2 Fànʔafɔbèle 20

Ezekyasi yáami ní wi pɔʔɔli kéele

1Cányi bee ni a Ezekyasi yaaguumi too wi na. Kanyaajoow Ezayi wi lè Amɔsi jáaw, a woro pan wi ma n baa wi pye: «Yawe n jo: ‹Ki n yɛlɛ mɔ í mɔ kpáagi kèlē cɔɔnri lǎli naa ni. Níì cán mɔ a tɔ̀nɔ́ kùu, mɔ a ní kòro sìi na í.› »

2A Ezekyasi wi yɛ́ɛgi wáa gúngi ma, níì Yawe nyɛ́ɛri níì jo: 3«Ee Yawe, nyɔɔ mii na, sɔ̀ngi mi taa gi na mi cán mii maa ni táanri mɔ yɛ́ʔɛ ma kányɛɛgi, ní funviiw na, ní wɔ́ɔ i gi kpéʔele gee gi nyɔɔ mɔ nyɛ́nɛ na lè.» A Ezekyasi tɔ̀nɔ n nyɛni gbanʔama.

4Ezayi yiri lè wi da kɔ́ɔ̀ nan kàcooli nínge na í, a Yawe syɛ́ɛnri naa nan wi na wi n jo: 5«Lúru maa syée mi sa mii syɛ́ɛnbèle kùndigi Ezekyasi pye: ‹Yawe wi lè mɔ toolɛɛgi Davidi Kolocɔlɔw, wi n jo: Mii n mɔ nyɛ́ɛrigi lóʔo, mii n mɔ nyatinmi nyaa. Wéle, mii a mɔ pɔʔɔ. Candaanri wógi na, mɔ a kári Yawe kpáagi ma. 6Mii a yɛ̀ʔɛlɛ kɛɛ ní kagunɔ taʔa mɔ cányi na. Mii a mɔ ní kěgi naa syɔɔ Asirii fànʔafɔw fànʔa ma. Mii a ra kěgi naa kpáa wéle niyɛɛ kéeli na, ní mii falipyew Davidi kéeli na.› »

7A Ezayi jo: «Ye děsyanʔa kagbalaga sámaga.» A be gi sámaga níì gi taʔa fìnigi na a wi pɔʔɔ.

8Ezekyasi maa Ezayi pye: «Nyàʔá ki a pye fɛ̀ɛ bi gi tɛ̀ɛn Yawe a mii pɔʔɔ, mii si wɔ́ɔ kári Yawe kpáagi ma candaanri wógi na?»

9A Ezayi jo: «Yawe a gee naa kpéʔele gi pye mɔ ma fɛ̀ɛ jàngó mɔ í gi cán gee Yawe joo mɔ ma lè, wi a gi kpéʔele. Cángi kànyinnɛ í kári lé yɛʔɛ ma bi sa nan tɛɛ̀lúgugéle#20:9 tɛɛ̀lúgugèle: Tɛɛ̀lúgugèle naa maa pye lɛ́ɛriwaa félege, wee ní pe da ni cángi tánʔaganma tímana lè. kɛɛ na láà ba fwɔɔ li lúru kàdoʔo ma bi ba nan tɛɛ̀lúgugéle kɛɛ na?»

10A Ezekyasi wi yari: «Bi kànyinni tórigo yɛʔɛ̀ ma li sa nan tɛɛ̀lúgugéle kɛɛ na, koro n wɛ́ʔɛri. Ki n yɛlɛ li lúru kàdoʔo ma bi ba nan tɛɛ̀lúgugéle kɛɛ na.»

11A kanyaajoow Ezayi nyɛ́ɛri Yawe ma a wi kànyinni lúrugo a li baa nan tɛɛ̀lúgugéle kɛɛ na Akazi tɛɛ̀lúgugèle na, beè li da tìgi lè.

Ezekyasi n Babilɔni fànʔafɔw tundunbéle sámaga n cò

12Lǎli bee ni Babilɔni fànʔafɔw Berodaki-Baladan wi pye lè Baladan jáaw, a woro sɛ́bɛ ní kpɔʔɔrɔ tórigo Ezekyasi ma níì cán wi maa Ezekyasi yáami kéele lóʔo. 13A Ezekyasi baa tundunbèle fàra ní fundaanra ní, níì wi yáriri tɛɛkɔnyɔ myɛ tɛ̀ɛn be na, ti lè wálifiiw, ní tɛ́ɛw, ní nùndaanni yárira, ní nùndaanni sìnmɛ ní, n fàra wi kapɛɛnkpumɔn-yáriri tɛɛ̀tɛʔɛgɛ, ní yáriri myɛ na di pye wi lɔ́ri tɛɛkɔnyɔ ni lè. Ezekyasi kpáagi yárigaa ní wi tári tɛ́nɛmɛ yárigaa ga kòro sìndɛ̀ɛn ni be na í.

14A kanyaajoow Ezayi pan fànʔafɔw Ezekyasi ma n baa wi pye: Nyàʔá syɛ́ɛnbèle bee baa joo mɔ ma? Sán si be caà yìri?

A Ezekyasi wi yari: «Pe n yìri kùleelile ni fwɔɔ Babilɔni ma.»

15A Ezayi níì jo: «Nyàʔá si pe baa nyaa mɔ kpáagi ni?»

A Ezekyasi wi yari: «Pe n mii kpáagi yárira myɛ nyaa. Yarigaa faala ga kòro mii lɔ́ri tɛɛkɔnyɔ ni, gee gi lè mii ga gi tɛ̀ɛn be na í.»

16A Ezayi si Ezekyasi pye: «Yawe syɛ́ɛnri lóʔo! 17#2Fàn 24:13; 2Cán 36:10 Wéle, canyaa i maa, yee ni pe a ba mɔ kpáagi yárira myɛ koli bi kári Babilɔni ma lè n fàra dee myɛ na mɔ tóolɛɛbèle da caa n yaʔa beè lè fwɔɔ n baa nan níjanʔa na. Ki kàa faala a kòro í. Yawe wi jo nya. 18#2Fàn 24:14-15; Dan 1:1 Pe a mɔ piibèle pèle cò, bele pe a yiri mɔ ni lè, poro bele mɔ a see lè, bi kári ní be ní sa be wòlo, si be cáan be pye falipyebèlē Babilɔni fànʔafɔw kpaʔa ni.»

19A Ezekyasi Ezayi yari: «Yawe syɛ́ɛnri mɔ joo lè, ti n nyɔɔ.» A wi níì jo: «Yɛɛ̀nyinge ní ŋɔ́ndaala a tɛ́nɛ pye mii sìíw ni ì?»

20Ezekyasi kasangèle, ní wi sànbalimi myɛ, ní àmɛɛ wi lǒgi wéeye túgu ní wɔ́ɔ̀ lǒgi túgu n lége kěgi ni lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ. 21A Ezekyasi kùu n fàra wi toolɛɛbèle na, á wi jáaw Manase tɛ́ɛn fǎngi na wi sìndɛɛgi ni.

Currently Selected:

2 Fànʔafɔbèle 20: CB10

Highlight

Copy

Compare