2 Fànʔafɔbèle 19

Ezekyasi n kanyaajoow Ezayi yíbe

1Lǎli ni fànʔafɔw Ezekyasi gee bee lóʔo lè, a wi wi búroyi sulugu níì gɔ̀nvaʔaga tɛ́ʔɛ n wiyɛɛ dɔ́n, ní sáà jée Yawe kpáagi ni. 2Eliyakimi wi pye lè fànʔafɔ-gbaagi kakarigaɔ, a wi woro tun, n fàra Syebina na wi lè sɛ́bɛkanw, ní sáriga-wòlobèle wólɛɛbéle ní, Amɔsi jáaw Ezayi ma wi pye lè kanyaajoow, á be peyɛɛ dɔ́n ní gɔ̀nvaʔaya ní. 3A be sáà wi pye: «Ezekyasi n jo: ‹Cángi naa i nyɛ funbɛɛnrɛ, ní wɔʔɔgɔ, ní faʔara canʔa. Níì cán pìíbèle n nan seemɛ na, fànʔa si ga taa bi gbǎn be see í. 4Dɔ̀ʔɔ́ Yawe mɔ Kolocɔlɔw n sùlasiibèle myɛ kàfɔlɔ taʔara syɛ́ɛnrɛ lóʔo, dee wi kàfɔw Asirii fànʔafɔw wi tun a wi baa joo n Kolocɔlɔɔ woweew tɛʔɛlɛ lè. Dɔ̀ʔɔ́ syɛ́ɛnri Yawe mɔ Kolocɔlɔw lóʔo lè wi a wi wɔʔɔyi taʔa wi na di kéeli na. Koro na nyɛ́ɛri wolo wozanbèle kéele na wo sèʔê kòro beè lè.› »

5A fànʔafɔw Ezekyasi tundunbèle ga sáà nan Ezayi na, 6a wi be pye: «Ye sa yele kàfɔw pye: ‹Yawe n jo: Syɛ́ɛnree mɔ lóʔo lè, toro dee Asirii fànʔafɔw falipyebèlē baa joo n mii faʔa lè, mɔ a kɔ́ fyáa di kéeli na í. 7Mii a fungaa félege lége wi ni, wi a syɛɛnraa lóʔo si lúru kári wi tári ma. Mii a gi yaʔa pe sa wi kpóo yaà wi tári ni ní ŋɔsée ní.› »

Senakeribi n níì syɛɛngbanra joo

8A sùlasiibèle myɛ kàfɔlɔ taʔara lúru n kári n sáà Asirii fànʔafɔw nyaa wi i kapɛɛnni kpúmɔn ní Libina ní, níì cán wi maa gi lóʔo wi n yiri Lakiisyi ni n kári.

9A Asirii fànʔafɔw syɛɛnrɛ lóʔo Etyopii fànʔafɔw Tiraka kéeli na a di jo: «Wi i yaà ni maa ba kapɛɛnnɛ kpúmɔn ní mɔ ní.» Lǎli bee ni a wi níì tundunbèle pèle tun Ezekyasi ma níì jo: 10«Ye sa gi joo Zyuda fànʔafɔw Ezekyasi ma ye wi pye: ‹Mɔ Kolocɔlɔwee na mɔ tága lè, mɔ a kɔ́ wi yaʔa wi mɔ pùuni í, si jo: Zyerusalɛmi a jée Asirii fànʔafɔw kɔ́yɔ ni í. 11Gee Asirii fànʔafɔbèle kpéʔele tátɛɛyee myɛ na lè n yi kálagi n kwɔ́ɔ, mɔ n gi lóʔo, mɔ si kɔ́ ba syɔɔ lé? 12Syɛɛnfeleyee mii tóolɛɛbèle kálagi lè a yi kolocɔlɔbèle gbàn lé n yi syɔɔ, yi lè Gozan ye, ní Haran ye, ní Eresɛfi ye, n fàra Edɛn yòdaʔayi wòolo na be pye lè Telasaari ni? 13Sán Hamati fànʔafɔw, ní Aripadi fànʔafɔw, ní Sefarivayimi kěgi fànʔafɔlɔ, ní Hena fànʔafɔw, ní Iva fànʔafɔw nyɛ?› »

Ezekyasi nyɛ́ɛrigi

14A Ezekyasi sɛ́bɛw yirige tundunbèle kɔ́yɔ ni n wi syɛ́ɛnri wéle, níì lúgu ní wi ní Yawe kpáagi ma ní sáà wi sánʔa n cáan Yawe yɛ́ʔɛ ma. 15#Yir 25:22 A Ezekyasi nyɛ́ɛrigi naa nyɛ́ɛri Yawe yɛ́ʔɛ ma níì jo: «Ee Yawe, Isirayɛli ye Kolocɔlɔw, mɔ wi lè wodɛ́ɛɔn ní syerubɛnbèle ǹjoʔo ni, mɔ nibin wi nyɛ tári fànya myɛ Kolocɔlɔɔ. Mɔ wi nyɛ̀ʔɛni ní tári kpéʔele. 16Yawe, líiyi cáan mi lóʔo! Yawe, nyapiigèle múgu mi gi wéle! Senakeribi syɛ́ɛnri lóʔo, woro wee wi tun a be baa mɔ Kolocɔlɔɔ woweew tɛʔɛlɛ lè.

17Ee Yawe, ki i kányɛʔɛ Asirii fànʔafɔbèle n syɛɛnfeleyi ní yi tátɛɛyi kwɔ́ɔ n yirige yaà. 18Pe n yi kolocɔlɔbèle wáa náagi ni níì cán kolocɔlɔbèlē ban be pye í, syɔɔn kɔ́lɔ yasamagaya yi pye, tiige, ní kàdɛnɛgɛ yáriya yi pye, koro na pe yi kálagi n kwɔ́ɔ. 19Koro na tɔ́ɔliw ni Yawe, mɔ wi lè wolo Kolocɔlɔw, wolo syɔɔ Senakeribi ma, tári fànya myɛ si gi cán bi cán mɔ Yawe nibin wi nyɛ Kolocɔlɔɔ.»

Ezayi n Yawe syɛɛnlurugori joo n tɛ̀ɛn

20Lǎli bee ni a Amɔsi jáaw Ezayi tun pe sa Ezekyasi pye: «Yawe Isirayɛli ye Kolocɔlɔw n jo: ‹Nyɛ́ɛrigi mɔ nyɛ́ɛri mii ma lè Asirii fànʔafɔw Senakeribi kéeli na, mii n gi lóʔo. 21Syɛ́ɛnree Yawe joo wi kánmi na lè, toro di dee naa:

Siyɔn nàngeele sinján pìcaaw i mɔ faari,

wi i wiyɛɛ nyɛ́nɛ mɔ na.

Zyerusalɛmi calipili i nyǔngi kólo mɔ kadoʔo ma.

22Wìí syɔ́ɔn mɔ tɛʔɛlɛ níì wi faʔa?

Wìí kánma na mɔ yákpoli wáa?

Isirayɛli wojanw ni mɔ mɔ yɛ́ɛgi le.

23Mɔ n Kàfɔw tɛʔɛlɛ mɔ tundunbèle báriga ni.

Mɔ n jo: Mii n lúgu n kári nyanbeleyi ǹjoʔo ni mii wotoronɛʔɛri báriga ni,

fwɔɔ n taa n sáà nan Liban tɛɛ̀laʔali na.

Mii i wi sɛdiri tiitɔnɔteleyi cɛnɛ,

ni wi siipirɛ tiicanyi cɛnɛ.

Mii n sáà nan wi tɛɛ̀laʔali na

wi kɔ́ligi gi tiire séʔe wíri lè.

24Mii n túgu, mii n lònibɔnyɔ gbaa.

Mii a mii yédaagèle tɛ́ʔɛ bi Niili lòfarami myɛ waʔa.

25Mɔ ga tɔ̀ʔɔ̂ gi lóʔo

mii wi kérigèle bee kɔ̀rirɔ n kpéʔele yaà booma ni ì,

mii maa ge sámaga n yaʔa yaà booma cányi ni ì?

Tɔ́ɔliw ni mii n ge yaʔa a ke baa foro,

kèniriyi si kàri bi pye gurubɛɛtooro.

26Yi syɛ́ɛnbèle báriga n kwɔ́ɔ.

Pe n fyáa, fɛ̀ɛrɛ n be taa.

Pe i nyɛ àmɛɛ sìnbirigi nyàā nyɛ lè,

ní àmɛɛ nyàányunbirige nyɛ lè.

Amɛɛ nyàā nyɛ, gee gi fìin kpáayi ǹjoʔo ni lè

ní àmɛɛ bile wára nyɛ, dee di pábari sáni bilekanyi í yiri lè.

27Mii si n mɔ laridɛ́ɛnni cán,

ní lǎli ni mɔ ga yìri lè,

ní lǎli ni mɔ jǐn lè ní lǎli ni mɔ ga yìri mii kánmi na lè.

28Amɛɛ si mɔ yìri mii kánmi na lè,

ní àmɛɛ mɔ kpɔɔjoomi baa jée mii líiweegèle ni lè,

mii a mii vèʔegi le mɔ fínaani na,

si mii kàraféw le mɔ nyɔ́ɔgi ni

bi mɔ lúrugo tórigo kólogee ni mɔ sɔ̀lɔ n pan lè.

29Gee ki a pye mɔ Ezekyasi ma lè fɛ̀ɛ, koro gi nyɛ:

Yaliipyáw wi ŋuu wiyɛɛ ma lè,

woro yele a lìi níyɛɛlɛ.

Yɛɛziin wóli na

dee di fìin tiyɛɛ ma lè sáā toro líi.

Kàjáa yɛɛdaanri wóli na,

ye lùguro lùgu, yé yaliire láa,

ye ɛrɛzɛn tírire cɔ́rɔ,

yáā di yasanri líi.

30Zyuda kpáagi syɛɛnsanbèlē pe a kòro lè,

pe a ní nìnre wáa di tìgi si san ǹjoʔo ma.

31Níì cán pèle a yiri wogorobéle Zyerusalɛmi ni.

Pèle í yiri wozyɔɔbéle Siyɔn nyanbelegi ni.

Kapɛɛnkpumɔnbèle Kàfɔlɔ wi lè Yawe, koro wi a kpéʔele wi tàmagbɔɔgi kéele na. 32Koro na syɛ́ɛnri naa Yawe joo Asirii fànʔafɔw kéele na, níì jo:

Wi a jée kěgi naa ni í.

Wi a ŋaʔa wáa gi ni í.

Wi a yìri gi kánmi na ní tunmɔzige-yariga ní í.

Wi a tɛɛ̀lúgugo sámaga gi taana í.

33Kólogee ni wi pan lè,

koro ni wi a lúru kári.

Wi a jée kěgi naa ni í.

Yawe wi jo nya.

34Mii a kěgi naa kpáa wéle bi gi syɔɔ niyɛɛ kéeli na,

ní mii falipyew Davidi kéeli na.› »

Asirii ye lúrugarili ní Senakeribi kùúw kéele

35A ki ga baa pye yébiligi bee ni, a Yawe nyɛ̀ʔɛni tunduɔn yiri n baa kpúmɔn n kpóo Asirii ye tɛɛkòrogi ni nànbēle sirakamayɛ kpanjɛrɛ ní selebingéle siin ní saala kagunɔ. A bele ga yìri nyǐngi nyɔ́ɔ na, a be bele myɛ nyaa kúbéle. 36A Asirii fànʔafɔw Senakeribi fala n yiri yaà n lúru n kári n sáà kòro Niniivi ni.

37N wi yaʔa cangaa wogbumɔnɔɔ ní wi kolocɔlɔw Nisurɔki kpáagi ni, wi jáabèle be lè Adiramelɛki ní Saresɛɛri, a poro jée wi kurugo n sáà wi kpúmɔn n kpóo ní ŋɔsée ní níì fàn n kári Ararati tári ma. A wi jáaw Esari-Hadɔn tɛ́ɛn fǎngi na wi sìndɛɛgi ni.

Currently Selected:

2 Fànʔafɔbèle 19: CB10

Highlight

Copy

Compare