2 Korɛnti ye 11
11
Pɔli ní pìitun-váanabèle kéele
1Ee! Yele ga fɔ̀lɔ ye mii gbanzan syɛ́ɛnri kpàraco cɛɛri! Kàjáa mii n gi cán yele i mii kpàracó! 2Yele kéeli i nyɛ mii na nyabɛɛnnɛ, nyabɛɛnni bee n yìri Kolocɔlɔɔ ma, níì cán yele i nyɛ àmɛɛ nàngeelesinján pìcaasiɔn nyɛ lè, wee mii tɛ̀ɛn lè nàɔn nibin na, jàngó wi wi pɔri, nǎnw bee wi nyɛ Kirisi. 3#Sél 3:1-5,13 Kánmee na wàbigi da Ɛvi fáana ní gi sícilibeemi ní lè, mii i fɛ̀ɛgí níì jo dɔ̀ʔɔ́ yele yákiriw a wɔ́ɔ kɔ́ kàri kánmi bee na yele í láʔa funviiri ní funjǎnyi na Kirisi kàbangi na. 4Níì cán wàa ga pan n baa Zyezuwaa nikwɔɔ kéele joo yele ma n gi yaʔa wee kéele wolo nyuu yele ma lè woro wonijanw ban í, wàlá yele ga pìlaa nikwɔɔ taa lee li lè li o nyɛ yele wodaalɛɛli í, koro ga jáa yele ga syɛɛnjóocànraa nikwɔɔ lóʔo dee di lè ti o nyɛ yele wolóʔolɛɛri í, yele n fala n fɔ̀lɔ wi na gbanʔama.
5Mii i gi tímana n jo mii ga cɛ́rɛ pìitun-gbólobèle bee na kanmaa faala na í. 6Alí mii ga pye mii ga wírè gbàn joomi na í yoo, kàjáa mii ga fɔ̀n kérigèle cánna ni í, wolo n gee bee fílige n tɛ̀ɛn yele na kérigèle myɛ ni kánmi myɛ na.
7Lǎli ni mii sáà Kolocɔlɔɔ Syɛɛnjóocǎnri joo yele ma lè, mii maa di joo sàra fun ni, níì niyɛɛ jɛ́rɛ jàngó yele í kpólo, àmɛɛ mii koro kpéʔele lè, kapeele lé mii da pye? 8Mii n sàra syɔɔ egilizibèle pèle ma, a gi pye mɔ a jo mii n be fuguru jàngó mii í da báara yele ma. 9#Filip 4:15-18 Alí mii ga pye yaà ní yele ní lǎli ni lè, níì fɔ̀n yarigaa ni, mii o gáà pye yele wàa faala na tugoro í, níì cán wolo senyɛnbèle pe da yìri Maseduwani ma lè, bele bee maa mii màkow myɛ nyɔɔ. Mii maa ni niyɛɛ kɔ̀rɔsíi, koro ga pye mii a kɔ́ pye yele na tugoro kanmaa faala na í, mii si a sèʔé ní da niyɛɛ kɔ̀rɔsíi. 10Kirisi kányɛɛgi gi mii ma lè, koro bárigaw ni mii jo pe a gbǎn mii yérige kpɔ́ɔmi naa joolo na Akayi tári tɛ́nɛmaa faala ni í. 11Nyàʔá na? A gee bee jo lé yele kéeli ga mii dɛ́nɛ wii í? Kolocɔlɔɔ n gi cán yele kéeli n mii dɛ́nɛ!
12Gee mii da ni kpéʔele lè, mii a sèʔé da gi kpéʔele, koro ga pye bele be kanmaa caa lè bi peyɛɛ gbɔ́ʔɔ si jo poro i nyɛ sèjira ní wolo ní lè, pe a kɔ́ kánmi bee taa í. 13Syɛ́ɛnbèle bee félege i nyɛ pìitun-váanabéle, ní i jànvaaw kèlē kpéʔele, níì peyɛɛ gàriga mɔ a jo Kirisi pìitunbéle poro nyɛ. 14Gee bee o nyɛ funwɔɔ-keele í, níì cán Sutanaw tiimaa i wiyɛɛ gàragí mɔ a jo gbɛ̀ɛ́nmi tundunwaa wii. 15Koro na wi falipyebèle ga peyɛɛ gàriga n pye mɔ a jo sínni falipyebèlē bɛɛ, gee bee o wɔ́ɔ̄ nyɛ funwɔɔ-keele í. Pe kwɔ́ɔmi a ba pye bi yɛlɛ ní be kapyegèle ní.
Wɔʔɔyi Pɔli taa lè àmɛɛ wi nyɛ lè pìituɔn
16Mii a ní gi joo taʔa si jo, ki ga yɛlɛ syɔɔnwaa faala í da mii córo nilabalaga í. Kapye yele i mii córo nilabalaga, koro ní ki myɛ ní ye sèʔé ye fɔ̀lɔ mii na koro ga pye mii í wɔ́ɔ niyɛɛ taa kpɔ́ʔɔ cɛɛri. 17Dee mii nyuu lè tɔ́ɔliw ni, Kàfɔw jooganma na ban mii di nyuu í, fwɔɔ nilabalaga jooganma na jàngó bi niyɛɛ taa kpɔ́ʔɔ. 18Amɛɛ syɛ̀ɛnnɛ saʔa peyɛɛ gbɔ́ʔɔgi ní dulunyanw kèlē ní lè, koro na mii a wɔ́ɔ niyɛɛ gbɔ́ʔɔ. 19Ncan yele ye cìlige lè, yele n sèʔê fɔ̀lɔ ni nilabalaya kpàracó! 20Yele n fɔ̀lɔ gi na a be i yele kàragí àmɛɛ pulobèlē nyɛ lè, ní i yele nɔ̀ʔɔrɔ́ ni líi, ní i yele jànváa, ní i peyɛɛ nyɛ́nɛ yele na, ní i yele kpúmɔn yɛ́ɛyi ni, a yele i gee bee kpàracó. 21Ki i nyɛ mii na fɛ̀ɛrɛ bi gi joo si jo, wolo fǎngi n cɛ́rɛ gee bee félege kpéʔelele na.
Kapye wàa n fɔ̀lɔ bi wiyɛɛ gbɔ́ʔɔ kanmaa na, mii a wɔ́ɔ fɔ̀lɔ bi niyɛɛ gbɔ́ʔɔ kánmi bee na ní mii gbanzan syɛ́ɛnri ní! 22A be i nyɛ lé Heburubèle pèle? Mii wɔ́ɔ i nyɛ poro wàa. A be i nyɛ lé Isirayɛli ye wóbèle pèle? Mii wɔ́ɔ i nyɛ poro wàa. A be i nyɛ lé Abirahami yòdaʔaya? Anbée mii wɔ́ɔ̄ nyɛ. 23#Kap 16:23 A be i nyɛ lé Kirisi falipyebèlē? Mii i nyɛ Kirisi falipyeo n sɔ̀lɔ poro na. (Mii i nyuu mɔ a jo nilabalaga gii.) Mii n báara n sɔ̀lɔ poro na, ní wɔ́ɔ̀ kàsow pye n sɔ̀lɔ be na. Pe n mii kpúmɔn gbanʔama n sɔ̀lɔ poro na. Mii maa pye kùúw kɔ́yɔ ni tɔlɔyɔ saʔa. 24#Làlw 25:3 Zyefubèle n mii kpúmɔn tɔlɔyɔ kagunɔ sapiinyɛnyɛ togoye siin-ziin nibin nibin fɔ̀n. 25#Kap 16:22; 14:19 Pe n mii kpúmɔn ní kàgbeegèle ní tɔlɔyɔ taanri, pe n mii wábagi ní kàdɛnɛri ní tɔlɔgɔ nibin, bàtow n kálagi ní mii ní tɔlɔyɔ taanri, mii n canʔa nibin ní yébilige nibin kwɔ́ɔ lòkpɔɔgi ni. 26#Kap 9:23; 14:15 Mii maa ni syée kǔgèle ni tɔlɔyɔ saʔa, mii maa kɔ́ naà kálagi cábiyi ni, ní kàyuu-fànʔafɔbèle kɔ́yɔ ni, àlí mii maa kɔ́ naà kálagi mii felegefɔ-nyɛ́nbèle, ní syɛɛnfeleyaa nikwɔɔ kɔ́yɔ ni, mii maa ní kɔ́ naà kálagi kèyaa, ní fìími tára, ní sólomi lòkpɔʔɔ ni, ní senyɛn-váanabèle kɔ́yɔ ni. 27Fáliw maa nɛʔɛ mii na, ní wɔ́ɔ̀ gbàn. Sìnŋunɔmi maa pye mii na làrigēle saʔa ni, a kateegi ní lògbaagi i mii jáagi. Sìnliimi maa pye mii na làrigēle saʔa ni, wéeri si i mii kúu, fànilew fɔ̀ngɔ si i nyɛ mii na. 28Mii a náa wáa wozanri myɛ na bàā nyuu í, kàjáa gee gi wári lè mii na canʔa o canʔa, koro gi nyɛ àmɛɛ egilizibèle kèlē a pye lè sáā cɔɔnri. 29Wìí syɔ́ɔn wi nyɛ fànʔa fun, mii si ga pínɛ n pye fànʔa fun ní wi ní í? Ba wìí wi too, ki si o mii yáa mii fúngi ni í?
30Ki ga yére mii í niyɛɛ gbɔ́ʔɔ, mii fànʔa-fǔnmi kéele na mii a niyɛɛ gbɔ́ʔɔ. 31Kàfɔw Zyezu Kolocɔlɔw, wi lè wi Tóow, woro wee wi lè dùbanaa-bàngwɔɔw fɔ́lɔ, woro n gi cán mii o finɛ í! 32#Kap 9:23-25 Lǎli ni mii pye lè Damasi ni, fànʔafɔw wi pye yaà lè, wee tári fɔ́lɔ Aretasi da télege lè, wi maa ni Damasi kěgi kɔ̀rɔsíi jàngó bi mii taa cò. 33A pèle si mii le sɛ̀ʔɛkpɔɔlɔ ni n yirige tǒw wéʔe ni n tìrige tǒw kàdoʔo ma, a mii taa n syɔɔ wi ma.
Currently Selected:
2 Korɛnti ye 11: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
