1 Korɛnti ye 9
9
Kérigèle ge yɛlɛ kaa kpéʔele pìituɔn ma lè, ní wi fáliw
1Mii o nyɛ wɔ́rɔɔ ì? Mii o nyɛ pìituɔn ì? Mii ga wolo Kàfɔw Zyezu nyaa ì? Fáliw mii kpéʔele lè Kàfɔw ma, yele ban ye nyɛ fáliw bee ì? 2Kapye mii o nyɛ pìituɔn pèle ma í, mii si tɔ́ɔ i nyɛ pìituɔn yele ma. Níì cán àmɛɛ yele nyɛ lè Kàfɔw ni, gee bee i nyɛ fɛ̀ɛ n gi tɛ̀ɛn mii i nyɛ pìituɔn kányɛʔɛ ni.
3Bele be mii kologi lè, poro má mii a syɛ́ɛnri naa joo si jo: 4«Tànʔa o nyɛ wolo ma bàā líi sáā gbo ì? 5Ba tànʔa o nyɛ wolo wàa ma bi tágafɔjewaa pɔri wi pínɛ waa nyaari ní wi ní ì àmɛɛ pìitunzanbèle* gi kpéʔele lè n fàra Kàfɔw senyɛ̀nnɛ, ní Sefasi#9:5 Sefasi: Mɔ ga lóʔo Sefasi, Siimɔn Pyɛri be yiri nya. na ì? 6A yele jo lé tànʔa o nyɛ mii ní Barinabasi ma wolo í kòro wolo a wɔ́ɔ kɔ́ ra báara í?» 7Wìí wi sùlasiiri kpéʔele ní i di kérigèle wáli wóo wiyɛɛ ni? Wìí wi ɛrɛzɛn séʔe fála, wi si o líi ki yasanri na í? Ba wìí wi yaweere nàʔá, wi si o gbo di nɔ́nɔw na í?
8A yele jo lé syɛ́ɛnri naa mii joo lè, ti i nyɛ syɛ́ɛnbèle funzɔngumɔ wóro? Mowizi làlwaw sɛ́bɛ wɔ́ɔ o syɛ́ɛnri naa wonijanra nyuu ì? 9#Làlw 25:4; 1Tim 5:18 Níì cán ki n sɛ́bɛ Mowizi làlwaw ni níì jo: «Nìfalagi gi yaliiri sàngí lè, mɔ a kɔ́ cɔ̀ɔ pwɔɔ gi nyɔ́ɔgi na í.» Nǐyi kéele na lé Kolocɔlɔɔ da ni sɔ̀ngí? 10Wolo yagana kéeli na ban wi da koro joo ì? Ɛɛn, wolo kéeli na wi gee bee sɛ́bɛ. Wee wi fála lè, ní wee wi yaliiri sàngí lè, ki n yɛlɛ paa báara ní lòmaana ní si tága gi na bi cán poro a be lɛɛli taa. 11#Wɔr 15:27 Amɛɛ wolo Pǐli yacanra lùgu lè yele fúnyi ni, kapye wolo n tàa taa yele ma dulunyanw yárira ni, a gi a pye lé kapeele? 12Ní syɛ́ɛnbèle pèle ga ni yele ŋàʔaná ni dee bee taagi, wolo da yɛlɛ bàā yele ŋàʔaná bi sɔ̀lɔ poro na ì?
Kàjáa wolo ga fɔ̀lɔ n gee bee kpéʔele í, fwɔɔ a wolo i kérigèle myɛ kpàracó, koro ga pye wolo a kɔ́ Kirisi Syɛɛnjóocǎnri yérige nyáana í. 13#Làlw 18:1 Bele be báara lè kpɔ̀ʔɔrɔli kpaʔa ni, poro i líi kpɔ̀ʔɔrɔli kpaʔa yárira na. Ní bele be báara lè sáriga-wòlo-tɛ́ɛgi ni, poro i líi sáriga-wòlo-tɛ́ɛgi yárira na, yele ga gee bee cán ì? 14#Mat 10:10; Luk 10:7 Kánmi bee na Kàfɔw wɔ́ɔ̀ gi joo níì jo, bele be woro Syɛɛnjóocǎnri nyuu lè, pe a ra líi Syɛɛnjóocǎnri báriga ni.
15Mii tiimaa si ga gee bee kàa pye í, mii ga wɔ́ɔ̀ dee naa sɛ́bɛ n tórigo jàngó gee bee kàa í kpéʔele mii ma í. Sáni lè syɔɔn í mii kpɔ́ɔmi kálagi, kùúw n pɔ́rɔ mii ma n sɔ̀lɔ gee bee na! 16Mii ga ni Syɛɛnjóocǎnri nyuu, koro a gbǎn pye mii í da niyɛɛ gbɔ́ʔɔgi ní di jooli ní í, níì cán di jooli i nyɛ mii ma ŋàʔanaga. Mii ga pye mii o Syɛɛnjóocǎnri nyuu í, gee bee a pye wɔʔɔlɔ mii na! 17Kapye mii tiimaa wi da fáliw bee nyɛ́nɛ n wòlo bàā wi kpéʔele, mii mǎà dée ra sɔ̀ngí sàra na. Kàjáa kapye ki o nyɛ mii nyɛ́nɛ kéele í á mii si i di kpéʔele, lǎli bee ni ŋàʔanaga tundunro Kàfɔw kàlifáa mii ma. 18Tɛ́ɛgi bee ni gìí si gi nyɛ mii sàraw? Mii sàraw wi nyɛ mii í da Syɛɛnjóocǎnri nyuu lɔrɔ fun. Ní gee ki da yɛlɛ lè mii í taa Syɛɛnjóocǎnri báriga ni, mii í gee bee yaʔa yaà.
19Ye gi cán mii i nyɛ wɔ́rɔɔ, mii o nyɛ syɔɔnwaa faala púlo í. Koro ní ki myɛ ní mii n niyɛɛ bye syɛ́ɛnbèle myɛ púlo, koro ga pye mii í gbǎn syɛ́ɛnbèle taa saʔa bi sɔ̀lɔ. 20Mii ga pye ní Zyefubèle ní, mii n niyɛɛ bye Zyefuo koro ga pye mii í gbǎn Zyefubèle taa. Mii ga pye ní Mowizi làlwaw kôdanʔabéle ní, mii n niyɛɛ bye mɔ a jo làlwaw bee kôdanʔawaa wii, koro ga pye mii í gbǎn poro pèle taa, àlí n gi yaʔa mii o nyɛ làlwaw bee kôdanʔawaa í. 21Mii ga pye ní làlwaw funvɔɔlɔ ní, mii n niyɛɛ bye àmɛɛ làlwaw funvɔwaa nyɛ lè, koro ga pye mii í gbǎn làlwaw funvɔɔlɔ taa, koro ní ki myɛ ní mii o nyɛ Kolocɔlɔɔ làlwaw fun ni í, níì cán mii i nyɛ Kirisi làlwaw kôdanʔaɔ. 22Bele fànʔa gi cɛ́rɛ lè tágali ni, mii ga pye ní bele bee ní, mii n niyɛɛ bye mɔ a jo poro wàa wii, koro ga pye mii í poro pèle taa. Mii n niyɛɛ gàriga féleyi myɛ na syɛɛnfeleyi myɛ ma, koro ga pye mii í poro pèle taa syɔɔ. 23Mii i kérigèle myɛ kpéʔele Syɛɛnjóocǎnri kéele na, koro ga pye mii í mii lɛɛli taa di ni.
24Yele ga gi cán ncan bele be kàbá lè kàfyaali na, pe wàa nibin wi gáa baa li tɔ̀nɔw taa ì? Yaa fé kánmi bee na, koro ga pye yele í tɔ̀nɔ taa. 25Bele myɛ be kàbali kpéʔele lè, pe i peyɛɛ jó kérigèle myɛ na, koro ga pye poro í tɔ̀nɔ taa, bi gi taa tɔ̀nɔw bee i kwóo. Wolo si na, tɔ̀nɔnaa-sìngwɔɔw wolo caa. 26Kánmi bee na mii fé, ki si o nyɛ mɔ a jo mii ga kàfyaali tɛɛ̀yérege cán wii í. Mii i kágungèle kpúmɔnrɔ kpéʔele, kàjáa mii o kpúmɔn ni fɔ̀ngí í. 27A mii mii céri wɔʔɔ wii gbanʔama níì di pye mii púlo, koro ga pye mii ga joo n kwɔ́ɔ wozanbèle ma, mii tiimaa a kɔ́ fɔ̀n í.
Currently Selected:
1 Korɛnti ye 9: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
