2 Korɛnti ye 7
7
1Mii syɛɛn-nidaanmabèle, àmɛɛ nyɔɔfaliyi bee nyɛ wolo ma lè, ki n tɔ̀nɔ n yɛlɛ wo céri nɔ́nʔɔrɔ ní fúnyi nɔ́nʔɔrɔ kele myɛ mùnu wo láʔa woyɛɛ na, wó sín wo foro Kolocɔlɔɔ yɛ́ɛgi fyáara na.
Pɔli fundaanri kéele
2Ye wolo kéeli yaʔa li pye yele fúnyi ni! Wolo ga kolo syɔɔn faala ma í, wolo ga syɔɔn faala kálagi í, wolo ga syɔɔn faala nɔ̀ʔɔrɔ í. 3Mii o gee naa nyuu bi kolomɔ kaan yele ma í, níì cán mii maa téè gi joo n kwɔ́ɔ níì jo yele kéeli i nyɛ wolo fúnyi ni, yele ga kùu yoo, a yele náa i nyɛ sìi na yoo, wolo i nyɛ ní yele ní. 4Mii n tɔ̀nɔ n tága yele na, ní i nyɔ̌ngbɔɔlɔ táanri yele kéeli na, mii i nyɛ fûnnyinge na, àlí wolo wɔʔɔyi ní ki myɛ ní, fundaangbɔɔrɔ i nyɛ mii ma fwɔɔ n baa sɔ̀lɔ.
5 #
2Kor 2:13
Kányɛʔɛ na nlaa wolo jée lè Maseduwani ni, wolo céri ga ŋɔ́ndaala taa nyáana í. Wolo maa ni wɔʔɔ kàbanyi myɛ na, pe maa ni túngu ní wolo ní, á fyáari wɔ́ɔ̀ pye wolo ni. 6Kàjáa Kolocɔlɔɔ wi funjurugoyi fɔ̀ɔlɔ kɛɛlɛ lè, wi n wolo kɛɛlɛ Tiiti panni báriga ni. 7Wi panni yagana báriga ni si ban í, fwɔɔ gee wi baa joo wolo ma lè yele kéeli na, gee bee n jo, kánmee na yele woro tiimaa kɛɛlɛ lè, koro gi wɔ́ɔ̀ wolo kɛɛlɛ, níì cán wi n baa gi tɛ̀ɛn wolo na àmɛɛ gi láaw nyɛ yele na lè gbanʔama a yele i caa bi mii nyaa, ní àmɛɛ yele nyɛ funbɛɛnrɛ na lè, ní àmɛɛ yele yére n mii sɔ́lɔgɔ lè, a gee bee kàa taʔa mii fundaanri na.
8Alí mii sɛ́bɛw bee wírè funbɛɛnrɛ wáa yele na lè, gee bee ga mii bɛɛn í. Kányɛʔɛ ni ki maa sélì mii bɛɛn àmɛɛ mii da gi nyaa lè a sɛ́bɛw bee funbɛɛnrɛ wáa yele na n làla cɛɛri kwɔ́ɔ, 9mii si i fundaanra kpéʔele tɔ́ɔliw ni, gee bee ga jo mii i di kpéʔele àmɛɛ yele nyɛ funbɛɛnrɛ na lè í, kàjáa mii i di kpéʔele àmɛɛ yele funbɛɛnri yele kaan a yele kàdoʔo wáa yele kapeegèle ma lè. Níì cán yele funbɛɛnri naa n yɛlɛ ní Kolocɔlɔɔ kínidɛnɛgi ní, koro gi gi kaan yele ga bɔ̀nɔ yarigaa ni wolo kéeli na í. 10Níì cán funbɛɛnri di yɛlɛ ní Kolocɔlɔɔ kínidɛnɛgi ní lè, dee bee di syɛ́ɛnbèle kaangi a be i kàdoʔo wáa be kapeegèle ma, ní i syɔɔli taagi, syɔɔn a gbǎn kɔ́ ba mii-ga-ra-cán joo kàdowaari bee kéele na í, funbɛɛnri si di nyɛ lè dulunyanw wóro, dee bee di kùúw kaangi. 11Funbɛɛnri naa tiimaa n yɛlɛ ní Kolocɔlɔɔ kínidɛnɛgi ní, ye gi wéle gee funbɛɛnri bee kpéʔele yele ni lè. Yele n ŋàʔana gbanʔama n tànʔa taa! Ki n tɔ̀nɔ n yele fúnyi curugo, a yele fyáa gbanʔama, yele maa tɔ̀nɔ ni caa bi mii nyaa, níì kéeli bee cɔɔnri kányɛʔɛ ni, níì gi gbàn kakolobyew bee na gbanʔama! Yele n gi tɛ̀ɛn kánmi myɛ na ncan yele n fílige kéeli bee ni.
12Amɛɛ mii da sɛ́bɛw bee tórigo yele ma lè, mii da wi tórigo kakolobyew bee kéele na í, wàlá wee na wi kapeeli kpéʔele lè, mii da wi tórigo wee bee kéele na í, kàjáa mii maa wi tórigo jàngó gi tɛ̀ɛn yele ningi ni Kolocɔlɔɔ yɛ́ʔɛ ma kánmee na wolo kéeli tɔ̀nɔ́ nyɛ yele fúnyi ni lè. 13Gee bee gi baa wolo fúnyi nyíngi.
A wolo wɔ́ɔ̀ fundaangbɔɔrɔ taa n fàra wolo fûnnyingi na Tiiti fundaanri báriga ni, níì cán wi n ŋɔ́ndaala taa wi fúngi ni yele myɛ kéeli na. 14Amɛɛ mii da yele mɛ́ɛtaanyi yeri Tiiti ma lè, yele ga sáà fɛ̀ɛrɛ yaʔa a di mii taa keelaa na í. Amɛɛ wolo da ni kányɛɛgi nyuu yele ma lè làla o làla, kánmi bee wonijanma na syɛ́ɛnree wolo da ni nyuu lè ní i yele mɛ́ɛtaanyi yiri wi ma, dee bee n wɔ́ɔ sáà pye kányɛʔɛ, 15wi i sɔ̀ngí ni taagi gi na àmɛɛ yele myɛ da fɔ̀lɔ lè ni lúro wi ma, ní àmɛɛ yele da sáà wi sámaga n cò lè ní fyáara ní, ní i cɛ̀lɛ́, gee bee na kàa fàra wi ma yele tàmagi na. 16Mii i fundaanra kpéʔele àmɛɛ mii tága yele na kérigèle myɛ ni lè.
Currently Selected:
2 Korɛnti ye 7: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
