pye mɛ́tiribéle kɛɛ ní kagunɔ kagunɔ. Yi yɛ́ɛyi kpóloganma si i nyɛ mɛ́tiribéle siin-ziin. Fàniyi bee kɛɛ ní nibin tímanaganma maa pye sèjira. 16A be fàniyi bee yàa kagunɔ sogisogi yiyɛɛ na níì yee kɔrɔni sogisogi yiyɛɛ na yi kologo. 17Fàniyee kagunɔ be jɔli n sogisogi yiyɛɛ na lè, a be mɛnɛpiire togoye siin ní kpɔrigɔ kùru weegèlē n táriga kagunɔ wógi nyɔ́ɔ na. Yee kɔrɔni be jɔli n sogisogi yiyɛɛ na lè, a be wɔ́ɔ̀ mɛnɛpiiraa togoye siin ní kpɔrigɔ kùru weegèlē n táriga kɔrɔni wógi nyɔ́ɔ na. 18A be kanyɛɛnrɛ yakparagéle togoye siin ní kpɔrigɔ sámaga n fàniyi bee sogi yiyɛɛ na, koro ga pye yi pye nibin. 19A be yatɔngɔ sámaga fànikpaagi na ní bàpɔɔlɔ sáliya ní, yee be nyɛ́nɛgɛ lè, ní wɔ́ɔ̀ yatɔngaa sámaga ní dofɛn sáliya ní, n koro taʔa yee myɛ ǹjoʔo ni.

20A be tiikpakpaaya sámaga akasya tíire wóyo kpɔ̀ʔɔrɔli fànikpaʔa kéele na, níì yi yìrige n yérige. 21Tiikpakpaayi myɛ nibin nibin tɔnɔganma maa pye mɛ́tiribéle kagunɔ kagunɔ. Yi yɛ́ɛyi kpóloganma si i nyɛ santimɛtiribéle togoye taanri ní kpɔrigɔ ní kagunɔ kagunɔ. 22Tɔlɔyɔ siin-ziin maa pye tiikpakpaayi myɛ nibin nibin na, á be yi táriga yiyɛɛ na n kári. Kánmi bee na be Kolocɔlɔɔ kpɔ̀ʔɔrɔli fànikpaʔa tiikpakpaaya sámaga. 23Pe maa tiikpakpaaya toko sámaga wòrogulo kàbangi na kpɔ̀ʔɔrɔli fànikpaʔa kéele na. 24A be wálifiio yataʔaya togoye siin sámaga tiikpakpaayi toko láara ni. Yataʔaya siin-ziin yi pye tiikpakpaayi myɛ nibin nibin láara ni jàngó tiikpakpaʔa o tiikpakpaʔa tɔ́lɔyɔ siin í taʔa yee bee na. 25A be tiikpakpaaya toko pye kpɔ̀ʔɔrɔli fànikpaʔa kàbanziin wóʔo na, solomɔkulo kàbangi na, 26n fàra yi wálifiiw yataʔaya togoye siin na. Tiikpakpaʔa o tiikpakpaʔa maa yére yataʔaya siin na. 27Kpɔ̀ʔɔrɔli fànikpaʔa kadoʔo ma wi pye lè canʔajeemɛ kabangi, pe maa tiikpakpaaya kɔrɔni pye kàbangi bee na. 28A be tiikpakpaayaa siin pye canʔajeemɛ kabangi jɛ̀ɛ́ngéle na fungo ma. 29Pe maa yi sígi yiyɛɛ na táàma ní sáà yi fínaagèle cò n sámaga n táriga yiyɛɛ na ní vèʔege ní. Koro wonijangi pe da kpéʔele yee myɛ siinw na yi pye jɛ̀ɛ́ngèle siin na lè. 30Anbée tiikpakpaayi kɔrɔtaanri da pye, n fàra yi wálifiiw yataʔaya kɛɛ ní kɔrɔni na. Yataʔaya siin-ziin maa pye tiikpakpaayi myɛ nibin nibin láara ni.

31A be tiipalagéle kagunɔ sámaga akasya tíire woʔolo kpɔ̀ʔɔrɔli fànikpaʔa lɛʔɛlee tiikpakpaaya kéele na, 32tiipalagèle kèle kagunɔ si i nyɛ kpɔ̀ʔɔrɔli fànikpaʔa lɛʔɛziin wóli kàdoʔo ma tiikpakpaaya kéele na canʔajeemɛ kabangi na. 33A be níngi tiiparila sámaga, a loro foro tiikpakpaayi ni n séli láʔalee ma n sáà nan lee na. 34A be tiikpakpaayi tɛ́ɛyɛ myɛ tɔ́n ní tɛɛ̀ ní, níì yi vèʔeyi pye tɛɛ̀ wóyo jàngó tiipalagèle í foro nɛɛ bee, níì tiipalagèle tɛ́ɛyɛ myɛ tɔ́n ní tɛɛ̀ ní.

35A be fànipariw sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo, ní lɛn fànifɛɛlɛfɛɛlɛɔ ní, wee be sára lè, níì syerubɛnbéle sámaga fànipariw na n yɛlɛ ní kacánmi fálipyeganma ní. 36A be akasya tíire gaangéle sicɛrɛ sámaga wi kéeli na, níì tɛɛ̀ tɛ́ʔɛ n ge tɛ́ɛyi myɛ tɔ́n, n fàra tɛɛ̀ yacɔrɔgéle na. Níì wálifiio gbàla n kpéʔele gàángèle yataʔaya sicɛrɛ.

37A be fànikpaagi kpaaweetɔn-fàni sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo ní, n fàra lɛn fànifɛɛlɛfɛɛlɛɔ na, wee be sára lè. Ki maa pye fàni súuro fálipyeganma na. 38A be wi gàángèle kagunɔ sámaga, n fàra ge yacɔrɔgèle na. A be tɛɛ̀ tɛ́ʔɛ n ge ǹjogi yataʔaya, ní ge vèʔeyi tɛ́ɛyɛ myɛ tɔ́n. Ke yataʔayi kagunɔ n pye kanyɛɛnrɛ.

Currently Selected:

Yirile 36: CB10

Highlight

Compare

Copy