1 Korɛnti ye 16
16
Wáliw kpóʔorolo kéele senyɛnbèle pèle kéele na
1 #
Wɔr 15:25-26
Tɔ́ɔliw ni mii a joo yele ma wáliw kpóʔorolo kéele na, wee yele a kaan lè Kolocɔlɔɔ syɛɛncanbèle ma, àmɛɛ mii gi joo lè Galasii tɛ́nɛmi egilizibéle ma, ye wɔ́ɔ yaa gi kpéʔele nya. 2Koro gi nyɛ cégboolo o cégboolo cânzeligi na, yele myɛ nibin nibin n yɛlɛ bi wáliwaa tɛ́ʔɛ tɛ́ʔɛ yele kpáayi ni bi yɛlɛ ní yele taaganmi ní, koro ga pye yele a kɔ́ yére lǎli ni mii ga nan yaà lè si náa wáliw bee kpóʔoro í. 3Mii ga nan yaà lǎlee ni lè, syɛ́ɛnbèle bele yele ga nyɛ́nɛ n wòlo lè, mii a bele bee tun, si lɛ́tiribèle pèle kaan be ma be kári ní yele kpɔ́ʔɔri ní Zyerusalɛmi ma. 4Kapye ki n sáà nyaa mii tiimaa í wɔ́ɔ kári, pe a pínɛ ní mii ní.
Gee Pɔli timana bi kpéʔele lè
5 #
Kap 19:21
Mii a kári yaà yele ma lǎli ni mii ga foro Maseduwani ni lè, níì cán Maseduwani ni mii a foro. 6Dɔ̀ʔɔ́ mii a làlaa kwɔ́ɔ yaà ní yele ní, àlí ki a gbǎn pye mii í wéeri làla kwɔ́ɔ yaà, koro kàdoʔo ma yele si náa sa mii tórigo mii tɛɛkárigi ni. 7Mii o caa bi sa yele nyaa si sɔ̀lɔ́ fala í, kàjáa mii sɔ̀nguri i nyɛ gi na bi mɔn yaà ní yele ní, ní Kàfɔw ga fɔ̀lɔ.
8 #
Lev 23:15-21; Làlw 16:9-11 #Kap 19:8-10Mii si a kòro nɛɛ naa Efɛzi ni bi taa Pantikɔtiw canʔa í ba sɔ̀lɔ. 9Níì cán Kolocɔlɔɔ n kɔ̀rikpɔʔɔ sámaga n múgu mii ma fáliw kéele na, á kàsiitun-nyɛ́nbèle si nɛʔɛ.
10 #
1Kor 4:17
Timɔte ga nan yaà yele na, yele a kɔ́ wi yaʔa wi fyáa yafyɛn na yele níngi ni í, níì cán wi i Kàfɔw fáli kpéʔele àmɛɛ mii tiimaa nyɛ lè. 11Ki ga yɛlɛ syɔɔn faala í kɔ́ wi faʔa í. Ye wi tórigo náa mii ma fûnnyinge na, níì cán mii i naa ni woro, ní wolo senyɛnbèle sige.
12Gee gi wolo senyɛnw Apolɔsi kéeli kwɔ́ɔ lè, mii n wi nyɛ́ɛri gbanʔama níì jo wi kári yaà yele ma ní wolo senyɛnbèle ní, wi si ga fɔ̀lɔ bi kári yaà lǎli naa ni nyáana í. Wi ga kɔ́ɔ̀ làlaa taa wi a kári yaà.
Tundunzanri ní fòów kéele
13Ye kòro nyɛ̀nɛ na, yé pye lòmaanafɔɔlɔ tágali ni, yáā nànzorodo kpéʔele, yé nìrimɛ le, 14yáā yele kérigèle myɛ kpéʔele ní tàmaga ní.
15 #
1Kor 1:16
Gee naa mii a ní joo kaan yele ma. Ni senyɛ̀nnɛ, yele n gi cán Sitefanasi kpáagi wòolo be nyɛ Akayi tári tágafɔzelibéle, ní wɔ́ɔ̀ gi cán pe n peyɛɛ gaan Kolocɔlɔɔ syɛɛncanbèle ma ni be màkow nyɔɔgi. 16Mii i yele nyɛ́ɛri yele í wɔ́ɔ ra lúro syɛ́ɛnbèle bee félege ma n fàra bele myɛ na be lɛɛlɛ láa fáliw ni ni báara ní wolo ní lè.
17Mii i fundaanra kpéʔele gbanʔama Sitefanasi, ní Fɔritunatusi, ní Akayikusi panni kéele na. Gee gi lè yele ga pye naa n gi taa n kpéʔele í, poro n baa gee bee kpéʔele. 18Níì cán pe n mii ní yele fúnyi nyíngi. Ki n yɛlɛ ye gi cán syɛ́ɛnbèle bee félege n yɛlɛ ní kpɔʔɔrɔ ní.
19 #
Kap 18:2
Azii tári Egilizibéle n yele syáanri. Akilasi ní Pirisii n wɔ́ɔ̀ yele syáanri yaà gbanʔama Kàfɔw mɛ́ʔɛ na n fàra Egiliziw na wi kpóʔoro lè be kpáagi ni. 20Wolo senyɛnbèle myɛ n yele syáanri yaà.
Ki n yɛlɛ yaa yeyɛɛ syáanri, yáā yeyɛɛ syɔɔnri ní funjànya ní.
21Mii Pɔli tiimaa wi fòów naa sɛ́bɛ. 22Kàfɔw kéele ga pye li ga syɔ́ɔnwee dɛ́nɛ lè í, ki n yɛlɛ wi dánga! Maranata.#16:22 Maranata: Maranata kɔ́rɔw wi nyɛ: Wolo Kàfɔw i maa, koro ga jáa: Kàfɔw, maa maa.
23Ki n yɛlɛ Kàfɔw Zyezu í wi kpɔ́ʔɔri kaan yele ma!
24Yele bele myɛ ye nyɛ lè Kirisi Zyezu ni, yele kéeli n mii dɛ́nɛ.
Currently Selected:
1 Korɛnti ye 16: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
