Kapyegèle 27
27
Pe n Pɔli tórigo Wɔrɔmi ma
1Amɛɛ be gi tímana n kwɔ́ɔ lè wolo í jée bàtowaa ni bi kári Italii tári ma lè, a be Pɔli ní kàsolebèle pèle pínɛ n kaan fànʔafɔgbɔɔw sùlasiibéle dabata kàrigafɔwaa ma pe i wi yiri Zyulusi. 2A wolo jée Adiramiti bàtowaa ni, wee wi sɔ́lɔgi ni sɔ̀lɔ́ lè Azii tári kàgomɔ na ni syée, Arisitaki si maa pye ní wolo ní, wi i nyɛ Maseduwani tári wówaa, níì yìri Tesaloniki ma. 3Ki nyǐndaligi na a wolo nan Siidɔn na. A Zyulusi kacànna kpéʔele Pɔli na nɛɛ bee, níì cán wi maa fɔ̀lɔ n wi yaʔa a wi kári wi tàannyɛnbèle ma, koro ga pye pe sa wi dɛ̀ɛmɛ. 4Koro kàdoʔo ma a wolo yiri nɛɛ bee ni Syipiri tári sɔ́lɔgi n di yaʔa wolo ní káfalagi nínge ni, níì cán káfalagi maa ni wolo fàrá. 5A wolo Silisii ní Panfilii sɔ́lɔgɔ n sáà nan Miira na ki lè Lisii ni. 6A sùlasiibèle kàrigafɔlɔ Alɛkisandirikaʔa ye bàtowaa nyaa yaà, wee wi syée lè Italii ma, a wi wolo lége wee bee ni.
7A wolo lǒgi tánʔana kpéʔele yɛrirɛ canya saʔa ni n ŋàʔana n sáà nan Kiniidi zǐnmi na. Tánʔani bee si maa tɔ̀nɔ n gbàn, àmɛɛ káfalagi da ni wolo yéregi lè wolo a ní gbǎn kári yɛʔɛ̀ ma zǐnmi bee na í, a wolo i syée Salimone zǐnmi na n Kirɛti tári yaʔa wolo ní káfalagi nínge ni. 8Kirɛti tári taana sɔ̀lɔlɔ si maa gbàn wolo ma n sɔ̀lɔ, a wolo sáà nan tɛɛgaa na pe i gi yiri Bàtobèle Tɛɛ̀yérejànga, gee taana Laze kěgi pye lè.
9Amɛɛ làla saʔa sɔ̀lɔ lè, a lǒgi tánʔana kòro ní fyáara ní, níì cán súnle-lali maa sɔ̀lɔ n kwɔ́ɔ#27:9 súnle-lali maa sɔ̀lɔ n kwɔ́ɔ: Zyefubèle súnle-lala ga sɔ̀lɔ, ki i gáà kòro cɛɛri wéeri làla n si nan, á bàtow fànganma si gbàn wéeri làla ni. gee bee na Pɔli da be sàmi 10níì jo: «Syɛ̀ɛnnɛ, mii n gi nyaa lǒgi naa tánʔana a pye ní wɔʔɔlɔ, ní kálagigbɔɔlɔ ní, bàtow ní wi fúngi túgoro yagana si ban ti a kálagi í, fwɔɔ wolo tiimaa a wɔ́ɔ pínɛ kálagi wi ni.»
11Kàjáa a sùlasiibèle kàrigafɔlɔ bàtow fɔ́lɔ ní wi fànvɔw syɛ́ɛnrɛ lóʔo n sɔ̀lɔ Pɔli wóri na. 12Tɛ́ɛgi bee da nyɔɔ bàtow í gbǎn yére yaà bi taa wéeri làla í sɔ̀lɔ í, a be saamaw jo be yiri nɛɛ bee pe ŋàʔana be nan Fenikisi na pe sa wéeri làla kwɔ́ɔ nɛɛ bee, ncan tɛ́ɛgi bee i nyɛ bàtobèle tɛɛ̀yéregaa Kirɛti tári ni. Ki i nyɛ canʔajeemɛ ma.
Káfalakpɔɔgi yìrile kéele sólomi lɔ̀ʔɔ ǹjoʔo ni
13Amɛɛ káfalagi da yìri lè canʔa parima ma wòrogulo kàbangi na ni funu yɛrirɛ, a be i gi sɔ̀ngí ki a kpéʔele poro nyɛ́nɛ pyele na, a be bàto-yérige-tunmɔjinigi yirige lǒgi ni n lége bàtow ni, níì fala ni Kirɛti tári sɔ́lɔgi ni syée, ní i sɔ̀ngí poro a kɔ́ léeli di na í. 14Kàjáa a cɛɛri ga pye a káfalakpɔʔɔ yìri tári bee ma, pe i káfalagi bee yiri Urakilɔn. 15A gi i bàtow fíigi ni máari, wolo fánʔa ga taa káfalagi na í, a wolo tɔ̀ʔɔ́ ján n woyɛɛ yaʔa gi ma. 16A wolo sa ni lǒgi nínge tápiipiilaa sɔ́lɔgi n li yaʔa wolo ní káfalagi nínge ni, pe i li yiri Koda, a wolo gbàn n kɔ́rɔw pwɔɔ n lége bàtow ni,#27:16 a wolo gbàn n kɔ́rɔw pwɔɔ n lége bàtow ni: Pe ga bàtow sámaga, pe n kɔ́rɔbèle pèle sámaga n le yaà bàtow fúngo ni bàtow kálagila kéele na. Kàjáa pe maa kɔ́rɔw bee pwɔɔ bàtow na a wi i wi kíle ni syée. kàjáa wi pwɔɔganmi maa tɔ̀nɔ n gbàn. 17A wo ga wi yìrige n lége n kwɔ́ɔ, a be yapwɔɔyi láa n bàtow pwɔɔ jàngó wi a kɔ́ jaa í. Amɛɛ pe da wɔ́ɔ ni fɛ̀ɛgí lè níì jo, ki ga yɛlɛ bàtow í kɔ́ tìgí tɛ́ɛn Siriti tɛ́ɛgi lɔ̀ʔɔ táminyɔɔ na í, a be fànikpɔɔgi#27:17 fànikpɔɔgi: Fànikpɔɔgi bee félege maa bàtow kaan a wi i syée kelekele, àmɛɛ káfalagi jǐn gi ni lè. kùru n láʔa bàtow na níì wi yaʔa káfalagi kɔ́yɔ ni. 18Cángi bee nyǐndaliga na a be bàtow túgoraa yirige n wáa lǒgi ni, àmɛɛ káfalagi dígi wo ni n caanri lè, 19a canya taanri ga kwɔ́ɔ, a be níì bàtofan-yáriri yirige ní be tiimaa kɔ́yi ní n wáa lǒgi ni. 20Canya saʔa maa tɔ̀nɔ n kwɔ́ɔ, canʔa ga nyaa í, ŋɔripiigèlē ga wɔ́ɔ̀ nyaa í, á káfalakpɔɔgi kòro ni funu ni syée nya, a wolo pìígèle yiri wolo ni fyáari báriga ni, a wolo jo wolo a ní gbǎn syɔɔ í.
21Ki si maa tɔ̀nɔ n kɔ́ɔ̀ mɔn wolo ga lìi í. Lǎli bee ni a Pɔli yìri n yére pe níngi ni níì jo: «Syɛ̀ɛnnɛ, àmɛɛ mii da yele pye lè wo kòro Kirɛti ni, yele ga maa yére gi ni, wɔʔɔli naa, ní kálagili naa mǎà dée too wo na í. 22Kàjáa tɔ́ɔliw ni mii i yele nyɛ́ɛri ye yele sɔ̀ngumi télege, níì cán yele wàa faala nyúngo a pùuni í, fwɔɔ bàtow yagana. 23Kolocɔlɔwee wóo mii nyɛ lè, woro wee mii kpɔ̀ʔɔrɔ́ lè, wee bee tundunwaa n pan mii ma yébiligi naa ni 24n baa mii pye: ‹Pɔli, mɔ a kɔ́ fyáa nyáana í. Ŋàʔanaga gii fwɔɔ mɔ í kári sa yére Sezari yɛ́ʔɛ ma.› Ní níì jo: ‹Wéle, Kolocɔlɔɔ n mɔ kôdanʔanyɛnbèle myɛ kaan mɔ ma.› 25Gee bee na, syɛ̀ɛnnɛ, ye yele sɔ̀ngumi télege, níì cán mii n tɔ̀nɔ n tága Kolocɔlɔɔ na ncan àmɛɛ wi gi joo mii ma lè, ànbée ki a tɔ̀nɔ́ wɔ́ɔ kpéʔele. 26Kàjáa ŋàʔanaga gii fwɔɔ wolo í sa too lǒgi nínge táraa kàgomɔ na.»
27Cángi bee gi pye wolo yébiliye kɛɛ ní sicɛrɛ wógi àmɛɛ káfalagi wolo fíigi ni máari lè sólomi lòkpɔʔɔ ni pe yiri lè Adiriyatiki, lǎli ni nyǐngi lɛɛ lè, a bàtow falipyebèlē kɔ́ ni gi sɔ̀ngí wo n nùuni táraa na. 28A be lǒgi tímana n gi nyaa mɛ́tirinyɛngéle togoye siin félege. A pe ga sɛ̀ʔɛrɛ yɛʔɛ̀ ma cɛɛri, a be níì gi tímana n gi nyaa mɛ́tirinyɛngéle toko ní kpɔrigɔ félege. 29Lǎli bee ni a be fala ni fɛ̀ɛgí níì jo, dɔ̀ʔɔ́ bàtow a kɔ́ sa círi kàdɛnɛyaa na bi too yoo poro ga cán í. A be bàto-yérige-tunmɔjiniye sicɛrɛ yirige n cáan lǒgi ni bàtow kàdoʔo ma jàngó bi wi yérige, níì kòro ni nyǐngi talima sige ní funvuuyo ní. 30Bàtow falipyebèlē si maa ni caa bi yiri bàtow ni bi fàn syɔɔ, gee bee na be kɔ́rɔw cáan lǒgi ni níì peyɛɛ bye mɔ a jo poro a bàto-yérige-tunmɔjiniyi yirige bi cáan lǒgi ni bàtow yɛ́ʔɛ ma, 31a Pɔli si sùlasiibèle kàrigafɔlɔ ní sùlasiibèle pye: «Nǎnbèle naa ga pye pe ga kòro naa bàtow ni í, yele a gbǎn syɔɔ í.»
32Lǎli bee ni a sùlasiibèle sáà kɔ́rɔw mɛ́ɛngéle cɛnɛ níì wi yaʔa a lǒgi wi láa.
33Amɛɛ nyǐngi kɔ́ naà tali lè, a Pɔli syɛ́ɛnbèle myɛ nyɛ́ɛri níì jo pe lìi nya, ní níì jo: «Níjanʔa wi nyɛ yele canya kɛɛ ní sicɛrɛ wógi sigeli na yele ga kɔ́ɔ̀ yaliire lìi í. 34Gee bee na mii i yele nyɛ́ɛri, ye mii pɔʔɔ yé lìi nya, níì cán gee bee a yele syɔ́ɔli kéele wɛ́ʔɛri, àlí yele wàa ǹjookanna a pùuni í.»
35Syɛ́ɛnri bee joolo kadoʔo ma a wi búru láa níì bariga kaan Kolocɔlɔɔ ma syɛ́ɛnbèle myɛ nyɛ́nɛ na, níì wàa kabagi n séli lìíli na ni líi. 36A syɛ́ɛnbèle myɛ be sɔ̀ngumi télege, níì soro n wɔ́ɔ̀ lìi. 37Wolo bele wo da pye lè bàtow ni, wo maa pye syɛ̀ɛnnɛ sirakele ní togoye taanri ní kpɔrigɔ ní kɔrɔni. 38A pe ga lìi n tín, yaliiree ti da pye lè bàtow túgoro, a be dee bee yirige n wáa lǒgi ni koro ga pye bàtow í faʔa.
Bàtow kálagila
39Lǎli ni nyǐngi tali lè, pe ga tári bee cán í, kàjáa pe maa pùndɛɛgaa nyaa, táminyɔɔ si i nyɛ ki lógbew na, a be jo poro fánʔa ga taa, poro a bàtow fàn bi wi sígi yérige nɛɛ bee. 40A be bàto-yérige-tunmɔjiniyi sánʔana n yaʔa yi kòro yaà lǒgi ni, ní wɔ́ɔ̀ bàtofan-bìniyi yapwɔɔrɔ sánʔa làrinijanna ni, níì bàtow fànikpɔʔɔ sánʔa n yaʔa káfalagi ma, ní i syée zìnmɛ na lógbew ma. 41A be sáà nan táminyɔɔw na lòfarami tɛ́ʔɛ ni. A bàtow yɛ́ʔɛ sígi n yére, a wi kàdogi kabagi lǒgi kùngurupeeye báriga ni.
42Lǎli bee ni a sùlasiibèle fala ni caa bi kàsolebèle myɛ kpóo, koro ga pye pe wàa a kɔ́ fànʔa taa bi lǒgi nyán bi yiri fàn í. 43Kàjáa àmɛɛ sùlasiibèle kàrigafɔlɔ da ni caa bi Pɔli syɔɔ lè, a wi be nyɛnɛ kéeli sàa, níì gi kpéʔele kánmi naa na. Wi maa jo bele be lònyanmi cán lè bele bee í da tuun lǒgi ni bàā syée tári ma, 44wozanbèle sáā lúru tiigbeleyi na ní bàtokabagiw kàgbeleye na. A be gi kpéʔele kánmi bee na, a pe myɛ taa n sáà nan tári na cerenyinmɛ na tɔ̀nɔgēle.
Currently Selected:
Kapyegèle 27: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
