2 Korɛnti ye 12
12
Yanyaayi ní kérigèle tɛ̀ɛnnɛ kéele Pɔli na
1Fwɔɔ mii í niyɛɛ gbɔ́ʔɔ, bi gi taa gee bee o nyɛ ní báriga ní í. Mii a jo tɔ́ɔliw ni yanyaayi ní kérigèle tɛ̀ɛnnɛ kéele na gele Kàfɔw tɛ̀ɛn mii na lè. 2Mii n nànwaa cán Kirisi ni, wee pe da láa n tórigo lè nyɛ̀ʔɛgèle taanri wólo ma, ki n yɛ̀ʔɛlɛ kɛɛ ní sicɛrɛ kwɔ́ɔ n kwɔ́ɔ, (kapye wi maa pye céri ni yoo, wàlá wi da zǐn pye céri ni í yoo, mii ga gi cán í, Kolocɔlɔɔ wi gi cán.) 3Mii si n gi cán nǎnw bee, (kapye wi maa pye céri ni yoo, wàlá wi da zǐn pye céri ni í yoo, mii ga gi cán í, Kolocɔlɔɔ wi gi cán,) 4pe n wi láa n tórigo tɛɛcǎngi ma, a wi sáà syɛɛntaanra lóʔo, dee di lè syɔɔn a gbǎn di joo í, pe ga caà fɔ̀lɔ syɔɔn í di joo í. 5Wee bee félege kéele ní mii a ra niyɛɛ gbɔ́ʔɔgi, mii si a tée niyɛɛ gbɔ́ʔɔ ní mii tiimaa kéeli ní í, kapye mii fànʔa-fǔnmi kéele ní ban í. 6Alí kapye mii i caa bi niyɛɛ gbɔ́ʔɔ yoo, mii a pye àmɛɛ nilabalaga nyɛ lè í, níì cán kányɛɛgi mii a ra nyuu. Mii si a fɔ̀lɔ bi niyɛɛ gbɔ́ʔɔ í, koro ga pye gee syɛ́ɛnbèle mii nyaa mii i kpéʔele lè, wàlá gee be lúro mii ma lè, pe wàa faala a kɔ́ mii córo bi sɔ̀lɔ koro na í.
7Kérigèle be tɛ̀ɛn mii na lè àmɛɛ ge kpólo lè, gee bee na a be wúugo tɛ́ʔɛ n mii súu céri na, koro ga pye mii a kɔ́ nyìn kpɔ́ɔmi na í, wúugi bee i nyɛ Sutanaw tunduɔn jàngó waa mii wɔʔɔ, koro ga pye mii a kɔ́ nyìn kpɔ́ɔmi na í. 8A mii Kàfɔw nyɛ́ɛri tɔlɔyɔ taanri jàngó wi gi láʔa mii na, 9a wi mii yari: «Mii kpɔ́ʔɔri n yɛlɛ ní mɔ ní, níì cán mii fǎngi i gi kapyeli forogi mɔ ma lǎli ni mɔ nyɛ lè fànʔa-fǔnmi ni.» Gee bee na ki n mii dɛ́nɛ gbanʔama n sɔ̀lɔ mii í niyɛɛ gbɔ́ʔɔ ní mii fànʔa-fǔnmi kèlē ní, koro ga pye Kirisi fǎngi í pye mii ni bàā mii dɛ̀ɛmɛ́. 10Koro na mii i fundaanra kpéʔele mii fànʔa-fǔnmi kèlē na, n náà fàra tɛʔɛlɛyi, ní fɔ̀rɔyi, ní wɔʔɔyi, ní kagbanyi na yi tuun mii na lè Kirisi kéeli na. Níì cán mii fǎngi ga cɛ́rɛ lǎlee ni lè, lǎli bee ni mii nyɛ ní fànʔa ní.
Pɔli fyáari kéele Korɛnti ye kéeli na
11Yele ye mii ŋàʔana a mii baa pye mɔ a jo nilabalaga gii. Ki mǎà dée yɛlɛ yele í da mii mɛ́ɛtaangi yiri. Níì cán mii ga cɛ́rɛ pìitun-gbólobèle bee na keelaa faala ni í, àlí ki ga wírè pye mii o nyɛ yafyɛn í. 12Kérigèle ge gi tɛ̀ɛn lè mii i nyɛ pìituɔn kányɛʔɛ ni, mii maa ni gele bee kpéʔele ní kpàracogi myɛ ní yele níngi ni, koro ge nyɛ fɛ̀ɛ́bèle, ní bìngaari kèlē, ní kakpoloyi. 13Keelìí li nyɛ mii ga yele córo li ni sèjira ní egilizisanbèle ní í, kapye lee naa nibin ban í, li lè mii ga pye yele na tugoro í? Ye mii kapeeli bee kùsulugo syɔɔ!
14Ye wéle, mii n sámaga n kwɔ́ɔ bi kári yaà yele ma tɔdaanri wógi na, mii si a sa pye yele na tugoro í. Níì cán mii o yele kɔ́lɔ yáriri caa í, fwɔɔ yele tiimaa. Pìíbèle ban be yɛlɛ paa lɔ́ri téeri be seefɔbèle kéele na í, seefɔbèle be yɛlɛ paa di téeri be pìíbèle kéele na. 15Ki n mii dɛ́nɛ gbanʔama bi mii lɔ́ri kaan yele ma si wɔ́ɔ niyɛɛ gaan yele pìígèle kéele na. Amɛɛ si mii tàmaga le ní yele ní lè gbanʔama, a mii tàmagi yɛlɛ lé ki ba cɛ́rɛ yele fúnyi ni?
16Dɔ̀ʔɔ́ yele a fɔ̀lɔ bi gi joo si jo mii da pye yele na tugoro í, si náa jo kàjáa mii maa cìlige, níì yele lɛ́ɛlɛ n cò ní gbánama ní. 17Bele mii tun yaà yele ma lè, a bele bee wàa sáà yele nɔ̀ʔɔrɔ lé níì jo mii wi woro tun? 18Mii maa Tiiti nyɛ́ɛri wi kári yaà yele ma, níì wo senyɛnw tórigo ní wi ní, a Tiiti sáà yele nɔ̀ʔɔrɔ lé? Wolo da ni táanri fungo nibin na ì? Ba wolo da ni táanri kannijanma na ì?
19Nlaa yaà làridɔɔnnɔ ni yele i gi sɔ̀ngí mɔ a jo wolo i tànʔa caa yele ma. Eʔe, mii syɛɛn-nidaanmabèle, Kolocɔlɔɔ yɛ́ʔɛ ma wolo nyuu àmɛɛ wolo nyɛ lè Kirisi ni, koro myɛ si i nyɛ bi kàa taʔa yele na. 20Mii i fɛ̀ɛgí níì jo kánmee na mii caa bi sa yele nyaa lè, dɔ̀ʔɔ́ mii a sa yele nyaa ànbée í, ní kánmee na yele caa bi sa mii nyaa lè, dɔ̀ʔɔ́ yele a wɔ́ɔ sa mii nyaa kánmi bee na í. Mii i fɛ̀ɛgí níì jo dɔ̀ʔɔ́ mii a sa kàsiiw, ní nyabɛɛnni, ní fundanʔari, ní fungboloyi, ní mɛ́ɛkalagiri, ní syɛɛnsanʔari, ní nɛ̀ɛnyɛnɛgi, ní kanyaʔamiri nyaa yaà yele níngi ni. 21Mii wɔ́ɔ i fɛ̀ɛgí n jo mii ga níì kári yaà yele ma, mii Kolocɔlɔw a sa mii cɛ́rɛ yele níngi ni, mii fúngi sáā mii yáa gbanʔama pèle saʔa kéele na, bele be kapeegèle kpéʔele n kwɔ́ɔ lè, pe si ga kɔ́ɔ̀ kàdoʔo wáa ge ma í, gele ge nyɛ lè nɔ́nʔɔri kèlē, ní ceyuugi, ní nànyuugi, ní kálagimi.
Currently Selected:
2 Korɛnti ye 12: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
