2 Korɛnti ye 1
1
Fòów kéele
1 #
Kap 18:1
Mii Pɔli, wi lè Kirisi Zyezu pìitunwaa n yɛlɛ ní Kolocɔlɔɔ kínidɛnɛgi ní, mii ní wolo senyɛnw Timɔte ní, wolo a sɛ́bɛw naa tórigo Kolocɔlɔɔ Egiliziw ma wi lè Korɛnti ni, n fàra Kolocɔlɔɔ syɛɛncanbèle myɛ na be nyɛ lè Akayi tári myɛ ni. 2Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma!
Pɔli i bariga kaangi Kolocɔlɔɔ ma
3Wolo Kàfɔw Zyezu Kirisi Kolocɔlɔw wi yɛlɛ ní kpɔ̀ʔɔrɔli ní, wi lè wi Tóow, woro wee wi lè Tofɔw, wee nyínimɛ bi nɛʔɛ lè, ní wɔ́ɔ i nyɛ Kolocɔlɔɔ wee wi syɔɔn kɛɛlɛ kérigèle myɛ ni lè, 4woro wee wi wolo kɛɛlɛ wolo wɔʔɔyi féleye myɛ ni lè, koro ga pye wolo í gbǎn ra pèle nikwɔɔlɔ kɛɛlɛ pe wɔʔɔyi myɛ ni kɛɛlɛganmee na woro wolo tiimaa kɛɛlɛ lè! 5Níì cán àmɛɛ kàa taari Kirisi fɔ̀rɔyi féleye na yi tuun wolo na lè, kánmi bee na kàa wɔ́ɔ i fàrá wolo ma fûnnyingi na saʔa Kirisi bárigaw ni. 6Wolo ga ni wɔʔɔ, koro n kpéʔele yele kɛɛlɛli ní yele syɔ́ɔli kéele na. Kolocɔlɔɔ ga ni wolo kɛɛlɛ, koro n wɔ́ɔ̀ kpéʔele yele kɛɛlɛli kéele na, jàngó yele í wɔ́ɔ gbǎn ra wolo fɔ̀rɔyi féleye kpàracó yee ni wolo fɔ̀rɔgí lè. 7Wolo n wolo sɔ̀ngumi taʔa yele kéeli na gbanʔama, níì cán wolo n gi cán kánmee na yele pínɛ ni wɔʔɔ ní wolo ní lè, kánmi bee na pe a ba yele pínɛ kɛɛlɛ ní wolo ní.
8 #
1Kor 15:32
Ni senyɛ̀nnɛ, wɔʔɔyee yi wolo taa lè Azii tári ni, wolo o caa yele í kòro yi kéeli sìnján ni í, yi maa tɔ̀nɔ n líbe wolo na gbanʔama fwɔɔ n sɔ̀lɔ wolo fǎngi láʔala myɛ na, àlí wolo maa tɔ̀nɔ ni gi sɔ̀ngí wolo sìíw n kwɔ́ɔ n kwɔ́ɔ. 9Kányɛʔɛ na wolo maa gi nyaa wolo fúnyi ni n kwɔ́ɔ a gi yére wolo í kùu, gee bee si maa kpéʔele koro ga pye wolo a ní kɔ́ wolo sɔ̀ngumi taʔa woyɛɛ na í, fwɔɔ Kolocɔlɔɔ na woro wee wi kúbèle nyángi lè. 10Woro wi wolo syɔɔ kùupeew bee ma, woro si wi a sèʔé ra wolo syoo. Kányɛʔɛ na wolo n wolo sɔ̀ngumi taʔa wi na ncan wi a ní sèʔé ra wolo syoo, 11níì cán yele a ra wolo dɛ̀ɛmɛ́ ní nyɛ́ɛrigi ní Kolocɔlɔɔ ma, koro ga pye nyɛ́ɛrigee syɛ̀ɛnnɛ saʔa kpéʔele wolo kéeli na lè, Kolocɔlɔɔ a gi lóʔo. Wi a kacǎnni bee kpéʔele wolo na, syɛ̀ɛnnɛ saʔa si wɔ́ɔ ra bariga kaangi wolo kéeli na.
Pɔli n wi katimanagèle kàriga
12Gee gi nyɛ lè wolo kpɔ́ɔmi nyúngo, koro gi nyɛ àmɛɛ wolo fúnyi gi fílige n tɛ̀ɛn wolo na lè ncan wolo i táanri dulunyanw ni funjànya ní funviire na Kolocɔlɔɔ yɛ́ʔɛ ma, àlí tánʔaganmi bee na wolo da ni táanri yele níngi ni, syɔɔn sícilimɛ báriga ni ban wolo táanri í, Kolocɔlɔɔ kpɔ́ʔɔri báriga ni wolo táanri. 13Níì cán yafɔngɔ ban wolo sɛ́bɛ bi tórigo yele ma í, fwɔɔ gee yele wéle n kwɔ́ɔ lè, ní wɔ́ɔ̀ gi kɔ́rɔw cán. Mii i sɔ̀ngí yele a gi cán bi nan gi láʔali na, 14àmɛɛ yele cɛɛri cán n kwɔ́ɔ lè wolo kéeli ni, ncan wolo a ba pye yele ma kpɔɔmɔ sábabu wo Kàfɔw Zyezu cángi na, yele si wɔ́ɔ ba pye wolo kpɔ́ɔmi sábabu cángi bee na.
15Amɛɛ mii tága lè gee bee na, koro na mii da séli ni sɔ̀ngí bi sɔ̀lɔ yaà yele ma gbɛnʔɛnɛ, koro ga pye yele í kpɔ́ʔɔri taa tɔziin. 16#Kap 19:21 Si yìri yaà yele ma bi kári Maseduwani ma, koro kàdoʔo ma si yiri Maseduwani ni bi ní lúru kári yaà yele ma, gee bee kàdoʔo ma yele si náa sa mii tórigo Zyude tári ma. 17Amɛɛ mii da ni gee bee sɔ̀ngí lè, a yele jo lé mii maa ni gi córo kafaʔala? Ba yele jo lé mii n gi tímana syɛ́ɛnbèle tímanaganma na bi jo keelaa na ɛɛn, si ní kɔ́ jo li na eʔe? 18Amɛɛ gi nyɛ lè kányɛʔɛ ncan Kolocɔlɔɔ i nyɛ tágala syɔ́ɔn, ànbée wi tundunri wɔ́ɔ̄ nyɛ kányɛʔɛ, dee wolo da sáà joo yele ma lè, ti o nyɛ ɛɛn keelaa na, si ní pye kéeli bee wonijanna na eʔe í. 19#Kap 18:5 Níì cán Kolocɔlɔɔ Jáaw, wi lè Kirisi Zyezu, woro wee kéele mii, ní Silivɛn,#1:19 Silivɛn: Pèle wɔ́ɔ i mɛ́ɛgi bee yiri Silasi, syɛɛnnijanw si wii. ní Timɔte da sa ni nyuu yele ma lè, wi da pye ɛɛn ní eʔe í, kàjáa woro ni ɛɛnw nyɛ. 20Níì cán Kolocɔlɔɔ nyɔɔfaliyi myɛ i nyɛ ɛɛn Zyezu ni. Gee bee na wolo gi nyuu Amiina woro bárigaw ni jàngó bi kpɔʔɔrɔ taʔa Kolocɔlɔɔ na. 21Wee wi wolo ní yele tan lè Kirisi na, níì wo nyɛ́nɛ n wòlo n télege wi fáliw na lè, woro wi nyɛ Kolocɔlɔɔ. 22Woro wi wɔ́ɔ̀ wi fɛ̀ɛ́w taʔa wolo na, àmɛɛ wi Pìicǎnni kaan wolo ma lè li pye wolo fúnyi ni, loro li nyɛ yaseligi wozanri yɛ́ʔɛ na.
23Mii si n Kolocɔlɔɔ láa wi pye mii fúngi séera, ncan gee na mii da mii gàriw sàa lè yele Korɛnti ye ma, koro gi nyɛ jàngó ki a kɔ́ gbàn yele ma í. 24Gee bee ga jo wolo i yele kàragí tágali kólogo ni wii í, kàjáa wolo i nyɛ yele falipyenyɛ̀nnɛ, jàngó yele í fundaanra taa, níì cán yele n sámaga n yére tágali ni.
Currently Selected:
2 Korɛnti ye 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
