2 Korɛnti ye 2
2
1Mii n gi tímana mii fúngi ni n gi nyaa, ki ga yɛlɛ mii í lúru kári yaà yele ma tɔ́ɔliw ni funbɛɛnri nínge ni í. 2Níì cán mii ga ni funbɛɛnri wáa yele na, wìí syɔ́ɔn wi a zǐn fundaanra kaan mii ma, kapye yele bele na mii funbɛɛnri wáa lè í? 3Mii maa kéeli bee sɛ́bɛ n tórigo yele ma, koro ga pye yele bele má mii yɛlɛ mii í fundaanra taa lè, yele a kɔ́ funbɛɛnrɛ wáa mii na í. Mii n tága gi na ncan mii ga pye fundaanra na, yele myɛ wɔ́ɔ i nyɛ fundaanra na. 4Mii maa sɛ́bɛw bee sɛ́bɛ n tórigo yele ma ní wɔʔɔgbɔʔɔ, ní fûnnyaʔamiga, ní nyatinnɛʔɛmɛ ní, mii da koro kpéʔele bi funbɛɛnrɛ wáa yele na í, kàjáa mii maa gi kpéʔele jàngó àmɛɛ yele kéeli mii dɛ́nɛ lè gbanʔama, yele í gee bee cán.
Pe kapeebyew kùsulugo syɔɔ
5Kapye wàa n pye wàa na sábabu á wi pye funbɛɛnrɛ na, mii na ban wi di wáa í, yele pèle na wi di wáa, mii ga jo yele myɛ í, jàngó mii a kɔ́ gi gbàn bi sɔ̀lɔ í. 6Wɔʔɔli yele saamaw taʔa nǎnw bee na lè, lee bee n yɛlɛ ní wi ní n kwɔ́ɔ. 7Ki ga pye nya, ki n yɛlɛ ye wi kapeeli kùsulugo syɔɔ yé wi kɛɛlɛ, koro ga pye wi funbɛɛnri a kɔ́ gbàn bi sɔ̀lɔ wi na bi wi lìi í. 8Koro na mii i yele nyɛ́ɛri ye gi fílige ye tɛ̀ɛn wi na, tàmagi gi nyɛ yele ni wi kabangi na lè. 9Níì cán kányɛʔɛ ni mii maa sɛ́bɛw bee tórigo yele ma, koro ga pye mii í yele sɛʔɛ wéle bi gi cán kapye yele i yèré mii kérigèle myɛ ni. 10Yele ga wàa kapeele kusulugo syɔɔ, mii n wɔ́ɔ li kùsulugi syɔɔ. Níì cán kányɛʔɛ ni mii ga wàa kapeele kusulugo syɔɔ, mii n li kùsulugi syɔɔ yele kéeli na Kirisi nyɛ́nɛ na, 11koro ga pye Sutanaw a kɔ́ fànʔa taa wolo na í, níì cán wolo o nyɛ wi karinyanyi kéele sinján ni í.
Pɔli fúngi ga ŋɔ́ndaala taa Turowasi ni í
12 #
Kap 20:1
Lǎli ni mii nan Turowasi na lè, ní i caa bàā Kirisi Syɛɛnjóocǎnri nyuu, a Kàfɔw kpaaweele múgu mii ma yaà, 13koro ní ki myɛ ní mii fúngi ga gbàn n ŋɔ́ndaala taa í, níì cán mii da sáà wolo senyɛnw Tiiti nyaa yaà í. Koro na mii kólogi nyɛ́ɛri be ma n kári Maseduwani ma.
Fàndaari kéele Zyezu Kirisi ni
14Wolo i bariga kaangi Kolocɔlɔɔ ma, woro wee wi wolo kaan a wolo i fànʔa taagi lè kérigèle na làrigèle myɛ ni àmɛɛ wolo nyɛ lè Kirisi ni, ní i wolo téeri ni wi cánni nùngo caragi tɛ́ɛyi myɛ ni. 15Níì cán wolo i nyɛ Kirisi nùndaanna yáriga, gee wi kaan Kolocɔlɔɔ ma lè, bele be syoo lè ní bele be pùuní lè, poro myɛ níngi ni. 16Wolo i nyɛ pèle ma kùúw nùngo, gee gi be tórogi kùúw ma lè, ní si i nyɛ wozanbèle ma sìíw nùngo, gee gi be tórogi sìíw ma lè. Wìí fánʔa gi nyɛ kérigèle bee na? 17Níì cán wolo o nyɛ àmɛɛ pèle saʔa nyɛ lè, bele be jànvaaw nyáʔami Kolocɔlɔɔ syɛ́ɛnri ni jàngó bi tɔ̀nɔ taa lè í, kàjáa wolo i nyɛ Kolocɔlɔɔ tundunbéle ní i kányɛɛgi nyuu Kolocɔlɔɔ yɛ́ʔɛ ma Kirisi bárigaw ni.
Currently Selected:
2 Korɛnti ye 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
