2 Korɛnti ye 13
13
Sàmizanni ní fòów kéele
1 #
Làlw 17:6; 19:15 Mii tɔdaanri wógi na mii syée gee yele ma. «Kérigèle myɛ a sa cɔɔnri séerafɔɔlɔ siin, wàlá taanri nyɔɔsyɛɛnrɛ báriga ni.» 2Lǎli ni mii da pye yaà ní yele ní lè tɔziin wógi na, bele pe da kapeegèle kpéʔele lè, mii maa sélì be sàmi n náà fàra wozanbèle myɛ na, àlí n gi yaʔa mii o yaà tɔ́ɔliw ni í, mii a ní be sàmi, mii ga níì kári yaà yele ma, mii a pe wàa faala yaʔa í, 3níì cán yele i caa bi gi cán kapye Kirisi wi nyuu mii nyɔ́ɔgi ni, woro wee wi lè wi o nyɛ fànʔa fun yele kàbangi na í, kàjáa wi i nyɛ ní fànʔa ní yele níngi ni. 4Níì cán pe maa wi kóri tiiparigi na wi fànʔa-fǔnmi báriga ni, kàjáa wi i nyɛ sìi na Kolocɔlɔɔ fǎngi báriga ni. Wolo si wɔ́ɔ i nyɛ fànʔa fun woro ni, kàjáa wolo a ba pye sìi na ní wi ní yele kéeli na Kolocɔlɔɔ fǎngi báriga ni.
5Ye gi tímana ye wéle yele fúnyi ni, yé wɔ́ɔ ye yeyɛɛ zɛʔɛ ye wéle bi gi cán kapye yele i nyɛ tágali ni. Yele ga gi cán ncan Zyezu Kirisi i nyɛ yele fúnyi ni ì? Fwɔɔ yele ga yeyɛɛ zɛʔɛ n wéle n gi nyaa yele ga foro í. 6Mii sɔ̀ngumi si i nyɛ gi na n jo yele a gi cán wolo sɛʔɛweleli n gi tɛ̀ɛn yele na wolo n foro. 7Wolo i Kolocɔlɔɔ nyɛ́ɛri jàngó yele a kɔ́ kapeelaa faala kpéʔele í. Ki o nyɛ mɔ a jo wolo i caa bi gi tɛ̀ɛn àmɛɛ wolo foro lè í. Kàjáa wolo i wi nyɛ́ɛri koro ga pye yele í tɛ́nɛ da síngi da táanri, àlí wolo sɛʔɛweleli ga wírè gi tɛ̀ɛn n jo wolo ga foro í. 8Níì cán wolo a gbǎn yafyɛn kpéʔele bi kányɛɛgi yérige í. A wolo a yére gi ni wii. 9Wolo ga pye fànʔa fun lǎlee ni lè, á yele si i nyɛ ní fànʔa ní, fundaanra i nyɛ wolo ma lǎli bee ni, gee si wolo caa lè wolo nyɛ́ɛrigi ni, koro gi nyɛ yele í sín bi foro. 10Amɛɛ gi nyɛ lè mii o yaà ní yele ní í, koro na mii syɛ́ɛnri naa sɛ́bɛ n tórigo yele ma, koro ga pye mii ga kɔ́ɔ̀ pye ní yele ní lǎlee ni lè, mii a kɔ́ gi gbàn yele na bi yɛlɛ ní séew ní wee Kàfɔw kaan mii ma lè í, wi n séew bee kaan mii ma koro ga pye kàa í da taari yele na, wi ga wi kaan yele kálagili kéele na í.
11Tɔ́ɔliw ni, ni senyɛ̀nnɛ, ye pye fundaanra na, yaa yeyɛɛ zámagi yé sín ye foro, yáā yeyɛɛ kɛɛlɛ, yé pye fungo nibin na, ye wɔ́ɔ pye fûnnyinge na, koro ga pye Kolocɔlɔɔ wi lè tàmagi ní fûnnyingi Kàfɔlɔ, woro a pye ní yele ní.
12Yaa yeyɛɛ syáanri, yáā yeyɛɛ syɔɔnri ní funjànya ní.
Kolocɔlɔɔ syɛɛncanbèle myɛ n yele syáanri yaà.
13Ki n yɛlɛ Kàfɔw Zyezu Kirisi kpɔ́ʔɔri ní Kolocɔlɔɔ tàmagi, ní Pìicǎnni pínɛnyɛnnɛgɛ í pye yele myɛ ma.
Currently Selected:
2 Korɛnti ye 13: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
