2 Korɛnti ye 8
8
Bi kɔ́gi sánʔa bàā kaangi
1 #
Wɔr 15:26
Ni senyɛ̀nnɛ, kpɔ́ʔɔri Kolocɔlɔɔ kaan lè Maseduwani egilizibèle ma, wolo a di kéeli tɛ̀ɛn yele na. 2Wɔʔɔyi yi too be na lè, Kolocɔlɔɔ n be sɛʔɛ n wéle gbanʔama yee bee báriga ni, kàjáa pe fundaangbɔɔri n be kaan a pe be kɔ́yi sánʔa ni kaangi saʔa, àlí bi gi taa fóomi i nyɛ be na gbanʔama. 3Mii i nyɛ be séera bi gi tɛ̀ɛn yele na, ncan pe n kaan n yɛlɛ ní be taaganmi ní, àlí pe n kaan n sɔ̀lɔ gee bee na, àmɛɛ gi pye lè be tiimaa fúnyi ni bi kaan, 4a be wolo nyɛ́ɛri gbanʔama níì jo wolo í poro yaʔa poro í jée Kolocɔlɔɔ syɛɛncanbèle dɛ̀ɛmɛnɛ ni. 5Gee wolo da ni sɔ̀ngí lè, pe n gi pye n sɔ̀lɔ gee bee na, pe n peyɛɛ gaan Kàfɔw ma gbɛnʔɛnɛ, ní náà peyɛɛ gaan wolo ma n yɛlɛ ní Kolocɔlɔɔ nyɛ́nɛ kéeli ní. 6Gee bee na wolo Tiiti nyɛ́ɛri wi kári yaà yele ma, koro ga pye àmɛɛ wi kpɔ́ʔɔri naa fáli séli yaà yele ma lè, wi sa wi foro. 7Amɛɛ yáriri naa myɛ nibin nibin nyɛ yele ma lè saʔa, di lè tágali, ní syɛɛnjóori, ní cánni, ní lòmaani féleye myɛ, ní tàmagi ní gi nyɛ lè wolo ní yele níngi ni, ànbée gi wɔ́ɔ̀ yɛlɛ yele í da kaangi gbanʔama Kolocɔlɔɔ kpɔ́ʔɔri báriga ni.
8Mii ga koro joo bi yele kàriga fànʔa na í, kàjáa pèle lòmaana kéele mii tɛ̀ɛn yele na, jàngó bi yele tàmagi sɛʔɛ wéle bi gi kacánmi cán. 9Níì cán yele n wolo Kàfɔw Zyezu Kirisi kpɔ́ʔɔri kéele cán, woro wee wi da pye lè lɔrɔfɔlɔ, á wi baa wiyɛɛ gbéʔele foomɔfɔlɔ yele kéeli na, jàngó yele í ba pye lɔrɔfɔɔlɔ woro fóomi báriga ni.
10Gee mii nyaa ki a yɛlɛ yele ma lè kaanni bee kéele ni, koro mii a tɛ̀ɛn yele na, àmɛɛ yele da sélì sɔ̀ngi kéeli bee na lè yɛɛláa, ní wɔ́ɔ̀ pye wozelibèle ni kaangi, 11koro na ye wɔ́ɔ ye kéeli bee kpéʔele ye foro tɔ́ɔliw ni koro ga pye àmɛɛ li da sélì pye yele fúnyi ni kánmee na lè, yele í li kpéʔele foro kánmi bee na bi yɛlɛ ní yele kɔ́lɔ yáriri ní. 12Kapye ki i nyɛ syɔɔnwaa fúngo ni bàā kaangi, Kolocɔlɔɔ a fɔ̀lɔ syɔ́ɔnw bee yakanʔa na bi yɛlɛ ní wi taaganmi ní, dee di lè ti o nyɛ wi ma í, toro kéele o gi ni í.
13Gee bee ga jo mii i caa yele í fɔ̀rɔ pèle si ŋɔ́n daa í, kàjáa ki n yɛlɛ yele myɛ í pye sèjira. 14Lǎli naa ni yele lɔnɛʔɛri a gbǎn poro fɔ̌ngi láʔa be na, koro ga pye cangaa poro lɔnɛʔɛri í wɔ́ɔ ba yele wógi láʔa yele na, jàngó yele myɛ í ba pye sèjira. 15#Yir 16:18 Amɛɛ gi sɛ́bɛ lè n jo:
«Wee wi saʔa koli lè,
wàa ga kòro wi ma í,
wee wi wɔ́ɔ̀ cɛɛri koli lè,
woro wów ga kólogo í.»
Tiiti ní wi pínɛnyɛnbèle kéele
16Wolo i bariga kaangi Kolocɔlɔɔ ma àmɛɛ wi wolo lòmaani wonijanna lége lè Tiiti ni yele kéeli na. 17Kányɛʔɛ ni wi n wolo nyɛ́ɛrigi lóʔo, kàjáa ki maa wɔ́ɔ̀ pye wi fúngi ni, a wi fɔ̀lɔ gi na wiyɛɛ ma níì yìri n kári yaà yele ma. 18Wolo n wo senyɛnw tórigo ní wi ní woro wee mɛ́ɛtanʔa be yiri lè egilizibèle myɛ ni Syɛɛnjóocǎnri fáli kéele na. 19Gee bee yagana si ban í, egilizibèle n wɔ́ɔ̀ wi nyɛ́nɛ n wòlo wi pye wolo kôdánʔanyɛnnɛ kpɔ́ʔɔri naa fáli kéele na, wee wolo kpéʔele lè jàngó bi kpɔʔɔrɔ taʔa Kàfɔw tiimaa na, si wɔ́ɔ wolo lòmaani tɛ̀ɛn wolo senyɛnbèle dɛ̀ɛmɛnɛ kéele na.
20Wolo i woyɛɛ kɔ̀rɔsíi koro ga pye syɔɔn a kɔ́ tɛɛkolobile nyaa wolo na kpɔʔɔgbɔɔri naa fáli ni wee wolo kpéʔele lè í. 21#Kàs 3:4 Gee gi nyɔɔ lè Kàfɔw nyɛ́nɛ na, koro wolo caa bàā kpéʔele, kàjáa Kàfɔw yagana nyɛ́nɛ na si ban í, fwɔɔ ki wɔ́ɔ nyɔɔ syɛ́ɛnbèle nyɛ́nɛ na.
22Wolo n wolo senyɛnw tórigo ní be ní, woro wee wolo da pye n wéle lè kèlē saʔa ni tɔlɔyɔ saʔa, níì gi nyaa fáliw kéele i nyɛ wi fúngi ni, àlí tɔ́ɔliw ni fáliw bee kéele n kpɔ́ʔɔ n sɔ̀lɔ wi fúngi ni àmɛɛ wi tága lè yele na gbanʔama. 23Ki ga yére Tiiti na, woro i nyɛ mii pínɛnyɛnnɛ, ní wɔ́ɔ i nyɛ mii falipyenyɛnnɛ yele kéeli na. Ki si ga yére wolo senyɛnzanbèle na, poro i nyɛ egilizibèle tundunbéle, ní wɔ́ɔ i nyɛ Kirisi nìjanri. 24Gee bee na ye yele tàmagi tɛ̀ɛn be na jàngó egilizibèle í gi cán bi fílige, yé wɔ́ɔ ye gi yaʔa be gi cán nyǔngee na wolo da ni yele mɛ́ɛtaanyi yiri lè.
Currently Selected:
2 Korɛnti ye 8: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
