2 Korɛnti ye 10
10
Pɔli n wi fáliw kéele joo
1Mii Pɔli tiimaa i yele nyɛ́ɛri Kirisi fûnnyingi ní wi funjǎngi kéele na, mii wee wi màámi kpéʔele lè yele nyɛ́nɛ na lǎlee ni mii ga pye yaà lè yele níngi ni, mii si ga núngo yele taana, mii n soro. 2Mii si i yele nyɛ́ɛri, ye a kɔ́ mii ŋàʔana mii í soro yele níngi ni í, kàjáa bele be gi tímana lè n jo wolo i táanri ni yɛlɛgi ní céri kínidɛnɛgɛ ní lè, mii n gi tímana n gi nyaa fwɔɔ mii í mii nyúngi waʔa bele bee kéele na. 3Wolo wíre i táanri céri naa ni, ki i nyɛ kányɛʔɛ, kàjáa wolo si tɔ́ɔ o kapɛɛnni kpúmɔn dulunyanw syɛ̀ɛnnɛ wólo kpúmɔnganma na í. 4Níì cán wolo kapɛɛnkpumɔn-yáriri o nyɛ àmɛɛ dulunyanw syɛ̀ɛnnɛ wóro nyɛ lè í, kàjáa ti séew n kpɔ́ʔɔ Kolocɔlɔɔ bárigaw ni bi gbǎn fǎnyi jáa. Wolo i kàkabalayi cáan, 5n fàra yáriri myɛ na di tiyɛɛ nyɛ́nɛ lè Kolocɔlɔɔ cánni kéele na, ní wɔ́ɔ̀ sɔ̀nguri myɛ jáa ni di kàragí jàngó taa lúro Kirisi ma. 6Yele ga tɛ́nɛ̀ fɔ̀lɔ ni lúro Kirisi ma cama lǎli ni lè, ye gi cán wolo n wɔ́ɔ̀ sámaga n kwɔ́ɔ bi sa sìnloʔobèle myɛ wɔʔɔ.
7Yaa kérigèle sámagi yaa wéle kányɛʔɛ ni! Kapye wàa i wiyɛɛ jóro Kirisi wóo, ki n yɛlɛ wi gi cán bi cán àmɛɛ woro nyɛ lè Kirisi wóo, kánmi bee na wolo wɔ́ɔ̄ nyɛ Kirisi wòolo. 8Níì cán Kàfɔw wi séew kaan wolo ma, koro ga pye kàa í da taari yele na, wi ga wi kaan wolo ma yele kálagili kéele na í, àlí kapye mii n wírè niyɛɛ gbɔ́ʔɔ n sɔ̀lɔ séew bee kéele na, fɛ̀ɛrɛ a mii taa í. 9Mii o caa gi pye mɔ a jo mii i yele fígiri ní mii sɛ́bɛbèle ní wii í. 10Níì cán wàa i gi nyuu níì jo: «Pɔli sɛ́bɛbèle syɛ́ɛnrɛ n líbe, ní wɔ́ɔ̀ gbàn. Kàjáa wi tiimaa ga pye wolo níngi ni, wi o nyɛ yafyɛn í, wi nyɔɔsyɛɛnri si wɔ́ɔ i nyɛ báriga fun.» 11Ki n yɛlɛ wee bee í gi cán bi cán, gee wolo nyuu sɛ́bɛbèle ni lè n gi yaʔa wolo o yaà ní yele ní í, gee bee wolo a wɔ́ɔ sa ra kpéʔele lǎli ni wolo ga pye yaà ní yele ní lè.
12Bele si be peyɛɛ mɛ́ɛtaanyi yiri lè, wolo a fɔ̀lɔ bi caa woyɛɛ jóro ní bele bee ní sèjira í, koro ga jáa bi woyɛɛ dímana ní be ní í. Amɛɛ be peyɛɛ dímana ní peyɛɛ ní lè, ní wɔ́ɔ i peyɛɛ jóro ni yɛlɛgi ní be tiimaa sɔ̀nguri ní lè, gee bee i nyɛ labalama. 13Ki ga yére wolo na, wolo a fɔ̀lɔ́ woyɛɛ gbɔ́ʔɔ bi sɔ̀lɔ ki dǎnw na í, fwɔɔ wolo a ra gi kpéʔele bi yɛlɛ ní fali tɛ́ɛgi ní Kolocɔlɔɔ da tímana n kaan wolo ma lè níì jo wolo í da báara tɛ́ɛgi bee ni, àlí yele tiimaa i nyɛ tɛ́ɛgi bee ni. 14Kányɛʔɛ na àmɛɛ wolo nan yaà lè yele na, wolo ga sɔ̀lɔ wolo fáliw tɛɛ̀laʔala na í. Níì cán wolo wo da sélì Kirisi Syɛɛnjóocǎnri joo fwɔɔ n sáà nan yaà yele na. 15Pèle fáli kéele na ban wolo woyɛɛ gbɔ́ʔɔgi í. Kàjáa gee na wolo wo sɔ̀ngumi taʔa lè koro gi nyɛ ncan kàa ga ni taari yele tágali na, wolo kéeli a ba kpɔ́ʔɔ yele níngi ni bi sɔ̀lɔ, níì cán gee bee a gi kaan wolo fali tɛ́ɛgi í da kpɔ́ʔɔgi, 16koro ga pye wolo í gbǎn sa ra Syɛɛnjóocǎnri nyuu tátɛɛyi ni yi nyɛ lè yele màʔami na, wolo si a tée woyɛɛ gbɔ́ʔɔ wàa fáli kéele na í, wee wi kpéʔele n kwɔ́ɔ lè wi fali tɛ́ɛgi ni í.
17 #
Zyer 9:24
«Wee wi wiyɛɛ gbɔ́ʔɔgi lè,
ki n yɛlɛ waa wiyɛɛ gbɔ́ʔɔgi Kàfɔw ni.»
18Níì cán wee wi ga ni wiyɛɛ tiimaa mɛ́ɛtaangi yiri lè, tànʔa o nyɛ wee bee ma í, fwɔɔ Kàfɔw ga ni wee mɛ́ɛtanʔa yiri lè.
Currently Selected:
2 Korɛnti ye 10: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
