2 Fànʔafɔbèle 21

Manase n pye Zyuda fànʔafɔw

1Yɛ̀ʔɛlɛ kɛɛ ní siin Manase da taa lǎli ni wi baa pye lè fànʔafɔlɔ. Yɛ̀ʔɛlɛ togoye siin ní kpɔrigɔ ní kagunɔ wi kwɔ́ɔ fǎngi na Zyerusalɛmi ni. Wi nɔ́ɔw mɛ́ʔɛ ki da pye Hefisiba. 2#Zyer 15:4 A wi i gi kpéʔele gee gi pee Yawe nyɛ́nɛ na lè. Syɛɛnfeleyee Yawe da nɛnɛ n yirige yaà Isirayɛli ye yɛ́ʔɛ ma lè, yoro nɔ́nʔɔri kapyere félege wi da ni kpéʔele. 3Sáriga-wòlo-tɛ́ɛyi wi tóow Ezekyasi da kwɔ́ɔ n yirige yaà lè, a wi níì yee bee faan, níì sáriga-wòlo-yafaanya faan Baali ma, ní wɔ́ɔ̀ Asyera tiikórigo sámaga àmɛɛ Isirayɛli fànʔafɔw Akabi da gi kpéʔele lè. A wi i nyɛ̀ʔɛni ŋɔripiigéle myɛ kpɔ̀ʔɔrɔ́, ní i báara ge ma. 4#2Sam 7:13 A wi sáriga-wòlo-yafaanya faan Yawe kpáagi ni, bi gi taa Yawe maa jo: «Zyerusalɛmi ni mii a mii mɛ́ɛgi yaʔa gi pye.» 5A wi wɔ́ɔ̀ sáriga-wòlo-yafaanyaa faan Yawe kpáagi kadàagēle siin na nyɛ̀ʔɛni ŋɔripiigéle myɛ kpɔ̀ʔɔrɔlɔ mɛ́ʔɛ na. 6A wi wi jáaw kaan a be sórigo sáriga náagi ni. A wi i cɛ́lɛ ní i dɛ̀ɛ́mi kèlē kpéʔele, níì syɛ́ɛnbèle pèle télege poro i kúbèle yíbe ní i nyɛ̀ʔɛna kérigèle nyaagi ni nyuu. Gee gi pee Yawe nyɛ́nɛ na lè a wi i koro kpéʔele n baa sɔ̀lɔ n tɔ̀nɔ n wi fúngi tanʔa.

7 # 1Fàn 9:3-5; 2Cán 7:12-18 Asyera yasungi wi da sámaga lè, a wi gi tɛ́ʔɛ kpáagi ni koro gee kéele na Yawe da gi joo Davidi, ní wi jáaw Salomɔn ma lè níì jo: «Mii mɛ́ɛgi a pye kpáagi naa, ní Zyerusalɛmi na làla o làla, tɛ́ɛgi bee mii nyɛ́nɛ n wòlo lè Isirayɛli syɛɛnfeleyi myɛ nínge ni. 8Mii a ní Isirayɛli ye yaʔa pe yiri tásaligi ni bàā curugu da máari í koro gee mii kaan be toolɛɛbèle ma lè, gee mii joo n gbàn lè pe ga tɛ́nɛ̀ gi cò ní i gi kpéʔele n yɛlɛ ní làlwaw myɛ ní mii falipyew Mowizi kaan be ma lè.» 9Kàjáa pe ga lóʔo í. A Manase be pùuni fwɔɔ a be kapeeyi kpéʔele n sɔ̀lɔ syɛɛnfeleyi na, yoro yee Yawe kálagi Isirayɛli ye yɛ́ʔɛ ma lè.

10Lǎli bee ni a Yawe syɛ́ɛnri naa joo wi falipyebèle ma a be joo pe lè kanyaajoobèle níì jo: 11«Amɛɛ Zyuda fànʔafɔw Manase nɔ́nʔɔri naa kèlē kpéʔele lè àlí n sɔ̀lɔ Amɔri ye wógèle myɛ na pe da ni kpéʔele naa wi yɛʔɛ̀ ma lè. Wi n wɔ́ɔ̀ Zyuda ye kɔ́ri n lége kapeebyeri ni wi yasunyi báriga ni. 12Gee bee na Yawe Isirayɛli ye Kolocɔlɔw jo: ‹Mii a wɔʔɔgɔ cáan Zyerusalɛmi, ní Zyuda ye na. Ki lóʔoli a tɔ̀nɔ́ ki lóʔofɔbèle líiweegéle wáriga. 13Mɛ́ɛnni mii tɛ́ʔɛ n Samarii tímana lè, ní gûnzin-yárigi mii tɛ́ʔɛ n Akabi kpáagi wòolo tímana lè, dee bee mii a tɛ́ʔɛ bi Zyerusalɛmi tímana. Mii a Zyerusalɛmi pɛ́ɛ àmɛɛ syɔɔn gáà yalege pɛ́ɛ lè si gi cíbele. 14Mii a mii kɔ́rigi syɛɛnsanbèlē cée. Mii a be le pe nigoobèle kɔ́yɔ ni. Pe nígoobèle myɛ a be fuguri si be yáriri koli. 15Níì cán gee gi pee mii nyɛ́nɛ na lè, koro be kpéʔele n mii fúngi tanʔa gbanʔama nlaa cángee na be toolɛɛbèle yiri Ezyipiti ni lè fwɔɔ n baa nan níjanʔa na.› »

16Manase n wɔ́ɔ̀ tɛɛlɛ fun sìsyaan saʔa wo fwɔɔ a Zyerusalɛmi nyìn wi na n séli láʔalee na n sáà nan lee na. Wi n koro kpéʔele n fàra kapeegèle gele na wi da Zyuda ye kɔ́ri n wáa pe i kpéʔele lè, ni gi kpéʔele gee gi pee Yawe nyɛ́nɛ na lè.

17Manase kasangèle, ní gee myɛ wi kpéʔele lè, n fàra kapeeli na wi pye lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ. 18A Manase kùu n fàra wi toolɛɛbèle na, a be wi tɔ́n wi kpáagi nángwɔɔ ni gee bee n jo Uza nángwɔɔw ni. A wi jáaw Amɔn tɛ́ɛn fǎngi na wi sìndɛɛgi ni.

Amɔn n pye Zyuda fànʔafɔw

19Yɛ̀ʔɛlɛ toko ní siin Amɔn da taa lǎli ni wi baa pye lè fànʔafɔlɔ. Yɛ̀ʔɛlɛ siin wi kwɔ́ɔ fǎngi na Zyerusalɛmi ni. Wi nɔ́ɔw mɛ́ʔɛ ki da pye Mesyulemɛti, wi pye lè Yota ye Harusi pìíw. 20A wi i gi kpéʔele gee gi pee Yawe nyɛ́nɛ na lè àmɛɛ wi tóow Manase da ni gi kpéʔele lè. 21Wi maa ni táanri wi tóow kôdanʔaya myɛ ni, wi maa ni báara yasunyi ma, yee má wi tóow da ni báara lè, ní i tíri ni tuun yi yɛʔɛ̀ ma. 22Wi maa Yawe yaʔa wi lè wi toolɛɛbèle Kolocɔlɔɔ. Wi da ni táanri Yawe kólogi ni í.

23A Amɔn falipyebèle nyɔɔ kúun wi na níì wi kpóo wi kpáagi ni. 24Bele myɛ si pe da nyɔɔ kúun fànʔafɔw Amɔn na lè, a tári syɛ̀ɛnnɛ be kpúmɔn n kpóo, níì wi jáaw Zyozyasi télege fànʔafɔlɔ wi sìndɛɛgi ni.

25Amɔn kasangèle ní gee wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ. 26A be wi tɔ́n wi nyángi ni, Uza nángwɔɔw ni, á wi jáaw Zyozyasi tɛ́ɛn fǎngi na wi sìndɛɛgi ni.

Currently Selected:

2 Fànʔafɔbèle 21: CB10

Highlight

Copy

Compare