1 Korɛnti ye 7
7
Yíbeyi kéele cèpɔrigɔ kéele na
1Kérigèle gele na yele da sɛ́bɛw tórigo naa mii ma lè, mii a joo ge kéeli na tɔ́ɔliw ni. Ki mǎà dée nyɔɔ kapye nàɔn ga tánga cɔlɔɔ na í. 2Kàjáa àmɛɛ kanɔnʔɔri yaà lè, nàɔn n yɛlɛ wi pye ní wi cɔɔ̀ ní, cɔlɔɔ si wɔ́ɔ pye ní wi nàɔn ní. 3Gee gi yɛlɛ lè ní céw ní, wi nǎnw n yɛlɛ waa gee bee kpéʔele wi ma, gee gi yɛlɛ lè ní nǎnw ní, wi céw si wɔ́ɔ ra koro kpéʔele wi ma. 4Céw ban wi nyɛ wi tiimaa céri nyúngo na í, wi nǎnw wi nyɛ ti nyúngi na. Kánmi bee na ki wɔ́ɔ̄ nyɛ nǎnw ban wi nyɛ wi tiimaa céri nyúngo na í, wi céw wi nyɛ ti nyúngi na. 5Ye a kɔ́ láʔa yeyɛɛ na í, fwɔɔ yele ga bɛ̀ɛ gi na bi làlaa yaʔa bàā nyɛ́ɛri Kolocɔlɔɔ ma. Si náa ní pye ní yeyɛɛ ní, koro ga pye Sutanaw a kɔ́ yele fáana lége kapeele ni yeyɛɛ sìnjomi báriga ni í.
6Mii n dee bee joo yele ma, kàjáa ŋàʔanaga si ban í, a mii yele lálii wii. 7Mii maa ni caa syɛ́ɛnbèle myɛ í pye àmɛɛ mii nyɛ lè. Koro ní ki myɛ ní Kolocɔlɔɔ n fǎngi kaan syɛ́ɛnbèle ma feleye feleye, wi n kàa félege kaan wàa ma, níì kàa félege kaan wàa nikwɔɔ ma.
8Bele be nyɛ lè pe ga kɔ́ɔ̀ cèpɔrigɔ kpéʔele í, n náà fàra lɔgucebèle na mii a gi joo bele bee ma si jo, pe ga kòro àmɛɛ mii nyɛ lè, koro gi a pɔ́rɔ be ma. 9Kàjáa pe ga pye pe a gbǎn peyɛɛ jò í, ki n yɛlɛ pe cèpɔrigi kpéʔele. Koro gi a pɔ́rɔ, sáni be kòro ki sìngbeʔele ni káā be wɔʔɔ lè.
10 #
Mat 5:32; 19:9; Mar 10:11-12; Luk 16:18 Bele be cèpɔrigi kpéʔele n kwɔ́ɔ lè, mii a gee naa joo bi gbàn be ma, mii si ban wi gi joo í, Kàfɔw wi gi joo níì jo: «Ki ga yɛlɛ cɔlɔɔ í kɔ́ wi nǎnw cée í. 11Wi si ga wi cée, ki n yɛlɛ wi kòro nàɔn fun, koro ga jáa wi lúru wi ba pye wi nǎnw ma, nàɔn ga wɔ́ɔ̀ yɛlɛ wi wi cɔɔ̀ yaʔa í.»
12Syɛɛnsanbèle má mii a gee naa joo, Kàfɔw da koro joo í, sìndagacɔɔ ga pye wolo senyɛnwaa ma, ní céw bee ga tɛ́nɛ̀ fɔ̀lɔ n kòro ní wi ní, wi a kɔ́ wi yaʔa í. 13Cewaa ga wɔ́ɔ̀ pye sìndaganàɔn ma, á wi fɔ̀lɔ céw í kòro ní woro ní, céw a kɔ́ wi cée í. 14Tɛ́ɛgi bee ni sìndaganǎnw n sínni taa wi céw báriga ni, a sìndagacew wɔ́ɔ̀ li taa wi nǎnw báriga ni, kapye gee bee ban í, yele pìíbèle mǎà dée pye syɛɛnnaa-sìnzinbéle, kàjáa tɔ́ɔliw ni pe n sín. 15Koro ní ki myɛ ní sìndagaw ga kɔ́ ni caa bi láʔa, ye wi yaʔa wi láʔa. Tágafɔnàɔn wàlá tágafɔjɔɔ, pe wàa faala ga pwɔɔ kéeli bee félege na í. Kolocɔlɔɔ n yele yeri yele í pye yɛɛ̀nyinge na. 16Cɔlɔɔ, mɛ̀ɛ́ mɔ gi cán n sɛ́ɛ kapye mɔ a ba pye sábabu mɔ nanw na wi syɔɔ í? Koro ga jáa, nàɔn, mɛ̀ɛ́ mɔ gi cán n sɛ́ɛ kapye mɔ a ba pye sábabu mɔ céw na wi syɔɔ í?
Bi kòro kánmee na mɔ pye á Kolocɔlɔɔ mɔ yeri lè
17Syɔɔn o syɔɔn si n yɛlɛ waa táanri waa yɛlɛgi ní yakaangi ní gee Kàfɔw kaan wi ma lè, ní kánmee na wi da pye lǎli ni Kolocɔlɔɔ wi yeri lè. Anbée mii wɔ́ɔ̀ egilizibèle myɛ pye paa gi kpéʔele. 18A Kolocɔlɔɔ wàa yeri lé n wi yaʔa a wi kɛ́nɛw kpéʔele n kwɔ́ɔ? Ki n yɛlɛ wi kòro kɛ́nɛw ni. A wi wàa yeri lé n wi yaʔa sìngɛnɛ ni? Ki ga yɛlɛ wi ní kɛ́nɛw kpéʔele í. 19Kɛ́nɛkpeʔeleri o nyɛ yafyɛn í, kɛ́nɛnaa-sìngbeʔeleri wɔ́ɔ o nyɛ yafyɛn í, fwɔɔ syɔɔn í Kolocɔlɔɔ tundunri foro, koro gi nyɛ yarigaa. 20Kolocɔlɔɔ ga syɔɔn o syɔɔn yeri n wi yaʔa kánmee na lè, ki n yɛlɛ wi kòro kánmi bee na. 21A wi mɔ yeri lé n mɔ yaʔa puloo? Mɔ a kɔ́ gi yaʔa ki mɔ fúngi curugo í. Koro ní ki myɛ ní kapye mɔ n kanmaa taa bi gbǎn pye wɔ́rɔɔ, mi gi kpéʔele, koro a pɔ́rɔ. 22Níì cán púlowee Kàfɔw yeri lè, wi n baa pye Kàfɔw ma wɔ́rɔɔ. Kánmi bee na gi wɔ́ɔ̄ nyɛ wɔ́rɔwee Kàfɔw yeri lè, woro i nyɛ Kirisi púlo. 23Kolocɔlɔɔ n yele syɔɔ lɔrɔ na. Ki ga yɛlɛ yele í ní kɔ́ pye syɛ́ɛnbèle púlobéle í. 24Ni senyɛ̀nnɛ, Kolocɔlɔɔ ga syɔɔn o syɔɔn yeri n wi yaʔa kánmee na lè, ki n yɛlɛ wi kòro kánmi bee na Kolocɔlɔɔ yɛ́ʔɛ ma.
Yíbeyi cèpɔrinaa-sìnbyebèle ní lɔgucebèle kéele na
25Bele be nyɛ lè cèpɔrinaa-sìnbyebèle,#7:25 Bele be nyɛ lè cèpɔrinaa-sìnbyebèle: Syɛ́ɛnri naa kɔ́rɔ a wɔ́ɔ gbǎn pye: Bele be nyɛ lè pe ga kɔ́ɔ̀ cekeele wàlá nàngeele cán í. Kàfɔw kajoolo o nyɛ mii ma bele bee kéele na í. Kàjáa mii a mii wóri joo, mii wee Kàfɔw kpéʔele lè tágala syɔ́ɔn wi nyínimi báriga ni.
26Gee mii nyaa gi ni lè koro gi nyɛ, bi yɛlɛ ní làrigbanni naa kèlē ní syɔɔn ga kòro àmɛɛ wi nyɛ lè, koro a pɔ́rɔ. 27A mɔ cɔlɔɔ pɔri lé n kwɔ́ɔ? Mɔ a kɔ́ jo mɔ a láʔa wi na í. A mɔ i nyɛ lé cɔlɔɔ fun? Mɔ a kɔ́ ra wàa caa í. 28Koro ní ki myɛ ní mɔ ga cèpɔrigɔ kpéʔele, koro o nyɛ kapeele í, pìcaa si ga wɔ́ɔ̀ cèpɔrigɔ kpéʔele, koro o nyɛ kapeele í. Kàjáa bele be gi kpéʔele lè, poro a wɔʔɔli taa céri na. Mii si i caa bi yele syɔɔ wɔʔɔli bee ma.
29Ni senyɛ̀nnɛ, syɛ́ɛnri mii joo lè ti kɔ́rɔw wi nyɛ wee naa, lǎli ga níì nɛʔɛ í. Bi láʔa lǎli naa na bele má cébèle nyɛ lè, ki n yɛlɛ be pye mɔ a jo pe i nyɛ càbala fun, 30ní bele be nyaan lè, ki n yɛlɛ be pye mɔ a jo pe o nyaan í, ní bele be nyɛ fundaanra na lè, ki n yɛlɛ be pye mɔ a jo pe o nyɛ fundaanra na í, ní bele be yariraa syoo lè, ki n yɛlɛ be pye mɔ a jo ti o nyɛ pe worò í, 31ní bele be peyɛɛ màkow nyɔɔgi lè ní dulunyanw yárira ní, ki n yɛlɛ be pye mɔ a jo pe ga peyɛɛ fúnyi yaʔa di na í, níì cán dulunyanw naa kèlē i kwóo.
32Mii o caa keelaa í kɔ́ yele fúnyi curugo í. Cɔlɔɔ-fùnvɔlɔ i sɔ̀ngí Kàfɔw kèlē na, koro ga pye woro kéeli í Kàfɔw dɛ́nɛ. 33Wee si wi cèpɔrigi kpéʔele lè, wi i sɔ̀ngí dulunyanw kèlē na, koro ga pye woro kéeli í woro céw dɛ́nɛ. 34A gee bee wi fúngi pye funyo siin. Nàɔn-fùnvɔlɔ koro ga jáa pìcaa, wee wi lè wi ga kɔ́ɔ̀ nàngeele cán í, wee bee i sɔ̀ngí Kàfɔw kèlē na, koro ga pye woro í sín ní woro céri, ní woro pǐli myɛ ní. Wee si wi cèpɔrigi kpéʔele lè, wee bee i sɔ̀ngí dulunyanw kèlē na, koro ga pye woro kéeli í woro nǎnw dɛ́nɛ.
35Mii ga dee naa joo yele ma bi yele yérige wii í. Yele nyɔɔmi kéele na mii di joo, koro ga pye yele í da síngi, sáā báara Kàfɔw ma ní fungo nibin ní.
36Pyà ga pye nànwaa ma, á wi lɛɛ n nan pe wi pɔri, wi si ga kɔ́ɔ̀ nàngeele cán í, á tofɔw gi nyaa fwɔɔ woro í wi yaʔa nàɔn ma wi wi pɔri kapye koro ban í ki a nyɔɔ í, gee wi caa bi kpéʔele lè, ki n yɛlɛ wi gi kpéʔele kapeele ban í. Ki n yɛlɛ pe cèpɔrigi kpéʔele. 37Kàjáa tofɔwee si wi yére nibin na lè ŋàʔanaga fun n yɛlɛ ní wi nyɛnɛ kéeli ní, níì gi tímana n wéle wiyɛɛ fúngi ni n gi nyaa woro a woro pìíw yaʔa wiyɛɛ taana, wee bee n kacànna pye. 38Gee bee na wee pyà wi lè wi ga kɔ́ɔ̀ nàngeele cán í, á wi gi nyaa woro a wi yaʔa nàɔn ma wi wi pɔri, wee bee n kacànna pye, wee si wi wi wów yaʔa lè nàɔn ga wi pɔri í, woro n gi kpéʔele a gi nyɔɔ n sɔ̀lɔ.
39Kolocɔlɔɔ n cɔlɔɔ pwɔɔ wi nǎnw na lǎli ni wi nǎnw tɛ́nɛ nyɛ lè sìi na. Kàjáa nǎnw ga kùu, céw i nyɛ wiyɛɛ ma bi gbǎn cèpɔrigi kpéʔele ní nànwaa nikwɔɔ ní wee wi wi dɛ́nɛ lè. Ki si n yɛlɛ nǎnw í pye tágafɔlɔ. 40Koro ní ki myɛ ní ki i nyɛ mii fúngi ni n jo, wi ga kòro nya, koro a pɔ́rɔ wi ma cèpɔrigi kpéʔelele na. Mii wɔ́ɔ i gi sɔ̀ngí Kolocɔlɔɔ Pǐli li koro tɛ̀ɛn mii na.
Currently Selected:
1 Korɛnti ye 7: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
