2 Korɛnti ye 9
9
Dɛ̀ɛmɛnɛ senyɛnbèle pèle kéele na
1Ki o náa ní i nyɛ mii í sɛ́bɛ tórigo yele ma Kolocɔlɔɔ syɛɛncanbèle dɛ̀ɛmɛnɛ kéele na í. 2Níì cán mii n gi cán àmɛɛ gi nyɛ lè yele fúnyi ni bàā be dɛ̀ɛmɛ́, gee bee na mii yele mɛ́ɛtaanyi yiri Maseduwani ye ma níì jo, Akayi ye maa téè peyɛɛ zámaga nlaa yaà yɛɛláa kéele, a yele lòmaani pye sábabu poro pèle saʔa na, á be wɔ́ɔ̀ lòmaana le. 3Koro na mii wolo senyɛnbèle tórigo yaà yele ma, koro ga pye kéelee na wolo yele mɛ́ɛtaanyi yiri lè, yi yerili a kɔ́ pye nyùngo fun í, koro na gi yɛlɛ yele í yeyɛɛ zámaga àmɛɛ mii da gi joo lè. 4Kapye koro ban í, Maseduwani ye ga kári ní mii ní ní sáà yele nyaa sìnzamaga ni, ki a pye fɛ̀ɛrɛ kéele wolo ma àmɛɛ wolo da tága lè yele na, wàa si náa o yele wóri nyuu í. 5Koro na mii gi nyaa ki n yɛlɛ mii í wolo senyɛnbèle nyɛ́ɛri pe kári mii yɛ́ʔɛ na yele ma, be sa kpɔ́ʔɔri kpóʔoro mii yɛ́ʔɛ na, dee yele da jo ye a kaan lè, jàngó di pye kpɔʔɔdelere, ti a kɔ́ pye ŋàʔanaga kéele í.
6Ye gi cán, wee wi yaliire cɛɛri wáa lè, cɛɛri wi a wɔ́ɔ ba láa, wee si wi saʔa wáa lè, wee bee a wɔ́ɔ ba saʔa láa. 7Gee syɔɔn o syɔɔn tímana lè wi fúngi ni, ki n yɛlɛ waa kaangi bi yɛlɛ ní gee bee ní, ki ga yɛlɛ waa kaangi ní funbɛɛnrɛ ní í, koro ga jáa mɔ a jo ŋàʔanaga kéele lii í. Níì cán wee wi kaangi lè ní fundaanra ní, wee bee kéele n Kolocɔlɔɔ dɛ́nɛ. 8Kolocɔlɔɔ fánʔa i nyɛ bàā kpɔ́ʔɔri féleye myɛ kaangi yele ma wonɛʔɛrɛ ní, koro ga pye bàā yele màkow myɛ nyɔɔgi yele ma kàbanyi myɛ na, ní làrigèle myɛ ni, jàngó yele í taa saʔa, si gbǎn ra kacǎngèle féleye myɛ kpéʔele. 9#Ŋún 112:9 Amɛɛ gi sɛ́bɛ lè níì jo:
«Wi n saʔa kaan foomɔfɔbèle ma n màʔa.
Wi sínni a kòro beè làla o làla.»
10 #
Eza 55:10
Wee wi yaliiri pìifalida kaangi lè yaliiwáaw ma, n fàra yaliiri na wi a ra líi lè, wee bee a wɔ́ɔ ra sínni pìifalida kaangi yele ma wonɛʔɛrɛ ní, sáā kàa fàrá sínni yasanra na yele ma. 11Wi a ra lɔ́ri féleye myɛ kaangi yele ma, jàngó yele í da kpɔ́ʔɔri kaangi saʔa. Koro si gi kaan syɛ̀ɛnnɛ saʔa í da bariga kaangi Kolocɔlɔɔ ma wolo fáliw báriga ni. 12Níì cán dɛ̀ɛmɛni naa fáli i Kolocɔlɔɔ syɛɛncanbèle màko nyɔɔgi, kàjáa koro yagana ban í, li n wɔ́ɔ̀ be kaan a be i bariga kaangi saʔa Kolocɔlɔɔ ma. 13Dɛ̀ɛmɛni naa a pye sábabu jàngó paa Kolocɔlɔɔ kpɔ̀ʔɔrɔ́ lǎli ni pe ga baa gi nyaa lè yele n fɔ̀lɔ n yeyɛɛ gaan Kirisi Syɛɛnjóocǎnri ma, níì poro kpɔ́ʔɔ gbanʔama n fàra syɛ́ɛnbèle myɛ na. 14Pe a ra nyɛ́ɛri yele kéeli na àmɛɛ yele kéeli be dɛ́nɛ lè gbanʔama Kolocɔlɔɔ kpɔʔɔgbɔɔri kéele na, dee wi kaan yele ma lè. 15Ki n yɛlɛ waa bariga kaangi Kolocɔlɔɔ ma wi yakaangi kéele na, gee gi lè syɔɔn a gbǎn ki kánmi joo tɛ̀ɛn lè í!
Currently Selected:
2 Korɛnti ye 9: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
