1 Korɛnti ye 8
8
Káari be kúu yasunyi na lè
1Tɔ́ɔliw ni gee gi káari kéele kwɔ́ɔ dee be kúu yasunyi na lè, wo n gi cán cánna i nyɛ wo myɛ ma. Cánni li kpɔ́ɔmi nii syɔɔn ni, tàmagi si i kàa taari syɔɔn na. 2Ki ga pye syɔɔnwaa fúngo ni n jo woro n yarigaa cán, wi ga kɔ́ɔ̀ yafyɛn cán àmɛɛ gi yɛlɛ wi gi cán lè í. 3Wee si wi tàmaga le lè ní Kolocɔlɔɔ ní, Kolocɔlɔɔ n wee bee cán.
4Gee mii a joo lè káari káala kéele na, dee be kúu yasunyi na lè koro gi nyɛ wolo n gi cán yasungo o nyɛ yafyɛn dulunyanw ni í, kolocɔlɔwaa nikwɔɔ ní o beè Kolocɔlɔw nibin kàdoʔo ma í. 5Alí pèle i beè bele syɛ́ɛnbèle yiri lè kolocɔlɔbèlē, nyɛ̀ʔɛni na yoo, tári na yoo, a koro gi kaan a kolocɔlɔbèlē saʔa ní kàfɔɔlɔ saʔa pye beè, 6koro ní ki myɛ ní wolo má, Kolocɔlɔɔ i nyɛ nibin, woro wi nyɛ wolo Tóow, woro wee má yáriri myɛ yìri lè, wolo i nyɛ woro wòolo, Kàfɔw wɔ́ɔ i nyɛ nibin, woro wi nyɛ Zyezu Kirisi, woro wee báriga ni yáriri myɛ nyɛ lè n fàra wolo myɛ na.
7Kàjáa cánni bee o nyɛ syɛ́ɛnbèle myɛ ma í. Pèle maa tàli ni yasunyi káara káa, àlí n baa nan níjanʔa na pe ga ni di káa, pe n sèʔé ni di córo yasunyo wóro, a gee bee be fúnyi nɔ́nʔɔ, yi lè yi ga nìri í. 8Yaliire ban ti a gi kaan wolo kéeli í Kolocɔlɔɔ dɛ́nɛ í, wolo ga pye wolo o di líi í, yafyɛn a fɔ̀n wolo ni í. Wolo si ga wɔ́ɔ ni di líi, gee bee a yafyɛn fàra wolo na í.
9Yaa yeyɛɛ kɔ̀rɔsíi koro ga pye bele fànʔa gi cɛ́rɛ lè, yele fǎngi a kɔ́ pye bele bee na sábabu be too í. 10Mɔ wee wi kérigèle cán n láʔala lè, ní syɔɔn ga mɔ nyaa, a mɔ tɛ́ɛn ni líi yasungbaagaa ni n gi yaʔa syɔ́ɔnw bee zɔ̀n ga nìri í, wi a soro bi sa ra káari káa dee be kúu yasunyi na lè ì? 11Kánmi bee na fànʔa fun senyɛnw kéele na Kirisi kùu lè, mɔ a wee bee kálagi ní mɔ cánni ní. 12Ní yele ga ni kapeegèle kpéʔele yele senyɛnbèle na ni be fúnyi kálagi kánmi bee na, yi lè yi ga nìri í, Kirisi na yele ge kpéʔele. 13Koro na kapye mii káari káala a pye mii senyɛnwaa na sábabu wi too, mii a ní kaara káa nyáana í, koro ga pye mii a kɔ́ pye mii senyɛnw na sábabu wi too í.
Currently Selected:
1 Korɛnti ye 8: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
