1 Korɛnti ye 10
10
Bàā miyɛɛ kɔ̀rɔsíi yasunyi na
1 #
Yir 13:21-22; 14:22-29 Ni senyɛ̀nnɛ, mii o caa yele í pye kéeli naa sìnján ni í. Wolo tóolɛɛbèle myɛ maa pye fàfaangi láara ni, pe myɛ n tánʔa n sɔ̀lɔ Sólomi lɔ̀ʔɔ nínge ni. 2Pe maa pínɛ ní Mowizi ní fàfaangi ní Sólomi lɔ̀ʔɔ batɛmi na. 3#Yir 16:35 Pe myɛ n lìi lìinijanni na, lee li da yìri Kolocɔlɔɔ ma lè, 4#Yir 17:6; Cór 20:11 ní wɔ́ɔ̀ pínɛ n lònijangi gbaa, gee Kolocɔlɔɔ da kaan lè, níì cán Kolocɔlɔɔ maa kàdɛnɛgbɔʔɔ yaʔa a gi taʔa be na, gee ni pe da ni gbo lè. Kàdɛnɛgbɔɔgi bee si gi nyɛ Kirisi. 5#Cór 14:29-30 Koro ní ki myɛ ní be pèle saʔa kéele da baa Kolocɔlɔɔ dɛ́nɛ í, koro na pèle da ni tuun ni kúu fìími tára ni ni máari.
6 #
Cór 11:4
Kérigèle bee maa kpéʔele fɛ̀ɛ bi gi tɛ̀ɛn wolo na koro ga pye wolo a kɔ́ ra sɔ̀ngubeeri sɔ̀ngí àmɛɛ di pye poro ni lè í. 7#Yir 32:6 Yele a kɔ́ pye yasunzunbéle àmɛɛ poro pèle da pye lè í, àmɛɛ gi sɛ́bɛ lè níì jo: «A syɛ́ɛnbèle tɛ́ɛn n lìi, níì gbaa. Koro kàdoʔo ma a be yìri bàā kɔ̀nʔɔ́.» 8#Cór 25:1-18 Wolo a kɔ́ ra kanɔnʔɔri kpéʔele àmɛɛ poro pèle da gi kpéʔele lè í, a syɛ̀ɛnnɛ sirakama ní selebinnɛ ní saala kagunɔ kùu canʔa nibin ni. 9#Cór 21:5-6 Wolo a kɔ́ Kàfɔw pye wéle í àmɛɛ poro pèle gi kpéʔele lè í, á wàbiri be nɔngi n kpóo. 10#Cór 17:6-14 Yele a kɔ́ ra wàa sànʔá àmɛɛ poro pèle da gi kpéʔele lè í, a syɛɛnkpoo-tundunw be kálagi.
11Kérigèle bee myɛ maa kpéʔele be na jàngó bi pye fɛ̀ɛ wolo ma ní wɔ́ɔ̀ sɛ́bɛ bi wolo sàmi, wolo bele na làrizanni nan lè. 12Kánmi bee na wee wi ga ni gi sɔ̀ngí lè n jo woro n sámaga n yére, ki n yɛlɛ waa wiyɛɛ kɔ̀rɔsíi, koro ga pye wi a kɔ́ too í. 13Kagbanna ga kɔ́ɔ̀ too yele na, lee li lè li ga kɔ́ɔ̀ too n nyaa syɔɔn na í. Kolocɔlɔɔ i nyɛ tágala syɔ́ɔn, wi a fɔ̀lɔ kagbanna í too yele na bi yele jáa í. Kàjáa làa ga too yele na, wi a séew kaan yele ma yele í li jáa bi yiri li ni.
14Mii syɛɛn-nidaanmabèle, koro na gi yɛlɛ yaa còʔoró yaa léeli yasunzunri na. 15Mii i nyuu ní yele ní àmɛɛ gi yɛlɛ paa nyuu ní sícilibēle ní lè. Yele tiimaa ye mii syɛɛnjóori sɛʔɛ ye wéle. 16#Mat 26:26-28; Mar 14:22-24; Luk 22:19-20 Dùbaw yagbaʔa na wolo dùbaw kpéʔele lè, koro o nyɛ fɛ̀ɛ n gi tɛ̀ɛn ncan wolo n pínɛ n pye nibin Kirisi sìsyaanw ni ì? Búruw wolo kabagi lè, woro o nyɛ fɛ̀ɛ n gi tɛ̀ɛn ncan wolo n pínɛ Kirisi céri ni ì? 17Amɛɛ búruw nyɛ lè nibin, gee bee na wolo bele wo wírè nɛʔɛ lè, wolo n baa pínɛ n pye cere nibin. Níì cán wo myɛ n wo lɛɛgéle taa búruw bee nibin ni.
18 #
Lev 7:6
Bele be nyɛ lè Isirayɛli ye, céri kàbaan na, ye bele bee kéele wéle, poro bele be sárigaw káara káa lè, pe o nyɛ ní Kolocɔlɔɔ ní pínɛnyɛnnɛgɛ na ì, woro wee mɛ́ʔɛ na be sáriga-wòlo-yafaangi faan lè ì? 19A yele mii syɛ́ɛnri naa tɛɛkáriga cán lé? Yasungo káara i nyɛ lé yarigaa? Ba yasungi tiimaa i nyɛ lé yarigaa? Eʔe. 20#Làlw 32:17 Kàjáa dee be kúu lè, màdebèle má pe di kúu, Kolocɔlɔɔ má ban í. Mii si o caa yele í pínɛ ní màdebèle ní yafyɛn na í. 21Yele a gbǎn ra Kàfɔw yagbaʔa gbo si ní ra màdebèle yagbaʔa gbo í. Yele a gbǎn ra líi Kàfɔw tàbali na, si ní ra líi màdebèle tàbali na í. 22#Làlw 32:21 A yele caa lé wo nyabɛɛnnɛ wáa Kàfɔw na? Ba wolo nìri lé wi na?
Bàā ki myɛ kpéʔele ki pye Kolocɔlɔɔ kpɔ̀ʔɔrɔli kéele
23 #
1Kor 6:12
Syɔɔn a gbǎn kérigèle myɛ kpéʔele, koro i nyɛ kányɛʔɛ, kàjáa ye gi cán tɔ̀nɔ o nyɛ ke myɛ ni í. Syɔɔn a gbǎn kérigèle myɛ kpéʔele, ke myɛ si a gbǎn kàa taʔa wi na í. 24Wàa faala ga yɛlɛ waa wiyɛɛ nyɔɔmɔ caa í, fwɔɔ wàa nikwɔɔ wómɔ.
25Kaara o kaara be pára lè kaàpára-tɛ́ɛgi ma, yele a gbǎn di káa, ye a kɔ́ ra yeyɛɛ gábala yele fúnyi ni í. 26#Ŋún 24:1 Níì cán «tári ní di yáriri myɛ i nyɛ Kàfɔw wóro.»
27Ní sìndagaɔ ga yele yeri lìile na, á yele fɔ̀lɔ bi kári yaà, yariga o yariga wi ga sáà tɛ́ʔɛ yele taana lè, ye gi lìi, ye a kɔ́ ra yeyɛɛ gábala yele fúnyi ni í. 28Kàjáa wàa ga yele sàmi níì jo, «dee naa i nyɛ yasungo káara,» yele a kɔ́ di káa í yele sàmifɔw bee fûngabalaga kéele na. 29Syɔ́ɔnw bee fûngabalaga na mii nyɛ, yele wógi na ban mii nyɛ í.
Níì cán nyàʔá na syɔɔn fûngabalagi yɛlɛ gi kɔ kútii kúun mii wɔ́rɔdi na? 30Mii ga bariga kaan Kolocɔlɔɔ ma yarigaa kéele na, níì gi lìi, nyàʔá na gi yɛlɛ pe ní da mii mɛ́ɛgi kálagi yárigi bee kéele na mii bariga kaan n kwɔ́ɔ lè?
31Gee bee na yele ga ni líi yoo, yele ga ni gbo yoo, yariga o yariga yele kpéʔele lè, ki n yɛlɛ yaa gi kpéʔele ki pye Kolocɔlɔɔ kpɔ̀ʔɔrɔlɔ kéele. 32Yele a kɔ́ pye syɔɔnwaa na sábabu wí kálagi í, Zyefubèle yoo, Girɛkibèle yoo, Kolocɔlɔɔ Egiliziw yoo. 33Anbée mii tiimaa wɔ́ɔ i syɛ́ɛnbèle myɛ kanidaangéle kpéʔele kérigèle myɛ ni. Mii o niyɛɛ nyɔɔmɔ caa í, fwɔɔ syɛɛnnɛʔɛmɛ wómɔ, koro ga pye be syɔɔ.
Currently Selected:
1 Korɛnti ye 10: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
